Read NQAARIIT NE ROOG Mberaand 3 Bible Online

Mberaand 3 - NQAARIIT NE ROOG bible

Mberaand 3

¹No muumeen ke o Yaal oxe Roog a sak’ina fop, da ndef na koƥ ale, fangool fee moƴ’u o ƴiƴ teen. A laamta o tew oxe yee: «Ndax no ndigil Roog kaa lay ee nu moɗkee xa tim axe no taxar ke na ƭing ale fop?»

²O tew oxe a doonaan ee: «Kaa i moɗaa xa tim axe no taxar ke ndefna na ƭing ale

³bo ta yoqaa xa tim axe no ndaxar ne refna ndeer a ƭing ale. Roog kaa lay ee: ‹Ba nu moɗin, too ba nu nduqin, a koom aluu nu mbi’uuna rek, xan nu nqon.› »

⁴Maaga, fangool fee a laya o tew oxe yee: «Coo! Nu nqonkee tus.

⁵Roog kaa and ee mbanuu nu moɗuuna, xan a kid nuun a mbetoox, nu mbod fa Roog, and paax fo paaxeer!»

⁶O tew oxe a ga’a yee xa tim axe no ndaxar ne kaa mos bo too a yaawnoox, ne’atiim da mbaag o cooxit yiif. A dalfooxa o woq na xa tim axe, a moɗ, soo a ci o kor oxe ten reeƭna paam um ta moɗ itam.

⁷Den ɗik fop a kid den a ndalfooxa o mbetoox, da nga ee o ƥor a yoqu. A taƥranda a naf ndun soo a singoor a den.

⁸Yaa yilmaan fee a yenaa, a nana o ñuxur ole no Yaal oxe Roog fee widoogna kam a ƭing ale. O koor oxe fo o tew oxe a ndalfooxa o ƭas kam taxar ke na ƭing ale ndax o Yaal oxe Roog ga’kee a den.

⁹Maaga, o Yaal oxe Roog a xoya o koor oxe, a layin ee: «Ndi mam refo?»

¹⁰O koor oxe a doonaan ee: «Kaam nan o ñuxur of kam a ƭing ale rek, um diid soo dalfoox o ɗas yaam o ƥor yoqum.»

¹¹O Yaal oxe Roog a laamtaan ee: «An andnoorong ee o ƥor yoqo yee? Ndax kaa o moɗ o rim ole no ndaxar ne xañit’oonga?»

¹²O koor oxe a doonaan ee: «O tew oxene ɓisiidoona me mi cooxaxam o rim ole no ndaxar ne, mi yoo um moɗ.»

¹³Maaga, o Yaal oxe Roog a laamta o tew oxe yee: «Xar taxu o fi keene?» O tew oxe a doonaan ee: «Fangool fee mat naxaxam bo um moɗ o rim ole no ndaxar ne.»

¹⁴O Yaal oxe Roog a laya fangool fee yee: «Feek keene fi’o, salooxee a ndeer cegel ke fo a ndeer muumeen-a-koƥ ke fop. O fud of o bugko ñaaƴtaa, soo yeraa fo ut ole no ñoow o ñis of fop.[8]

¹⁵Xam ɓek njofooraƭar[9] ndeer of fo o tew oxe, ndeer we mbaqaqoorna na wo fo we mbaqaqoorna no ten. Xan oxe faqaqoorna no ten a gef xoox of bo tee rip, soo wo o gaañin no faaɗ.»

¹⁶A geleerooxa, a lay o tew oxe yee: «Xam ɓaat o ƭomel gaaj of. Boo o ƥiy a sutooraa na wo, o ɗomel boo mat o xon, too yaqankee o ƴufanaa o kor of yaam a yuxum, too ten na kelfa’kang.»

¹⁷A laya a Aadama yee: «Feek kaa o nan o ñuxur no teef, moɗ o rim ole no ndaxar ne xañit’oonga, lanq ke a salooxe yaam wo. No ñaal ke no ñoow o ñis of fop, ŋos-ŋos tigi na taxkaa o jeg ñaamel.

¹⁸Xan lanq ke a saxik kiƈ fo qooc, o ñaamataa daaƭ le na koƥ ale.

¹⁹Boo yaa o nomtooxkaa no lanq ke hat’oona, ñiitoox foop no rak of na taxkaa o jeg ñaamel. No lanq ke hato, too teen o nomtooxkaa[10].»

²⁰O koor oxe a ne’a o teem Awa[11], ee yaam ten refu ya no wiin we fop.

²¹O Yaal oxe Roog a dalfooxa o fi’an a Aadama fa Awa tikoorik ƭool[12], a rokin a den.

²²O Yaal oxe Roog a laya yee: «Ndiiki koy, o kiin oxe a nandata nen o leng na in, took o and paax fo paaxeer. Yaaga boog, fat i nqañtin ta duq ndaxar ne no ñoow ole, yaam ndik ta moɗ xa tim axe ten, soo a ñoowaa boo kili.»

²³O Yaal oxe Roog a raxta a den na ƭing alaa Edeen, ndax da nqooxik lanq ke da ngatna.

²⁴A cinj ye ta raxna o koor oxe, a sipa pindel yeeyetax no batand naa na ƭing alaa Edeen, da saq laƥ kaa na kaƥaa, a yetooxaa a ƭat ale jofna no ndaxar ne no ñoow ole.