Read NQAARIIT NE ROOG Mberaand 18 Bible Online

Mberaand 18 - NQAARIIT NE ROOG bible

Mberaand 18

¹O Yaal oxe a feeñooxa a Abraham no kariñ kaa Mamre, a soƥ ta moof paam ndokand ne no ƭiif um njoloor o mbuc. Neeke a feeñoorit’un.

²Abraham a yoɗa a kid um, soo a ga goor daduk waa ngoƭ’eeruuna. Yaa ta ga’na a den, a inoora no ndokand ne no ƭiif ne ten, a ƴuf a xetook a den. A gunga a lanq,

³soo a lay ee: «O Yaal oxe, a soƥangaa yee daawaam yirmande of, ba o joon o paɗ of suuraa.

⁴Ngela cungyo foofi a ɓisiidel, nu ƥoganel a caf nuun. Ñootnooxafulyo yoora ndaxar neeke.

⁵Xam ret ɓisiid ñaamel ndax nu ndif’oorin. Cinj kaaga, nu mbaaga o suur a ƭat nuun. Neene, nu ndeefkee me no tag nuun na kasaara.» A ndoonaan ee: «Iyo! Fi’teen ne layoona.»

⁶Abraham a ñofa o yaang no ƭiif naa ten maa Saara, a layin ee: «Ñofi eed fo o eedir ole xa eed xa tadaq mbiɗel, o xiiwin, fi’an a den xa kaf.»

⁷A ñofa o ret no siir olaa, a dam o xeel o giñu, a cooxin o tag um ta ñofin o jaw.

⁸A xotahina fo neew fo fo sis fo a tegeƴ ake no xeel ole njaweena soo a diƈanin a den. Ten fa xoox um koy a moofa paam den yoora ndaxar ne, soo da ñaam.

⁹Maaga a laamtaan ee: «Taa Saara fee o teef?» A doona a den ee: «Oxaay kam ƭiif naa!»

¹⁰O leng na den a laya yee: «Mbaan na waxtu feeke deŋ, xam nomtooxiid me wo, too xam soƥ Saara fee o teef a jeg o ƥiy o ngoor.» Saara koy, kaa fod’u no ndokand ne no ƭiif ne ten reeƭna cinj ne Abraham, a nan-gilooxaa.

¹¹Abraham fa Saara koy kaa nogoy’u lool, ten taxu Saara yaakaar’atee o jeg o ƥiy.

¹²Saara a jala taa kam um, a lay ee: «Waagaam o nogoy boo nand neeke, o kor es itam a nogoy! Ndax xam moofat felakinooxaa?»

¹³Maaga, o Yaal oxe a laya a Abraham ee: «Xar taxu Saara a jalaa, a lay ee ndax no ndigil waagataam o jeg o ƥiy mi feeke nogoyna boo ƴut?

¹⁴Ndax a jega kaa xoxna o Yaal oxe. Xam nomtooxiid meen na waxtu feeke mbaan, too xam soƥ Saara a jeg o ƥiy o ngoor.»

¹⁵Saara a xaña yaam diid, a lay ee: «Jaliim de!» O Yaal oxe a doonaan ee: «Jalaa kañ!»

¹⁶Goor waa a inooxa ndax da suur. A njagna farna fa Sodoom, soo Abraham a welit a den.

¹⁷Maaga, o Yaal oxe a laya yee: «Ndax kaam ɗasinkaa a Abraham ke um fi’kaa?

¹⁸Xan Abraham a ref o taan no xeet fa maak fa njegu doole, too qeet ke no lanq ke fop no ten a mbarke’itkeel.

¹⁹Feek kaam jil a Abraham, ndax ta hebil xa ƥeem fo wiin mbind um da ngayaa a ƭat ale no Yaal oxe, a ndeefaa a ƭat fo o cofel, xam fadnanin a tegit ake fi’ananuuma.»

²⁰O Yaal oxe a laya a Abraham ee: «Ƭomatax ne took Sodoom fa Gomoor a ɗoma tigi, too bakaad den a magna lool!

²¹Ten taxu xam ɗeetik boo and ndax kaa da mbesoor deŋ nen fangax le fadiidna boo me mi. A reftangee neene xam and.»

²²Goor waa a ndeta, a nqot farna fa Sodoom, Abraham o mat a maad o geenoox mbaambir no Yaal oxe.

²³Abraham a matiida, soo a lay ee: «Ndax xan o saŋkandoor o cofu fo o soxodu xe?

²⁴Xeƈa a waaga o jeg jofu qarɓeen ƥetik kam teeru faa. Ndax xan o saŋik a den itam, fañ o waasan teeru fee yaam jofu qarɓeen ƥetik we ndefna maaga?

²⁵Fi’kiro kaaga koy! Doonkiro o cofu xe leng kut ke doonoona o soxodu xe, soo warnoor o cofu xe fo o soxodu xe jaf leng. Wo fee na hate’aa we no lanq ke, ndax fesoorkiro fo o cofel?»

²⁶O Yaal oxe a doonaan ee: «Um soƥangaa kam Sodoom jofu qarɓeen ƥetik, xam waasan teeru faa fop yaam den.»

²⁷Abraham a layaan ee: «Ga’angi, fo ut fo ndaw rek refum soo fi neeke layaa fo o Yaal oxe.

²⁸A waaga o ref ee xan ɓetuk a yaqan ta fad qarɓeen ƥetik, ndax ɓetuk waaga xan a tax o saŋik teeru faa fop?» O Yaal oxe a doonaan ee: «Um soƥangaa maaga jofu qarɓeen nahik fo jofu ɓetuk, saŋikkinum.»

²⁹Abraham a ɓaata o lay ee: «A waaga o ref ee jofu qarɓeen nahik soom ndefu maaga.» O Yaal oxe doonaan ee: «Yaaga, fi’kiim a den paaxeer leng yaam jofu qarɓeen nahik waaga.»

³⁰Abraham a layahina yee: «O Yaal oxe, ngela ba o fuux yaa ɓaatuuma o lay! A waaga o ref ee jofu qarɓeen tadik waay maaga.» O Yaal oxe doonaan ee: «Fi’kiim dara yaa soƥuuma maaga jofu qarɓeen tadik.»

³¹Abraham a layahina yee: «O Yaal oxe, boo ndiik de waasanaam! Xeƈa jofu qarɓeen ƭik waay maaga.» O Yaal oxe a doonaan ee: «Yaaga, saŋikkinum yaam jofu qarɓeen ƭik waaga.»

³²Abraham a laya yee: «O Yaal oxe, ngela ba o fuux! Jaf leeke soom um laykataa. Xeƈa jofu xarɓaxay soom owaay maaga.» O Yaal oxe a doonaan ee: «Yaaga saŋikkinum yaam jofu xarɓaxay waaga.»

³³Ye o Yaal oxe a layna fa Abraham boo a ƴut, a reta, soo Abraham a nomtoox no mbind um.