Read NQAARIIT NE ROOG Mberaand 27 Bible Online

Mberaand 27 - NQAARIIT NE ROOG bible

Mberaand 27

¹Isaak a nogoy’ata tigi. Kaa maak’u boo waag’atee o ga tus. Maaga, a xoya a Esawu fee taaw um, a layin ee: «O ƥees!» Ta jaaɓ ee: «Oow!»

²Isaak a layaan ee: «Me ta refna de, maakataam tigi, too andiim bes fee um xonkaa.

³Ndiiki koy, ke buguuma refu yee: O jang ƥonax of, a tungaar ale fo a qali le, ret na koƥ alaa waraniidaam mbuufuɗag.

⁴Fat o jawanaam o ten njaw mbelu ne bugtanuuma, soo ɓisiidaam o ten, um ñaamin, ndax um barke’ong bo um helko fo xonaa.»

⁵Rebeka a nana ke Isaak a layoogna a Esawu fee o ƥeem. Cinj kaaga, Esawu a reta na koƥ alaa, a xawlook mbuufuɗag ndax ta ɓisiidin.

⁶Yaa ta fesooxaa rek, Rebeka a laya a Yakoob fee o ƥeem ee: «Ga’i, nanaam faap of a layaa a Esawu yee:

⁷‹Ɓisiidaam mbuufuɗag, jawanaam o ten, um ñaamin. Xam barke’ong mbaambir no Yaal oxe bo um helko fo xonaa.›

⁸Ndiiki koy o ƥees, nan-gilooxi ke um simkang.

⁹Reti no ged laa, o xotiid pambe tew ƭik kiñu. Xam jawanin a faap of boo ne ta bugtuuna.

¹⁰Cinj kaaga, o ɓisanin a faap of ta ñaam, ndax ta barke’ong bo ta helko fo xonaa.»

¹¹Yakoob a doona a ya um ee: «Ga’angi! Esawu kaa may wiil, too mi jegiim wiil leng.

¹²Xeƈa xan faap es a naƥnaam, soo um refat no ten o maamaaɓ, neene xam qic took es a salax ndaa refkee barke.»

¹³Ya um a layaan ee: «O ƥees, yaasam a salax alaaga a yen took es. Fi’i rek ne layoonga, too o ret ɓisiidaam pambe ke.»

¹⁴Yakoob a reta, a ɓisiid a den a ya um, soo ta jawan a Isaak njaw mbelu ne ta bugna.

¹⁵Cinj kaaga, Rebeka a xota tikoorik mosu ke Esawu fee taaw um ndeeƭna no mbind naa, a rokan a den a Yakoob fee o ndeɓ.

¹⁶Rebeka a muurta xa ƥay axe fo o cok ole Yakoob ƭool ke no pambe ke yaam jegee wiil leng.

¹⁷A cooxa a Yakoob fee o ƥeem njaw ne fo puuru ke ta juɗ’ina.

¹⁸Yakoob a gara me faap um, a layin ee: «Baa!» Isaak a jaaɓ ee: «Oow o ƥees! Wo an oo koy?»

¹⁹Yakoob a doona a faap um ee: «Mi yoo, Esawu fee taaw of! Fi’aam ke lay’axamoona. Inooxi, ñaam, ndax o barke’aam!»

²⁰Isaak a laya o ƥeem ee: «Heey! O ƥees, ñofaa boo jeg!» Yakoob a doonaan ee: «O Yaal oxe Roog of xawrandaxam fo ten.»

²¹Isaak a laya a Yakoob ee: «Matiidi boog um naƥnong boo and ndax wo oo o ƥees Esawu ndax nam.»

²²Yakoob a matiida, Isaak a naƥnin, soo a lay ee: «O ñuxur ole de, o ñuxur Yakoob oo, ndaa xa ƥay axe, xa ƥay Esawu yoo.»

²³Andid’iran yaam xa ƥay axe Yakoob kaa njeg’u wiil nen xa ƥay axe Esawu, soo ta barke’in.

²⁴A laamtaan ee: «Wo refu Esawu fee o ƥees?» Yakoob a doon ee: «Ii.»

²⁵Isaak a layaan ee: «Cooxaam um ñaam no nqawlax ne wo, ndax um barke’ong.» Yakoob a cooxaan ta ñaam, a ɓisiidin biiñ ta yer.

²⁶Maaga, Isaak fee faap um a layaan ee: «O ƥees, matiidi boog too farakooxaam.»

²⁷Yakoob a matiidaan, a farakooxin. Isaak a duñnooxa tikoorik ke Esawu ta rokoox’ina. Cinj kaaga, a barke’aan ee: «Tuñ ke no ƥees kaa nand nen tuñ o qol o naatu laa o Yaal oxe a barke’na.

²⁸Yaasam Roog a ci’ong liim laa na hataa na asamaan fa barke fee na sutooraa no lanq ke, a ci’ong bele fa biiñ fa mbagkatar.

²⁹Yaasam qeet a ƥoxotoox na wo, a saax ake a ngungaa mbaambir of! Yaasam o ref o yaal no fog of, we fogtoona yaay a ngungaa mbaambir of. Yaasam oxuu salooxoonga a salooxel, soo oxuu xeɗanoonga barke a barke’el!»

³⁰Ye Isaak a barke’na a Yakoob boo a ƴut, Yakoob a inooxa me faap um, a ret, ɓaatnee dara, Esawu a inoor no nqawlax ne ten a gatiid.

³¹Ten itam a jawa, a ɓisiid a faap um, a layin ee: «Baa! Inooxi, ñaam mbuufuɗag ne waraniidoonga, mi fee o ƥeef, ndax o barke’aam.»

³²Isaak a laamtaan ee: «Wo an oo?» A doonaan ee: «Mi yoo Esawu fee taaw of!»

³³Maaga, Isaak a dalfooxa o kafkafin yaam ke ta yegna, a sendaa. A laamta yee: «Yaaga boog, an refu oxe waraniidaxama mbuufuɗag, a ɓisiidaam o ten boo um ñaamin, miñee dara o fadiid? Barke’aanum toox de, too xan a barke.»

³⁴Ye Esawu a nanna a ƭelem ake faap um, a faɗooxa, a naqadiloox tigi, soo a layin ee: «Baa, koo barke’aam mi itam!»

³⁵Isaak a layaan ee: «O ndeɓ of garu fo nqooƭ-nof, soo a jang barke fee wo.»

³⁶Esawu a laya yee: «Ndax ne ta ne’eena Yakoob[53] taxu ta naxaam boo a caf a ƭak? A janga a las taaw ale mi, ndiiki koy ten oo xeene a jangahina barke fee mi.» A layahina a faap um ee: «Ndax yoqɗaniraamo barke?»

³⁷Isaak a doona a Esawu yee: «Ga’angi, dalnaanum o yaal of boo ƴut, xeɗanin fog um a ndefik dag um, xeɗanin bele fa biiñ fa mayu. Xar waagatoong o xeɗan boog?»

³⁸Esawu a laya a faap um ee: «Baa, ndax barke fa leng faaga soom jeg’o jeg? Mi itam, barke’aam!» Naaga, Esawu a dalfooxa o ref no faɗooxaa.

³⁹Isaak fee faap um a doonaan ee: «Ga’i, xan o gen maa goƭna lanq qaadu ke fo liim le na yentiidaa na asamaan.

⁴⁰Na pexey laƥ of o bugko ñoowtaa, o ndeɓ of o mat, xan o neewandoox mbaambir um. Xan o joqooyooxaa o mbiñ fo mbiñ, ndaa xan o ɓol kadoor ke ta gadinkang.»

⁴¹Esawu a dalfooxa o fuuxan a Yakoob, yaam barke fee faap um a barke’uuna. Esawu kaa layoogu no xeeñ um ee: «Ndiiki faap es a xon, too a koom xam war a Yakoob fee o ndeɓ es.»

⁴²Rebeka a yegne a ƭelem akaaga na Esawu fee taaw um. Maaga, a xoyna a Yakoob, a layin ee: «Me ta refna koy, Esawu kaa bugong o war ndax ta rabdinoox took of.

⁴³Ndiiki koy o ƥees, nan-gilooxi ke um askang! Inooxi, ƴuf Xaraan maa Laban fee o camin es.

⁴⁴Moofi maaga boo yaa fuux le no maag of a ɓoosna,

⁴⁵boo yaa o say ole o maag of a sayanoonga a watna, ta weecit ke fi’anoona. Maaga, xam xoyniidong. Andiim xar na taxkaa um ñak a nuun nuun ɗik fop no ñaal leng kut ne?»

⁴⁶Rebeka a laya a Isaak ee: «O ñoow kaa wataam xus nen ƈaq yaam roog we no Heeheet we. Boo Yakoob a waaƭitna o tew no roog we no Heeheet we ndefna no saax le, andiim xar deyum o ñoowaa!»