Read NQAARIIT NE ROOG Mberaand 21 Bible Online

Mberaand 21 - NQAARIIT NE ROOG bible

Mberaand 21

¹O Yaal oxe a wetandooxa ke ta reg’ina a Saara, a fi’antin o ten ne ta layit’uuna.

²Saara a roka o fud, soo a ñoot o ƥiy o ngoor na waxtu fee ta hapeena ne Roog a layit’uuna. A soƥa koy Abraham a nogoy tigi.

³Abraham a ne’a o ƥiy onqeene Saara a riman’uuna Isaak.[38]

⁴Abraham a xuca a Isaak fee o ƥeem ye ta jegna bes fa ndakooxiidu, ne Roog a heblit’uuna o ten.

⁵Abraham a reeƭa na xa kiid teemeed um yaa Isaak fee o ƥeem a rimeena.

⁶Maaga, Saara a laya yee: «Ey! Roog a fi’anaxam kaa um muuƴooraa, too oxuu yeguuna xan a jalaxam.»

⁷A doona teen ee: «An waag’u o gimnoor a Abraham ee xan Saara a numin o ƥiy? Yaag oo toox de, ke ta nogoyna nogoy fop oo rimanaanum o ƥiy o ngoor.»

⁸O ndeɓandoong onqe a maaka soo a roɓnel. Abraham a fi’a a put a maak a koom alaa Isaak a roɓneena.

⁹Saara a ga’a o ƥiy o ngoor onqe Agaar fee o Miimisira xe a rim’ina fa Abraham ta xaadnooxaa a Isaak.

¹⁰Saara a laya a Abraham ee: «Raxi o ceefeer oxene fo o ƥeem, yaam o ƥiy onqe no ceefeer oxene lasirkee lam ne fa Isaak fee o ƥees.»

¹¹Fa lay faaga a feƭar’a a Abraham tigi, yaam Isma’el oo o ƥeem a reeƭu.

¹²Kaa koy, Roog a laya a Abraham ee: «Baa keene a feƭarong yaam o goor ole fo o ceefeer of. Kuu Saara a xeɗoonga, fat o ci’in o ten, yaam o kurcala of ŋaƈit na Isaak a sutoorkaa.

¹³Xam fi itam o ƥiy o ngoor onqe no ceefeer of a ref o taan no xeet fa maak, yaam na wo a faqaqooru.»

¹⁴Abraham a inooxa ƥiiɓ teel, a xot puuru fo mboxos, a cooxin a Agaar ta gadooxin. A cooxaan itam o goor ole, soo a raxin. Agaar a reta, a mo’ik kam a koƥ-a-ƥor alaa Beer-Seeba.

¹⁵Ye foofi le kam mboxos ne a fagna, Agaar a moofna o goor ole no mbafid,

¹⁶soo a ret, a moof koƭu a jasnoor fo ten ee yaam waagee muk o ɗeetaa o goor ole ta xonaa. A moofa boog, a jasnoor fo ten soo a ref no loolaa.

¹⁷Roog a nana xa buuq axe no goor ole. Malaaka fee no Yaal oxe a foda na asamaan, a xoy a Agaar, a layin ee: «Agaar xar oo? Ba o saɗar dara, yaam Roog a nana xa buuq axe no goor ole meene ta refna sax.

¹⁸Inooxi, xot o goor ole, damin o ɓay, yaam xam fi xeet fa maak a faqaqoor no ten.»

¹⁹Roog a weta a kid ake Agaar soo ta ga a ngas foofi, a reta a ƴeew mboxos ne, soo a ci o goor ole ta yer.

²⁰Roog a reeƭa fo o goor ole, ta maak, a refat o kiin o baane’u kam a koƥ-a-ƥor ale, a ref itam o qaaxaƴ a qali.

²¹Na koƥ-a-ƥor alaa Paaraan a gen’u, soo ya um a waaƭanin o tew o Miimisira.

²²Na jamaane faaga, Abimelek a yoona fa Pikol fee o aa-adax no xiixire we ten, soo a lay a Abraham ee: «Roog oxey fa wo no fop ke o fi’aa.

²³Ndiiki koy, daaɓooxi meeke no gon Roog ee naxkiraamo, naxkiro xa ƥees mbaat xa taan es, too xan o paaxel of a ref no saax leeke refiidoona o gataakoon, ne o paaxel ole mi a refitna fa wo.»

²⁴Abraham a doonaan ee: «Daaɓooxaanum!»

²⁵Kaa koy a xasana a Abimelek yaam a ngas foofi laa faɗ we Abimelek a njaɓit’ina no ten.

²⁶Abimelek a doonaan ee: «Andiim oxaa fi’na kaaga de, yegniraamo o ten, too mi fa xoox es mexey sogan o yeg xaye.»

²⁷Maaga, Abraham a ci’a a Abimelek a ked fo qoox, soo den ɗik fop da ngiɓoor.

²⁸Abraham a dalfooxa o say fo mbaal ɓetuu ƭik.

²⁹Abimelek a laamta a Abraham ee: «Fo mbaal ɓetuu ƭik neeke sayoona koy, xar a tektu?»

³⁰Abraham a doonaan ee: «Jaɓi um cooxong a den, ndax ta ref seede yee mi o mat waqu a ngas ale.»

³¹Ten taxu o mbiñ onqaaga a ne’el Beer-Seeba[39], yaam maaga a ndaaɓoorit’u den ɗik fop.

³²Neene a ngiɓoortu boog kam Beer-Seeba. Cinj kaaga, Abimelek a inooxa, ten fa Pikol fee o aa-adax no xiixire we ten, soo a nomtoox no saax laa no Fiifilista waa.

³³Abraham a jimba purndu kam Beer-Seeba. A ƴufginoora gon le no Yaal oxe Roog fee na refkaa boo faw.

³⁴Abraham a reeƭa o gataakoon boo miñu kam saax le no Fiifilista we.