Read NQAARIIT NE ROOG Mberaand 22 Bible Online

Mberaand 22 - NQAARIIT NE ROOG bible

Mberaand 22

¹Cinj kaaga, Roog a ɗeetlooxa a Abraham, a layin ee: «Abraham!» Abraham a doonin ee: «Oow!»

²Roog a layaan ee: «Jangi o ƥiy o leng kut onqe jegoona, Isaak fee fexoona fex, o ret no saax laa Moriya ɓoxotin maaga, nen sadax fa ndoxel took o leng na xa coong axe um lalkang.»

³Abraham a inooxa ƥiiɓ teel, a humin o faam um, soo a yoon fo dag ɗik fa Isaak fee o ƥeem. A seɓa xa cuuƭ axaa ta doxitna sadax fee, soo a xot a ƭat ndax ta ret no mbiñ onqe Roog a lay’uuna.

⁴No ñaal ndadkandeer naa, Abraham a yoɗa a kid um, soo a ƴook o mbiñ onqe koƭu.

⁵Maaga, Abraham a laya dag we ten ee: «Cungyo a in mene fo o faam ole, soo mi fo o goor ole i mbaɗook a Roog maana. Cinj kaaga, xan i nomtooxiid me nuun.»

⁶Abraham a janga xa cuuƭ axe na ndoxitkeel sadax fee, a roxondin a Isaak fee o ƥeem, a saq japil fee fo fiɗel le. Den ɗik fop a nqota a ƭat.

⁷Maaga, Isaak a laya a Abraham fee faap um ee: «Ndi baa!» Ta doonin ee: «Oow!» Isaak a layin ee: «Mi de kaam ga i saq xa cuuƭ fo keƥandir, ndaa taa mbaal ne na sadaxitkeel?»

⁸Abraham a doonaan ee: «O ƥees, Roog na waaƭankaa a xoox um mbaal ne na sadax fa ndoxel fee.» Den ɗik fop a ndefa no ñaaƴaa.

⁹Ye da mbadiidna no mbiñ onqe Roog a layuuna, Abraham a fi’a o sadaxand, soo a doon xa cuuƭ axe took fee. Cinj kaaga, a dura a Isaak fee o ƥeem, soo a doonin took xa cuuƭ axe no sadaxand ole.

¹⁰Abraham a letna o ɓay um, a xot japil fee, ndax ta xiris o ƥeem.

¹¹Maaga, malaaka no Yaal oxe a foda na asamaan, a xoy a Abraham, a layin ee: «Abraham! Abraham oow!» Abraham ee: «Oow!»

¹²Malaaka fee a layaan ee: «Ba o ɓay of a fad no goor ole, too ba o fi’in dara! Ndiiki koy andaam tigi yee saɗaraa a Roog, too xañiraamo o ƥeef o leng kut onqe jegoona.»

¹³Abraham a wiƈaqilooxa, soo a ga a cinj um suk mbaal laa xa can axe a njomna kam ngol. Abraham a reta, a xot suk mbaal le, a ɓoxotin nen sadax fa ndoxel na seek no ƥeem.

¹⁴Abraham a ne’a o mbiñ onqaaga Yahwe-Yiree[40]. Ten taxu ta layeel boo xaye yee: «Xan pexey a jeg no joong ole no Yaal oxe.»

¹⁵Malaaka fee no Yaal oxe a foda na asamaan, a xoy a Abraham jaf ɗikandeer,

¹⁶a layin ee: «Mi o Yaal oxe, mexe daaɓoortan a xoox es ee: Feek fi’aa keene too xañiraamo o ƥiy o leng kut onqe jegoona,

¹⁷xam barke’ong, mayƭand xa taan of, da mayit nen xa qoor axe na asamaan fo nen pep lanq na ƥeeraamb o maag. Xa taan of na mbugko maadooxa took fañ den.

¹⁸Qeet ke no lanq ke fop no xaa faqaqoorna na wo a mbarke’itkeel, yaam kaa o nananaam.»

¹⁹Abraham a nomtooxiida me no dag we ten, soo da yoon, a nqaad Beer-Seeba, yaam maaga Abraham a genoogu.

²⁰Yaa kaaga a faafna, Abraham a yegne yee Milka fee o tew no ndeɓ um Nakoor a rima fa Nakoor

²¹a Uus fee taaw um, Buus fee reefna took um, Kemu’el fee faap Araam,

²²Kesed, Haso, Pildas, Yidlaf fa Betwel.

²³Betwel feene rimu a Rebeka. Weene ndefu xa ƥiy ɓetaa tadaq axe Milka a rimna fa Nakoor fee o ndeɓ Abraham.

²⁴Nakoor a jeg’a itam fo ngeƈ-a-salma ne ten ne’’eena Rewma a Tebax, Gaxam, Taxas fa Maaka.