Read NQAARIIT NE ROOG Mberaand 40 Bible Online

Mberaand 40 - NQAARIIT NE ROOG bible

Mberaand 40

¹Yaa kaaga a faafna, bes oxe topatooxoogna a yer ale no maad oxe Misira fo xe juɗanoogna o maad oxe puuru, a tooña o maad oxe o yaal den.

²Firawon fee o maad Misira a fuuxan’a ƭomu oxe topatooxoogna a yer ale ten fo xe juɗanooguuna puuru,

³boo a ɓek a den na kaso faa me no aa-adax oxe na kaso fee Yoseef a weg’eena.

⁴O aa-adax oxe no yeeyetax we na kaso fee a doona a den na xa ƥay Yoseef, ta topatooxaa a den. A njeg’a maaga koy a pe a leng-leng.

⁵No yeng o leng, oxe topatooxoogna a yer ale no maad oxe fo xe juɗanooguuna puuru too a mbeg’el na kaso faa a ƭaaɗa den ɗik fop. Oxuu refna na den koy fogir’ee fo o kend um o ƭaaɗ.

⁶Yoseef a gara me den no nqes naa a ɗeetiid a den, soo a ga ee kaa ngooy.

⁷Maaga, a laamta jaajal we Firawon ndeeƭna fo ten na kaso faa no yaal mbind um, a lay a den ee: «Xar taxu a tagid ake nuun mbelee xaye?»

⁸A ndoonaan ee: «Kaa i ƭaaɗ, too o leng waagee o tektan a in xa ƭaaɗ axe.» Yoseef a laya a den ee: «Mee ndax Roog na tektaa o kiin o ƭaaɗ! Layaamo boog ke nu ƭaaɗna!»

⁹Oxe topatooxoogna a yer ale no maad oxe a wetandooxa a Yoseef o ƭaaɗ um ee: «Kaam ɗaaɗ ga ndaxar biiñ mbaambir es.

¹⁰Ndaxar ne koy a naaq a tadak a jeg’u. Ye ta saxna, a dalfooxa o fiɗ, too piɗ ke a mbi’a tuunq kaa njegna xa biiñ xa pooru.

¹¹A tokol ale Firawon fee koy no ɓay es a reeƭu. Ɗataam xa biiñ axe, nol a den kam a tokol ale soo cooxin a Firawon fee no ɓay um.»

¹²Yoseef a layaan ee: «Keeke o ƭaaɗ ole wo a tektu: A naaq a tadak ake ñaal tadik oo.

¹³Ndeer mene fo ñaal tadik, xan Firawon fee a xotatinong no calel of. Xan o cooxahin a Firawon fee a tokol ale no ɓay um, ne fi’tooganoona yaaga.

¹⁴Kaa rek, ngela o refatinangaa no ɗaay, fat o wetandooxaam, lalit o paaxel ndeer es fa wo. Fat o layanaam fo o paaxel mbaambir Firawon fee ndax um sutoox kaso fene,

¹⁵yaam kaam ɓistiidel no saax laa no Hebre waa took o hup doole, too meeke refuuma sax fi’iim dara kaa jarna o wegel.»

¹⁶Ye oxe juɗoogna puuru ke a ga’na yee a tekit ale Yoseef a fela no nof lool, a laya yee: «Mi de, kaam ɗaaɗ o roxondoox a cenjel a tadak puuru.

¹⁷Kam a cenjel ale falakna took koy, a jeg’a xa qos xa mayu xaa njuɗaneena a Firawon fee. Tiiƭ ke a ngara, a ñaamaa ke refna na cenjel ale falakna took xoox es.»

¹⁸Maaga, Yoseef a doonaan ee: «Keeke o ƭaaɗ ole wo a tektu: A cenjel a tadak ake ñaal tadik oo.

¹⁹Ndeer mene fo ñaal tadik xan Firawon fee a rokong o ƥaak, a lokong no ndaxar, too xan tiiƭ ke a ngar a ñaamaa cer of.»

²⁰No ñaal ndadkandeer naa, a jopir Firawon fee a roofandaa bes fee no rimel um, a fi’ana jaajal we ten fop a put, a xoyin oxe topatooxoogna a yer ale fo xe juɗoogna puuru ke mbaambir dag we ten.

²¹A dalnatina oxe topatooxoogna a yer ale ta refahin no ɓisiidaa o maad oxe a tokol ale, a cooxan o ten no ɓay um.

²²O lakas oxe mat, a roknaan o ƥaak no cok, ta lokel no ndaxar, ne Yoseef a tektit’uuna a den.

²³Oxe topatooxoogna a yer ale no maad oxe koy wetandoox’atee a Yoseef, ndaa a weec’aan.