Read NQAARIIT NE ROOG Mberaand 32 Bible Online

Mberaand 32 - NQAARIIT NE ROOG bible

Mberaand 32

¹No feet nqes olaa ƥiiɓ teel, Laban a inooxa, a asoor fo xa ƥiy xa tew axe ten fo xa taan axe ten, a barke a den. Cinj kaaga, a nomtooxa, a xaad no mbind um.

²Yakoob a suura a ƭat um. Malaaka Roog a nqetiida fo ten.

³Ye ta ga’na a den, a laya yee: «Meeke mat refu saŋe ne Roog.» A ne’a o mbiñ onqaaga Mahanayim[70].

⁴Yakoob a hebla duleer da adookin maa Esawu fee o maag um, a soƥ ta genaa na koƥ alaa Edoom no saax laa Seyiir.

⁵A hebla a den ee: «Fat nu layanaam o yaal es Esawu yee: O tag of Yakoob kaa tee: Ret’aam no mbind Laban, moof maaga boo fa ndiik.

⁶Jegaam qoox, xa paam, a ked, dag fo jeefeer. Ten taxu um lultiid o layanel o ten o yaal es ndax um daaw yirmande of.»

⁷Duleer we a ndeta, soo a nomtooxiid me Yakoob, a layin ee: «I ndeta maa no maag of Esawu. Oxey a xetiidaa fa wo, a yoon fo goor teemeed nahik.»

⁸Diid a dama a Yakoob, ta naqadiloox. A dalfooxa o xaaj ƭik wiin we ndeeƭna fo ten, a xaaj ged le, o siir ole fo keeleemb ke itam, yaam ee:

⁹Boo Esawu a garna, a yen took a leng na qaaj ake, ale yoqna xan a waag o daɗ.

¹⁰Yakoob a laya yee: «Roog fee no taan es Abraham, Roog fee na faap es Isaak, o Yaal oxe wo fee lay’axama yee: ‹Nomtooxi no saax of, no mbaafaap of, too xam fi’anong paax›,

¹¹andaam ee o paaxel of fo ngor of ne lalaxamoona fop a njombaxam, mi fee o tag of. Ye jootuuma o xuluɓ ole Yordaan, retaa, o loq es rek saq’um, ndiiki koy mexe refata a yaj a ƭak.

¹²Kaam xeɗang o muclaam no ɓay no maag es Esawu. Kaam saɗaraa ndik ta gar a waraam, mi fo rew we mi fo xa ƥiy axe mi.

¹³Wo layaxam ee: ‹Xam fi’anong paax, fi xa taan of a mayit nen pep lanq na ƥeeraamb o maag, a may boo mbaagkaand o lim.› »

¹⁴Yakoob a fe’a no mbiñ onqaaga. A jila no ke ta saq’ina kaa ta ci’na a Esawu fee o maag um,

¹⁵pambe tew teemeed ƭik fo a suk pambe qarɓeen ƭik, paal tew teemeed ƭik fo a suk paal qarɓeen ƭik,

¹⁶keeleemb tew qarɓeen tadik kaa na numnaa fo xa pi naak qarɓeen nahik fo qoox xarɓaxay, xa paam xa tew qarɓeen ƭik fo koŋka xarɓaxay.

¹⁷O siir oluu refna teen a cooxaan dag we ten, a lay a den ee: «Ndeefyo mbaambir es, saytirand xa siir axe.»

¹⁸A hebla o eetaand oxe yee: «Yaa Esawu fee o maag es a xetkaa fa wo, soo a laamtong ee: ‹An refu o yaal mbind of?›, ‹Mam o jofaa?›, ‹An jegu o siir ole adnoona?›,

¹⁹fat o doonin ee: ‹O tag of Yakoob jegun. Kaa ref ɗang laa ta ɓisaa o yaal es Esawu. Ten fa xoox um sax oxe took in.› »

²⁰A hebla leng kut ke o ƭikandeer oxe fo o tadkandeer oxe fo we ndeefoogna xa siir axe fop ee: «Neene nu laykaa o yaal es Esawu yaa nu nqetkaa fo ten.

²¹Fat nu layin itam ee: ‹O tag of Yakoob oxe reefiidaa took in.› » Kaa layoogu taa kam um ee: «Ci’it neeke um ɓisan, xan a ɓoosdand fuux um. Cinj kaaga, xan i njasnoor, um ga’in jak too xeƈa xan a xetooxaam kam o paaxel.»

²²Ci’it ne a adooxaan, soo ten o mat ta fe no saŋe naa no yeng olaaga.

²³Yakoob a inooxa no yeng o leng kut olaaga, a xot rew ɗik we ten fo jeefeer ɗik we ten fo xa ƥiy xa koor axe ten ndeeƭna xarɓaxay fo o leng, soo a joot fa den njootand naa Yabok.

²⁴A joota fa den a ƈufnand alaa, soo a jootin o jeg um fop.

²⁵Cinj kaaga, Yakoob a moofa ten soom. O koor a dalfooxaan o song, da ndef no maafir, boo neen mbeet ne a leeliidaa.

²⁶Ye o koor oxe a ga’na yee waagiran o maaf, a fadaan no fek, soo fek le Yakoob a girdoox.

²⁷Cinj kaaga, a laya a Yakoob ee: «Xaƴaam, um ret, yaam roog a feeda.» Kaa koy, Yakoob a doonaan ee: «Xaƴkiroong o ret, a refangee kaa o barke’aam.»

²⁸O koor oxe a laamtaan ee: «Nam ne’ee?» A doonaan ee: «Yakoob.»

²⁹O koor oxe a layaan ee: «No ke xotitna no ñaal ne xaye ne’kataandee Yakoob, ndaa Isra’el [71], yaam maafraa fa Roog, maafir fo goor, maaf a den.»

³⁰Yakoob a laamtaan ee: «Nam ne’ee koy?» O koor oxe a doonaan ee: «Xar o laamtaa no gon es?» Cinj kaaga, a barke’taan maaga.

³¹Yakoob a ne’a o mbiñ onqaaga Penu’el[72] yaam ee ga’aam a Roog jaxrañ soo maad o ñoowaa.

³²Ye njeeƈ ne a wataa, yaaga o koor oxe a jootaa a Penu’el, Yakoob o mat a ref no laƴaa fek le.

³³Ten taxu boo no ñaal ne xaye xa taan axe Isra’el naangee o ñaamaa o pamb fek, yaam Roog kaa girid’u fek le Yakoob, boo a daaw o pamb ole.