Read NQAARIIT NE ROOG Mberaand 15 Bible Online

Mberaand 15 - NQAARIIT NE ROOG bible

Mberaand 15

¹Ye keene a faafna, o Yaal oxe a daawna a Abram fa lay um no ƭaaɗ ee: «Abram, ba o saɗar! Mi fa xoox es refu pegoor of, too saɗig of xan a magin tigi.»

²Abram a doonaan ee: «O Yaal oxe na refkaa boo faw, xar o ci’kaxam? Mexey retaa too o ƥiy reefiraam, o laalam mbind es a refkaa a Eliyeseer fee genna Damaas.»

³Abram a layahina yee: «Ci’iraamo o ndaan o leng, o paɗ oxe rimteena no mbind es naru o ref o lam es.»

⁴Maaga, o Yaal oxe a daawnaan fa lay um ee: «Oxeene refkee o lam of, ndaa o ƥeef ŋaƈit na refkaa o lam of.»

⁵A ɓisaan tafil faa soo a layin ee: «Limi xa qoor axe, o waagangaa lim a den!» A ɓaata teen ee: «Neene mat xa taan of a mbodkaa!»

⁶Abram a gima no Yaal oxe soo ta ɗeetanin o ten nen o cofel.

⁷O Yaal oxe a layahinaan ee: «Mi refu o Yaal oxe suttoonga na teeru faa Uur fee no Kaakalde we ndax um ci’ong saax lene o jegkin.»

⁸Abram a doonaan ee: «O Yaal oxe na refkaa boo faw, o anddiloor olum o cooxkaxam ndax um and ee mi na jegkaa saax lene?»

⁹Maaga, o Yaal oxe a layaan ee: «Jangi o nqeel fo fambe fo suk mbaal too oxuu refna na den a jeg xa kiid xa tadaq fo a qodoxoñ fo a nuukuur a teɓ, o ɓoxotaam a den nen sadax.»

¹⁰Abram a janga cegel kaaga fop, a ɗeg a den a ndeer soo a fi o ɗeg oluu refna a jasnoor fo o lakas ole. Kaa koy, ɗeg’ee tiiƭ ke.

¹¹A tud ake a ngara, a ndal took xa tal axe no cegel ke, soo Abram a rax a den.

¹²Ye njeeƈ ne a mudna, Abram a naaga hanq a ɗaan, soo diid maak a damin kam o ƭaan ole no niɓaan taruus.

¹³O Yaal oxe a laya a Abram ee: «Yegi fo and ee xa taan of xan a ndef xa kataakoon no saax laa refeerna le den, xan a ndef maaga faɗ, too xan a ñagadileel boo xa kiid teemeed nahik.

¹⁴Kaa koy, xam doon o ɓay es took saax laaga mbi’na a den faɗ. Cinj kaaga, xan da sutoox maaga fo kalal mayu.

¹⁵Wo o mat, xan o dab daan of na jam, gasel a cinj yaa nogoyoona nogoy mbelu.

¹⁶No suk nahkandeer naa xan da nomtooxiid mene, yaam njofaƭar ne no Aa-amori we muukooxafulee.»

¹⁷Ye njeeƈ ne a mudna, tige a fi’a o niɓaan o ɗomu. Maaga, ndoxan saasu naa na suunaa fo a laalaam fiɗel a ndeefa a ndeer cegel ƭege ke.

¹⁸A koom o Yaal oxe a dalna ngiɓoor fa Abram ee: «Saax leeke, ci’aanum xa taan of no ke xotitna no xuluɓ olaa Misira boo no xuluɓ o maak olaa refna ref Ofrat,

¹⁹a gar no saax le no Keekeni we fo le no Keekenisi we fo le no Kaakadmon we

²⁰fo le no Heeheet we fo le no Peeperisi we fo le no Reerefa we

²¹fo le no Aa-amori we fo le no Kaakanaan we fo le no Giigirgasi we fo le no Yeeyebus we.»