Read NQAARIIT NE ROOG Mberaand 29 Bible Online

Mberaand 29 - NQAARIIT NE ROOG bible

Mberaand 29

¹Yakoob a xota a ƭat, a ret no saax laa no waa ngenna no batand.

²A yoɗa a kid um soo a ƴook a ngas kam a koƥ ale, too a ked a tadak cegel a mbondoox’u paam um, a ñootnooxaa, yaam na ngas alaaga xa siir axe a yernooge. Ɓil maak koy wegtooge a ngas ale.

³Xa siir axe fop, maaga a nqetoogu, ɓil le na ngas ale a berengel, soo cegel ke a yernel. Cinj kaaga, ɓil le a nomtiidel na seek um, a wegatin a ngas ale.

⁴Yakoob a laamta gaynaak we yee: «Fog es, mam nu ngenu?» A ndoonaan ee: «Xaraan i ngenu.»

⁵A ɓaata laamit a den ee: «Ndax nu anda a Laban fee o ndaan Nakoor?» A ndoonaan ee: «Ii, i andaan de!»

⁶A laamtahina a den ee: «Mbaa jam rek a jegu?» Da ndoonin ee: «Jam soom a jegu kañ. Kaana sax Rakel fee o ƥeem o ndew oo na garaa fo ged le.»

⁷Yakoob a laya a den ee: «Tige kaa maad o ñaalaa, too a koorin cegel fadafulee! Yerinyo a den boog, too ƥaat o nomtoox na xa suufand axaa!»

⁸A ndoonaan ee: «Refangeerna xa siir axe fop kaa nqet, o leng waagee wet a ngas ale.»

⁹Ye ta maadna layaa fa den, Rakel a fadiida fo ged le faap um, yaam ten reeƭu o kaynaak oxe.

¹⁰Ye Yakoob a ga’na a Rakel fee o ƥiy o ndew Laban fee o camin ya um fo ged le Laban, a matiida, a bereng ɓil le no don ole na ngas ale, soo a yerin ged le Laban fee o camin ya um.

¹¹Cinj kaaga, Yakoob a farakooxa a Rakel, soo a lool,

¹²Yakoob a andnoora a Rakel ee o pog faap um a refu, o ƥiy Rebeka. Rakel a ƴufa, a yegnikin a faap um.

¹³Ndak fo ndak, ye a padiid ale Yakoob a naagna xot no yul nof Laban, a dalfooxa o ƴuf maa ten, a farakooxin. A ɓisiidaan no mbind naa, soo Yakoob a jangtooxin fop.

¹⁴Maaga, Laban a layaan ee: «Andaam kañ ee o pog es ŋaƈit refo, too fo’oy fo leng kut ole na ƴufaa ƴuf na mi na ƴufaa na wo.» Yakoob a moofa maa Laban boo a jeg o nqool.

¹⁵Bes, Laban a laya a Yakoob ee: «Ndax kaa o bugko jalanaxam no fud o letu yaam ne refoona o ndokoor es? Layaam ke na refkaa ndabid of.»

¹⁶Laban koy xa ƥiy xa tew xa ƭaq a jeg’u, taaw fee Leya a ne’’e, mbat-fo-ɗeen ne a ne’el Rakel.

¹⁷Leya koy, fo ngid ne njaak’ee, Rakel o mat a mos boo nen liƥ.

¹⁸Yakoob koy, Rakel a bug’u. A laya yee: «Xam jalanong xa kiid ɓetaa ƭaq yaam Rakel fee o ƥeef o ndew refna mbat-fo-ɗeen.»

¹⁹Laban a layaan ee: «Ci’ong o ten moƴanaxam o ci’in o koor o lakas. Moofi no mbind es boog!»

²⁰Neene, Yakoob a jala xa kiid ɓetaa ƭaq, ndax ta jeg a Rakel. Xa kiid axeene a ndeeƭa na Yakoob nen ñaal leng-leng yaam kaa bug’u a Rakel lool.

²¹Cinj kaaga, Yakoob a laya a Laban ee: «Cooxaam o tees, yaam waxtu fee i ndegoor’ina no calel a faga, too kaam bug o yoon fo ten.»

²²Laban a fokata wiin we no gox olaaga fop, soo a fi a put.

²³No yaar olaa, Laban a janga a Leya, a ɓisin a Yakoob soo ta yoon fo ten.

²⁴Laban a cooxa a Leya fee o ƥeem o ndew a Silpa ta refik o ceefeer um.

²⁵No feet nqes olaa Yakoob a ga’a yee tiye Leya a reeƭu. Maaga, a laya a Laban ee: «Xar fi’axamo kene? Mee ndax Rakel tax’u um jalanang. Xar taxu o naxaam boog?»

²⁶Laban a layaan ee: «Kaaga naagee o jegaa me in, o ndeɓ naagee eetaa o doloox o maag um.

²⁷Fadandi bes fa ndakooxiidu fee no mbumbaay ne fa taaw fee, xan i ci’ahinong oxaana yaa jalanoona a in xa kiid ɓetaa ƭaq xa lakas.»

²⁸Yakoob a fi’a naaga, a fadand fa Leya bes fa ndakooxiidu fee no mbumbaay ne. Cinj kaaga, Laban a ci’aan a Rakel fee o ƥeem o ndew ta dolooxankin.

²⁹Laban a cooxa a Rakel fee o ƥeem o ndew a Bilha ta refik o ceefeer um.

³⁰Yakoob a yoona itam fa Rakel fee ta moƴ’ina o bug ee Leya. A jalahina no mbind Laban xa kiid ɓetaa ƭaq xa lakas.

³¹O Yaal oxe a ga’a yee Leya bug’aand lool, soo a fi’in o tew o tiirim, Rakel o mat a ref o tew o timar.

³²Leya a roka o fud. A ñoota o ƥiy o ngoor, soo a ne’in Ruben[56], a lay ee: «O Yaal oxe a ga’a ne neewandteema, too me ta refna, xan o kor es a bugataam.»

³³A rokahina o fud, soo a ñoot o ƥiy o ngoor, a lay ee: «O Yaal oxe a anda yee bugaandeem, soo ta ci’ahinaam o ƥiy onqene.» A ne’aan Simewon[57].

³⁴A rokahina o fud, a ñoot o ƥiy o ngoor, a lay ee: «No jaf leeke koy, xan o kor es a damoox na mi, yaam rimanaanum xa ƥiy xa koor xa tadaq.» Ten taxu o ƥiy onqaaga a ne’el Lewi[58].

³⁵A rokahina o fud, a ñoot o ƥiy o ngoor, a lay ee: «No jaf leeke, xam simat o Yaal oxe.» Ten taxu ta ne oxaaga Yudaa[59]. Maaga, a xaƴa fa ndim.