Read NQAARIIT NE ROOG Mberaand 4 Bible Online

Mberaand 4 - NQAARIIT NE ROOG bible

Mberaand 4

¹Aadama a yoona fa Awa fee o teem, ta rok o fud, a ñoot a Kayin, soo a lay ee: «Sakaam o kiin no ndimle no Yaal oxe.»

²A dakooxa o rok o fud, soo a ñoot a Abel fee o ndeɓ Kayin. Abel a refa o kaynaak cegel, Kayin a ref o qooxoox.

³Cinj a saxad ale, Kayin a ɓoxotiida o Yaal oxe sadax no ke xooxe um a watna.

⁴Abel itam a faɗoortiida o Yaal oxe taaw ke moƴna o neer na ked ake ten. O Yaal oxe a jaɓa a Abel fo sadax um.

⁵Kaa koy, o Yaal oxe a xuuna a Kayin fa sadax um.[13] Ye Kayin a ga’na keene, a dalfooxa o fuux, a tagid um a hiɓoox.

⁶O Yaal oxe a laya a Kayin ee: «Xar taxu o fuux, a tagid of a hiɓoox neeke bo?

⁷O fosooxangaa paax, a tagid of a let, ndaa o fosooxangaa paaxeer koy, bakaad fee xey no don-maax of a ɓeedang, kaa rek, ba o ci’in o gom!»

⁸Kayin a laya a Abel fee o ndeɓ um ee: «Aca i ndet no qol!» Ye da ndefna no qol ole, Kayin a songa a Abel fee o ndeɓ um soo a warin.

⁹O Yaal oxe a laamta a Kayin ee: «Taa Abel fee o ndeɓ of?» A doonaan ee: «Kaam and! Kaam ref o kaynaak no ndeɓ es?»

¹⁰Maaga, o Yaal oxe a laya yee: «Xar fi’o? O wuuq ole no fo’oy le no ndeɓ of a jaaƥatilooxiida boo me mi.

¹¹Ndiiki koy, salooxee took lanq ke ƥuusna fo’oy le no ndeɓ of ɓaxoona.

¹²O xooxangaa, lanq ke cooxkirang ke da mbarna o mbat. Xan o ñaaƴaa joqooyooxaa took lanq ke.»

¹³Kayin a doona o Yaal oxe yee: «A qaw ale gadnaxamoona kaa meɗ lool na mi.

¹⁴Xaye woxey raxaxam lanq kene, xam ret maa goƭoonga, joqooyooxaa no lanq ke, soo oxuu xetna fa mi a waraam.»

¹⁵O Yaal oxe a layaan ee: «Oxuu warna a Kayin, xam rabdinoox took um boo a caf ɓetaa ƭaq.» Cinj kaaga, o Yaal oxe a fi’a o anddiloor took Kayin, ndax oxuu xetna fo ten warkiran.

¹⁶Kayin a inoora mbaambir no Yaal oxe, soo a genik no lanq kaa Nood ngaritna no batand naa Edeen.

¹⁷Kayin a yoona fo o teem. O tew oxe a roka o fud, a ñoot o ƥiy o ngoor a ne’in Henok. Kayin a sinja teeru, soo a ne’tin a Henok fee o ƥeem.

¹⁸Henok rimu a Irad, Irad a rim a Mehuya’el, Mehuya’el a rim a Metusayel, Metusayel a rim a Lemek.

¹⁹Lemek a gilga rew ɗik, o eetaand oxe Aada a ne’e, o ƭikandeer oxe a ne’el Sila.

²⁰Aada rimu a Yabal fee refna o taan no molaan we na ngayaa xa siir.

²¹Oxe reefna took Yabal refu Yubal fee o taan no fop we na nqilimbaa fo we na liitaa.

²²Sila rimu a Tubal-Kayin fee xawoogna xanjar fo celem. A jeg’a o cigeen o ne’e Naama.

²³Lemek a laya rew we ten ee: «Aada fa Sila nan-gilooxyo o ñuxur es, nuun rew we Lemek, ndungyo nof nuun na fa lay es. Kaam war o koor yaam ngaañ es, war o fes yaam uut es.

²⁴A bar ale Kayin a fi’na a ware o rabdinoox a caf ɓetaa ƭaq, soo Lemek a caf qarɓeen ɓetuu ƭik fo a caf ɓetaa ƭaq.»

²⁵Aadama a dakooxa o yoon fo o teem, o tew oxe a rok o fud, a ñoot o ƥiy o ngoor, soo a ne’in Set, a lay ee: «Yaam Roog a ci’axam o ƥiy o lakas ta rondand a Abel fee Kayin a warna.»

²⁶Set itam a rima o ƥiy o ngoor, soo a ne’in Enos. No kaa xotitna maaga, gon le no Yaal oxe a reefu a ƴufginooreel.