Read NQAARIIT NE ROOG Mberaand 13 Bible Online

Mberaand 13 - NQAARIIT NE ROOG bible

Mberaand 13

¹Abram a nomtoortiida Misira, a sag no ɓemb-roog o ñamaak ole Kanaan, ten fo o teem fo ke ta jeg’ina fop. Lot a yoona fo ten.

²Abram a jeg’a halal tigi, ta ref no cegel, na xaaliis fo na wurus.

³A jangoorta no ɓemb-roog o ñamaak, a garaa boo a fadiid Betel, no mbiñ onqe ta eet’ina o sip ƭiif ne ten, ndeer Betel fa Ay,

⁴me ta max’ina o sadaxand yaaga. Abram a ƴufginoora gon le no Yaal oxe no mbiñ onqaaga.

⁵Lot fee yoonoogna fa Abram a jeg’a itam a ked fo xa siir fo ƭiif.

⁶Saax le da ndeeƭna deyee a den ndax da mbokatoor yaam o jeg ole den kaa may’u boo mbaag’ee ndef o mbiñ o leng.

⁷Nqasir a jega ndeer gaynaak we na xa siir axe Abram fo we na xa siir axe Lot. Na jamaane faaga, Kaakanaan we fo Peeperisi we maad’u o ngenaa saax le.

⁸Abram a laya a Lot ee: «Ngela baa sufaaloor a ƭelem a jeg ndeer es fa wo mbaat ndeer gaynaak es fo we wo, yaam fog i ndefu.

⁹Saax le fop oxey mbaambir of! Retani a xoox of boog. O xotangaa na janoon, um xot na ñamaak, o xot na ñamaak, um xot na janoon.»

¹⁰Lot a ƴooklooxa, a ga joor fee no xuluɓ ole Yordaan a xuƥ sap. Yaaga o Yaal oxe yaqafulee a Sodoom fa Gomoor, a ret’a boo Sowaar a nand nen a ƭing no Yaal oxe, nen saax laa Misira.

¹¹Lot a jilana a xoox um boog joor fee no xuluɓ ole Yordaan fop, soo a xot farna fo batand. Neene a nqaajoortu a ndeer den.

¹²Abram a gena kam saax le Kanaan, soo Lot a gen kam teeru ke na joor fee, a sip ƭiif ke ten farna fa Sodoom.

¹³Wiin we ngen’ina Sodoom koy wiin faaxeer a ndeeƭu, soo a tooñaa o Yaal oxe.

¹⁴Cinj ye Lot a xaajoorna fa Abram, o Yaal oxe a laya a Abram ee: «Meene fodoona fod, ƴooklooxi, ɗeet farna fo ɓemb-roog o janoon fo no ɓemb-roog o ñamaak, farna fo batand fo no mudand.

¹⁵Saax le o ga’aa, xam ci’ong o ten, wo fo xa taan of boo faw.

¹⁶Xam fi xa taan of a mayit nen pep lanq, a may boo mbaagkaand o lim ne pep lanq a mbaagaandeena o limit.

¹⁷Inooxi o wid saax le bo ta xet, yaam xam ci’ong o ten.»

¹⁸Maaga, Abram a ɗisa ƭiif ke ten, a geniid no kariñ ke Mamre paam Hebron, a maxan o Yaal oxe maaga o sadaxand.