Read NQAARIIT NE ROOG Mberaand 26 Bible Online

Mberaand 26 - NQAARIIT NE ROOG bible

Mberaand 26

¹Na jamaane faaga, biim a yena no saax le, fogreerna fo biim laa jeg’ina na jamaane Abraham. Maaga, Isaak a reta Geraar maa Abimelek fee o maad no Fiifilista we.

²O Yaal oxe a feeñooxa a Isaak, a layin ee: «Ba o ret Misira. Moofi no saax le um laykang.

³Moofi no saax lene. Xam ref fa wo, too xam barke’ong, yaam cooxe kene fop, xam cooxong o ten, wo fo xa taan of, too xam gay a taaƥ ale fi’uuma fa Abraham fee faap of.

⁴Xam mayƭand xa taan of, da mayit nen xa qoor axe na asamaan. Cooxe kene fop, xam ci’in xa taan of, too qeet ke no lanq ke fop na xa taan of a mbarke’itkeel,

⁵yaam Abraham a nanana o ñuxur es, a gay bargal es, kebil es, ke simtuuma fo ke dalnuuma.»

⁶Maaga, Isaak a moofa no saax laa Geraar.

⁷Ye wiin we no saax le a laamtan mayu kaa jofna no teem, a doona a den ee: ‹O cigeen es oo de!› Kaa saɗaroogu o lay a den ee o teem oo, ndik da mbarin, yaam Rebeka kaa mos’u lool.

⁸Ne Isaak a miñ’ina no saax le, bes, Abimelek fee o maad no Fiifilista we a foda no falangteer ole soo a ga Isaak a ŋasaa fa Rebeka fee o teem.

⁹Abimelek a xoyna a Isaak, a layin ee: «Mee ndax o teef oo! Nam waago layit boog ee o cigeen of oo?» Isaak a doonaan ee: «Kaam lay keene took o fañaa warel yaam o ten.»

¹⁰Maaga, Abimelek a layaan ee: «Xar fi’o a in kene! A yoq’a o ndik rek, o leng na xeet fee a wondoox fo o teef oxe, too wo ɓekkoogu a in no njakad onqaaga.»

¹¹Maaga, Abimelek a heblita na xeet faa fop ee: «O kiin oxuu duqna o koor oxene mbaat o teem xan a warel.»

¹²No hiid olaaga, Isaak a duufa no saax laaga, soo a saxad boo tap um a may, yaam o Yaal oxe kaa barke’un.

¹³O jeg um mosee ñak o ɓaatoox, too a reeƭata o yaal halal.

¹⁴A jeg’a a ked fo xa siir xa mayu fo dag mayu. Fiifilista we kaa siisoogatu a Isaak sax.

¹⁵Kas ke dag we Abraham fee faap um a mbaq’ina fop, Fiifilista we a uupa a den fo lanq boo da may.

¹⁶Abimelek a laya a Isaak ee: «Sutooxi saax in, yaam wo hupatu a in doole.»

¹⁷Isaak a inoora maaga, soo a ret a dal na yulanq alaa Geraar, a genaa maaga.

¹⁸Isaak a waqatina kas ke mbaq’eena na jamaane faap um Abraham, too Fiifilista we a uup’u a den a cinj ye Abraham a xonna. A ne’ahina a den a kon a leng kut ake faap um a ne’ina a den.

¹⁹Dag we Isaak a mbaqahina a ngas na yulanq alaa, soo a njeg maaga a ngas foofi fo fel.

²⁰Gaynaak we Geraar a nqasra fo we Isaak, yaam ee ‹In njegu foofi le›. A ne’a a ngas alaaga Esek[49], yaam ne da nqasir’ina fo ten.

²¹Dag we ten a ƥaata o mbaq a ngas a lakas alaa garitna nqasir, a ne’in Sitna[50].

²²A inoora maaga, a ɓaat o waq a ngas a lakas alaa garteerna nqasir leng. A ne’a alaaga Rehobot[51], yaam ee ‹Ndiiki koy, o Yaal oxe a ɓeka a in maa yaajna, too xan fop in a ñaaƴ.›

²³A inoora maaga, a ret Beer-Seeba.

²⁴No yeng olaaga, o Yaal oxe a feeñooxaan, a layin ee: «Mi refu Roog fee na faap of Abraham. Xam barke’ong soo mayƭand xa taan of yaam o tag es Abraham.»

²⁵Isaak a maxa maaga o sadaxand, a ƴufginoor gon le no Yaal oxe, soo a sip maaga ƭiif um. Dag we ten a mbaqahina maaga a ngas.

²⁶Abimelek a inoora Geraar, a gar me ten, a yooniid fa xaariit um Ahusat fa Pikol fee o aa-adax no xiixire we ten.

²⁷Isaak a laya a den ee: «Xar nu mbaaƭiidu me mi feek kaa nu mbañaam soo ndaxaam saax nuun?»

²⁸A ndoonaan ee: «I nga’a yee o Yaal oxe xey fa wo. Ten taxu i lay ee fat ngiɓoor a ref a ndeer in fa wo.

²⁹Daaɓooxi yee fi’kiro a in paaxeer leng ne i toroxandteeroonga, a refangee o mbi’anong paax rek, soo nqaƴong o ret na jam. Ndiiki koy, o Yaal oxe a barke’aang.»

³⁰Isaak a jawana a den a put, soo da ñaam, a yer.

³¹A inooxa ƥiiɓ teel, a ngiɓoor fo a taaƥ. Isaak a xaƴa a den, soo da nqaad na jam.

³²No ñaal leng kut ne, dag we Isaak a ngara a yegniidin paru na ngas ale da mbaqoogna yee a ngas ale a yula.

³³Isaak a ne’a a ngas alaaga Siiba[52]. Ten taxu teeru faa a ne’el Beer-Seeba boo no ñaal ne xaye.

³⁴Ye Esawu a jegna xa kiid qarɓeen nahik, a gilga a Yudit fee o ƥiy Beeri, o Heeheet oxe, a gilig itam a Basmat fee o ƥiy Elon o Heeheet oxe.

³⁵Rew weene a mbeƭarna o ñoow ole Isaak fo ole Rebeka.