Read NQAARIIT NE ROOG Mberaand 17 Bible Online

Mberaand 17 - NQAARIIT NE ROOG bible

Mberaand 17

¹Ye Abram a jegna xa kiid qarɓeen ɓetuu nahik fo xa kiid ɓetaa nahaq, o Yaal oxe a feeñooxaan, a layin ee: «Mi refu Roog o Cegu katil oxe. Ñaaƴti o cofel mbaambir es boog!

²Xam dalin ngiɓoor ndeer es fa wo, too xam mayƭand xa taan of.»

³Abram a dalfooxa o gung a lanq, soo Roog a layin ee:

⁴«Keeke refu ngiɓoor ne um dalinkaa ndeer es fa wo: Xan o ref o taan qeet mayu.

⁵Ne’kataandee Abram, ndaa xan o ne’el Abraham, yaam xan o ref o taan no qeet mayu.

⁶Xam ci’ong xa taan xa mayu, qeet mayu a mbaqaqoor na wo, soo maad a sutoor na wo.

⁷Xam dam ngiɓoor ne a ndeer es fa wo, damin a ndeer es fo xa taan of axe na ndeefankang, reefandin no suk den. Xan a ref ngiɓoor naa na refkaa boo faw, naa um refkaa Roog of fo Roog na xa taan of.

⁸Xam ci’ong, wo fo xa taan of, saax lene refiidoona o gataakoon, saax le Kanaan fop, too xam ref Roog den.»

⁹Roog a laya a Abraham ee: «Fat o gay ngiɓoor ne mi, wo fo suk nuu refna na xa taan of.

¹⁰Neeke nu ngayitkaa ngiɓoor ne a ndeer es fa nuun fo xa taan of: Oxuu refna o koor a ndeer nuun, fat a xucoox.

¹¹Nquc ne na refkaa o anddiloor ole a ndeer es fa nuun.

¹²No suk nuu refna, oxuu rimeena na nuun too a ref o koor, fat a xucel yaa bes um a dakooxiidna, ta ref oxaa rimeena no mbind of mbaat oxaa jikteena xaaliis mbaat o gataakoon olaa fogeerna na xa taan of.

¹³Oxe rimeena no mbind of a ware o xuc, ten fo xe jiktoona xaaliis of. O anddiloor ole no ngiɓoor ne na refkaa boo faw no cer nuun a refkaa.

¹⁴O koor oxuu xucooxeerna fat a sutel xeet fee. Oxeene koor kaa ɗeg ngiɓoor es.»

¹⁵Roog a laya a Abraham ee: «Saarayi fee o teef ne’kataand Saarayi ndaa Saara[32] a ne’kateel.

¹⁶Xam barke’in, too xam ci’ong fo ten o ƥiy itam. Xam barke’in too xan a rim qeet mayu, maad no qeet mayu a ngat no ten.»

¹⁷Abraham a gunga a lanq, a jal, soo a lay taa no yiif um ee: «Mam o ƥiy a reefkaa o cegu xa kiid teemeed? Mee ndax Saara fa xoox um, oxe na xa kiid qarɓeen ɓetuu nahik! Ndax xan a ñootat?»

¹⁸Cinj kaaga, Abraham a laya a Roog ee: «Ey! Yaasam Isma’el a ñoow mbaambir of!»

¹⁹Roog a doonaan ee: «Ha’aa! Xan Saara fee o teef a rimanong o ƥiy o ngoor too fat o ne’in Isaak.[33] Xam dam ngiɓoor es fo ten, damin itam ndeer es fo xaa faqaqoorna no ten. Xan a ref ngiɓoor naa na refkaa boo faw ndeer es fo xa taan um.

²⁰No kaa farna na Isma’el koy, nanaaxoong, xam barke’in, ci’in xa taan xa mayu. Xan gelwaar xarɓaxay fo gelwaar ɗik a ngat no ten, too xam fi no ten xeet fa maak.

²¹Kaa koy, no ke farna no ngiɓoor es xam damin fa Isaak fee o jegkaa fa Saara na waxtu feeke mbaan.»

²²Yaa Roog a layna fa Abraham boo a ƴut, a yoɗooxa took.

²³Abraham a janga a Isma’el fee o ƥeem, fop we ndimteena no mbind um fo we ta jikit’ina xaaliis um, goor we no mbind um fop daal, a xuc a den no ñaal leng kut ne Roog a heblit’uuna o ten.

²⁴Ye Abraham a xucooxna a soƥ’a ta jeg xa kiid qarɓeen ɓetuu nahik fo xa kiid ɓetaa nahaq.

²⁵Isma’el fee o ƥeem a jeg’a xa kiid xarɓaxay fo xa kiid xa tadaq ye ta xucooxna.

²⁶No ñaal leng kut naaga Abraham a xucooxu, ten fa Isma’el fee o ƥeem.

²⁷Neene, goor we no mbind um fop ndimeena maaga mbaat faɗ we ndimteena maaga mbaat we njikteena xaaliis no saax jan a nqucooxandoora fo ten.