Read NQAARIIT NE ROOG Mberaand 30 Bible Online

Mberaand 30 - NQAARIIT NE ROOG bible

Mberaand 30

¹Ye Rakel a ga’na yee rimee fa Yakoob, a dalfooxa o naalaa a Leya fee o maag um, soo a lay a Yakoob ee: «Kaa o rimkaa fa mi mbaat um xon!»

²Fuux le Yakoob a biltooxana a Rakel, soo ta layin ee: «Kaam ref Roog boo yaqanang fa ndim?»

³Rakel a layaan ee: «Bilha fee o ceefeer es oxey, yooni fo ten, too xam jegit no ten xa ƥiy.»

⁴A cooxaan a Bilha fee o ceefeer um, soo Yakoob a yoon fo ten.

⁵Bilha a roka o fud, soo a riman a Yakoob o ƥiy o ngoor.

⁶Rakel a laya yee: «Roog a ɓoxotaxam ɓur, a nan o ñuxur es, soo a ci’aam o ƥiy o ngoor.» Ten taxu ta ne’in Dan[60].

⁷Bilha fee o ceefeer Rakel a rokahina o fud, soo a ɓaat o riman a Yakoob o ƥiy o ngoor.

⁸Rakel a laya yee: «Na pexey Roog maafraam fo o maag es soo maafin.» A ne’a o goor ole Neftali[61].

⁹Ye Leya a ga’na yee fa ndim um kaa geenoox, a janga a Silpa fee o ceefeer um, a cooxin a Yakoob nen o teem.

¹⁰Silpa fee o ceefeer Leya a rimana a Yakoob o ƥiy o ngoor.

¹¹Leya a laya yee: «Ndaw o ɗaay!» A ne’aan Gaad[62].

¹²Silpa fee o ceefeer Leya a rimanahina a Yakoob o ƥiy o ngoor o ƭikandeer.

¹³Leya a laya yee: «Ɗaayaam, yaam xan roog we a layaxam ee o ƭaayu xe.» A ne’a o ƥiy o ngoor onqaaga Aseer[63].

¹⁴Ruben a sutooxa waxtu fo a saxad bele, a ga xa mandargoor[64] kam xa qol axe. A ɓisiida a den a Leya fee ya um. Maaga, Rakel a laya a Leya yee: «Ngela ci’aam na xa mandargoor axe no ƥeef.»

¹⁵Leya a doonaan ee: «Ndax ke jangoona o kor es deyirang, boo o bug o jangahin xa mandargoor axe no ƥees?» Rakel a layaan ee: «Cooxaam xa mandargoor axe no ƥeef, o yaar ta fe’iid me wo.»

¹⁶No yaar olaa, ye Yakoob a gataa no qol, Leya a xetooxiidaan, soo a layin ee: «Mbe ne yaar mi jegun, yaam jiktaanum xa mandargoor axe no ƥees.» Yakoob a fe’a maa ten no yeng olaaga.

¹⁷Roog a jaɓa a qeƭ ale Leya, soo ta rok o fud, a riman a Yakoob o ƥiy o ngoor o ƥetkandeer um.

¹⁸Leya a laya yee: «Roog a saɗgaxam yaam ne janguuma o ceefeer es, cooxin o kor es.» A ne’a o goor olaa Isakaar[65].

¹⁹Leya a rokahina o fud, soo a riman a Yakoob o ƥiy o ngoor o ɓetuu fa lengandeer.

²⁰Leya a laya yee: «Roog a ci’axam ɗang mosu. No jaf leeke de xan o kor es a gen fa mi, yaam rimanaanum xa ƥiy xa koor ɓetaa fo leng.» A ne’a oxaaga Sabulon[66].

²¹Cinj kaaga, a rima o ƥiy o ndew, soo a ne’in Dinaa.

²²Roog a wetandooxa a Rakel, a jaɓ a qeƭ um, soo a fi’in o tiirim.

²³A roka o fud, a ñoot o ƥiy o ngoor, soo a lay ee: «Roog a watna gaci es.»

²⁴A ne’aan Yoseef[67], ee: «Yaasam o Yaal oxe a ɓaataam o ƥiy o ngoor o lakas!»

²⁵A cinj ye Yoseef a rimeena, Yakoob a laya a Laban ee: «Kaam jaɓ o xaad no saax es.

²⁶Ndiiki koy, cooxaam rew we mi fo xa ƥiy axe mi, taxna um jalanong, too xam ret, yaam wo fa xoox of andaa ke jalanoonga.»

²⁷Laban a layaan ee: «A soƥangaa yee daawaam yirmande of, yoqi mene. Kaam layel no mbeeñil ee wo taxu o Yaal oxe a barke’aam.»

²⁸A ɓaata teen ee: «Layi ke o rabidkeel, too xam cooxong o ten.»

²⁹Yakoob a layaan ee: «Andaa a paax ne jalantoonga fo ne o siir ole wo a suptoorna yaam mi.

³⁰O ndik onqe jeg’oona eetaand, ga’aa ne ta ɓaatoorna, too o Yaal oxe a barke’aang no kaa xotitna no ñaal naa rokiiduuma no mbind of. Ndiiki koy, a mban um jalankaa ƥasil es?»

³¹Laban a laamtaan ee: «Xar um rabidkang?» Yakoob a doonaan ee: «Rabidkiraamo dara yaa jaɓoona o fi ke um laykang, too yaaga xam ɓaatong o gayanaa soo yetooxaa o siir ole wo.

³²Xam reefan ged le fop xaye, kes no paal ceel ke, ke njegna a nox mbaat ƥalgu ke, pambe ke itam neene. Keene na refkaa ndabid es.

³³O feet fat o gar ɗeet ndax gore’aam ndax nam. Njegel nuu ga’oona too jeelee mbaat naa jegeerna nox mbaat ɓalgee, xam ref na wo o kuuɗ.»

³⁴Laban a layaan ee: «Fat a refit ne laytanoona!»

³⁵No ñaal leng kut naaga, a kesa a suk pambe ke njeg’ina a nox fo ake njeel’ina. Pambe ke njeelna fop, ke njegna tig tan fo fop ke ƥalig’ina no paal ke, a cooxa a den xa ƥeem, da ngayaa a den.

³⁶Cinj kaaga, a hebla a den boo da njeg ñaal tadik na ñaaƈ, ndax da ngoƭatir fa Yakoob. Yakoob o mat a maad’a o gayaa ke yoqna no siir ole Laban.

³⁷Yakoob a janga xa loq ndaxar poopilye xa quƥu fo xa loq ndaxar amaand fo xa loq ndaxar palataan. A dalfooxa o faafal a den boo tig tan ke na naaq ake a feeñaa.

³⁸Cinj kaaga, a janga xa loq axe ta faafal’ina, a ɓek a den kam mbalka ne a ked ake a yertaa mbaambir cegel ke na ŋaayraa yaa da yeriidaa.

³⁹Cegel ke ŋaayroogna mbaambir xa loq axeene, a ndim’angaa, fo mbote ne kaa njegoogu a nox mbaat da njeel mbaat da ƥalig.

⁴⁰Yakoob a xaaja fo mbote ne ndimeena too a njeg a nox mbaat da njeel no cegel ke Laban. A fi’aan boo a jeg xa siir axaa ta fokateerna fo cegel ke Laban.

⁴¹A mbanuu cegel kiñu ke a ŋaayroogna, Yakoob kaa ɓekoogu xa loq axe kam mbalka ne mbaambir cegel ke, ndax da ŋaayrit paam xa loq axe.

⁴²Cegel ke a ŋak’angaa koy, kesanoogee a den a xoox um. Neene, ŋaku ke a ndeeƭata o jeg Laban, soo kiñu ke a ndef o jeg Yakoob.

⁴³Yakoob kaa moƴ’u moƴ o jegaa halal. A jeg’a a ked a mayu, jeefeer fo dag, keeleemb fo xa paam.