Read NQAARIIT NE ROOG Mberaand 41 Bible Online

Mberaand 41 - NQAARIIT NE ROOG bible

Mberaand 41

¹Xa kiid xa ƭaq a cinj kaaga, Firawon fee a ɗaaɗa o geenoox paam o xuluɓ ole Niil.

²A ga’a naak ɓetuu ƭik kaa mosna bo da sutoor no xuluɓ ole, a suufaa na ƥeeraamb ale.

³Cinj kaaga, naak ɓetuu ƭik ŋaku a sutoora no xuluɓ ole, a mbod a cinj den na ƥeeraamb ale.

⁴A ŋak ake a ƈaxa naak kiñu ke. Cinj kaaga, Firawon fee a yokooxa.

⁵A ɗaanatina soo a ɗaaɗahin o ga xa yaƥ ɓetaa ƭaq axaa soɗna boo a may, soo a mos, a sax no kangaf o leng.

⁶Cinj kaaga, xa yaƥ ɓetaa ƭaq axaa nqeñ ne no batand a gaayinna, a sax a cinj den.

⁷Xa yaƥ xa kaayu xe a ƭuuda xa yaƥ xa mosu xe naangna tem. Maaga, Firawon fee a yokooxa, soo a ga ee kaa ɗaaɗoogu.

⁸No feet nqes olaa, a yiif ake Firawon fee a njaxasooxa, soo ta xoyin maɗag we fo yaal-o-and we Misira fop. A wetandooxa a den xa ƭaaɗ axe ten, ndaa o leng na den waag’iran o tekit xa ƭaaɗ axeene.

⁹Maaga, oxe topatooxoogna a yer ale no maad oxe a laya a Firawon fee yee: «Daali maad o yaal es, xam wetandooxong xaye tooñ ne mi faafna.

¹⁰Firawon fee kaa fuuxan’u dag we ten boo a wegnooraam me no aa-adax oxe na kaso fee, mi fo o aa-adax oxe no juujuɗ puuru ke.

¹¹Mi fo xaaga, i ƭaaɗa no yeng o leng kut. Oxuu refna o ƭaaɗ xoox um a jeg’u olaa mengoorna fo a tekit ale ta daaw’ina.

¹²A jeg’a fa in maaga koy o fes o Hebre laa refna o paɗ no aa-adax oxe no yeeyetax we. I mbetandoox’aan xa ƭaaɗ axe in, soo ta tekit a den. Oxuu refna ta tektin o ƭaaɗ um.

¹³Fop koy a jegit’a ne ta tektit’uuna a in: Firawon fee a nomtaxam no far es, soo a humnoor oxaana o ƥaak no cok, ta lokel no ndaxar.»

¹⁴Firawon fee a xoyna a Yoseef. Yoseef a ñofe o sut kaso faa, a ruusel, a rokanel toki, soo a ɓisiidel me Firawon fee.

¹⁵Firawon fee a laya a Yoseef ee: «Kaam ɗaaɗ, too o leng waagiraam o tektan o ƭaaɗ ole. Um yegnel koy ee waagaa o tekit o ƭaaɗ olaa wetandooxee’oona.»

¹⁶Yoseef a doona a Firawon fee yee: «Refee yee mi ndaa Roog fa xoox um na cooxkang a tekit ale jofooxoonga.»

¹⁷Maaga, Firawon fee a laya a Yoseef ee: «No ƭaaɗ ole mi kaam geenoox’u na ƥeeraamb ale no xuluɓ ole Niil.

¹⁸Naak ɓetuu ƭik kiñu kaa mosna bo a sutoora no xuluɓ ole, a suufaa na ƥeeraamb ale.

¹⁹Cinj kaaga, naak ɓetuu ƭik lakas a sutoora a cinj den, a nqoƈ, a ŋak too a mbariƴ o nga’el. Mosiim muk o ga naak ŋaktu naaga Misira boo Misira a xet.

²⁰Naak ŋaku ke a ƈaxa naak ɓetuu ƭik eetaand kiñu ke.

²¹A ƭuuda a den, too o ga’angaa a den ee ñaamee tus, ta nand ee kaa da moƴ o ŋak nen eetaand. Cinj kaaga, yokooxaam.

²²Ɗaaɗahinaam o ga keeke: Xa yaƥ ɓetaa ƭaq axaa maginna, a mos bo, soo a ndef no kangaf o leng kut.

²³Cinj kaaga, xa yaƥ ɓetaa ƭaq axaa ngaayna, a ŋoroɓoox yaam nqeñ ne no batand, a sax a cinj den.

²⁴Xa yaƥ xa kaayu xe a ƭuuda xa yaƥ xa mosu xe. Wetandooxaanum maɗag we, ndaa o leng na den waagiraam o lay ke keene a tekitna.»

²⁵Yoseef a laya a Firawon fee yee: «Xa ƭaaɗ axe Firawon fee leng kut a ndefu, a tekit tig leng ke itam. Roog kaa lalaa a Firawon fee ke ta fi’kaa.

²⁶Naak ɓetuu ƭik kiñu ke, xa kiid ɓetaa ƭaq oo, xa yaƥ ɓetaa ƭaq xa mosu xe, a ndef xa kiid ɓetaa ƭaq. O ƭaaɗ o leng kut ole yoo rek.

²⁷Naak ɓetuu ƭik ke mbodna a cinj eetaand ke kaa ndef xa kiid ɓetaa ƭaq, xa yaƥ ɓetaa ƭaq axe saqeerna tus, nqeñ ne no batand a gaayinna, xan a ndef xa kiid ɓetaa ƭaq biim.

²⁸Neene boog, ne laytanuuma, Roog kaa lalaa a Firawon fee ke ta fi’kaa.

²⁹Xa kiid ɓetaa ƭaq axe na ngaraa xan o jeg tigi a ref kam saax le Misira fop.

³⁰Xa kiid ɓetaa ƭaq biim na ndoonooxkaa teen, too xan o naat oleene fop a weecel kam saax le Misira, yaam xan biim le a gef saax le.

³¹Cinj kaaga, dara waagkataand o wetandoox no naat ole reeƭna kam saax le yaam biim le xan a ɗom tigi.

³²O nanangaa Firawon fee a ɗaaɗin boo a caf a ƭak, tige kaa ref kaa Roog a geenooxna no fi’in, too xan a fadnin ndiiki.

³³Ndiiki boog, fat Firawon fee a waaƭ o kiin o ƈiƴu xaa jegna yiif, a dalnin kam saax le Misira.

³⁴Fat Firawon fee a xalaat a paax soo a dalin jaajal kam saax le ndax da mbokataa a seek a ƥetkandeer ale no saxade le kam Misira, na xa kiid ɓetaa ƭaq xa paax axe.

³⁵Fat a mbokat ñoowir na xa kiid ɓetaa ƭaq xa paax axe na ngaraa. Fat Firawon fee a heblit ñoowir a yaxandooxel kam teeru ke soo ta yetooxeel.

³⁶Ñoowir keene xan a ngeekanel saax le, ta jagandanel xa kiid ɓetaa ƭaq biim axe na njegkaa kam saax le Misira, ndax biim le moocandkee saax le.»

³⁷Fa lay faaga a fela a Firawon fee fo dag we ten fop.

³⁸Firawon fee a laya a den ee: «Ndax i mbaaga o njeg o kiin o nandu fo xene oxaa jegitna nen o ten Yiif le Roog?»

³⁹Firawon fee a laya a Yoseef ee: «No kaa xotitna yaa Roog a andnooroonga keene fop, jegee o leng oxaa moƴoonga o ƴiƴ mbaat ta moƴong o jeg yiif.

⁴⁰Wo o mat na adooxankaa mbind es, too xeet es fop no kebil of a mbugko ñaaƴaa. Uum-maamaad le doŋ na garitkang took.»

⁴¹Firawon fee a laya a Yoseef ee: «Ga’i, ci’aaxoong sañ-sañ took saax le Misira fop.»

⁴²A wolta o heɗ o ñaasir no ɓay um, a rokanin a Yoseef no ɓay. A rokanaan ndoki njoor soo a humanin ceq wurus no cok um.

⁴³A ŋaaynaan na sareet a ƭikandeer ale ten, reefoogna a cinj um, soo da mbalalooxaa mbaambir um ee: «Abrek!»[79] Neene Firawon fee a cooxtun sañ-sañ took saax le Misira.

⁴⁴Firawon fee a layahina a Yoseef ee: «Mi refu Firawon fee! Kam saax le Misira boo saax le Misira a xet o leng yoɗkee teen o ɓay mbaat a caf a refangeerna wo ci’un o ten.»

⁴⁵Firawon fee a ne’a a Yoseef Safenat-Pane’ah[80], soo a ci’in a Asnat fee o ƥiy o ndew Potifera. Potifera feene reeƭu o saasadax na teeru faa On. No kaa xotitna maaga, Yoseef a waagata o ret muu refna kam Misira.

⁴⁶Yoseef koy, xa kiid qarɓeen tadik a jeg’u ye ta retaa maa Firawon fee o maad Misira. A inoora me Firawon soo a wid saax le Misira fop.

⁴⁷Na xa kiid ɓetaa ƭaq xa paax axe we no saax le a njala tigi.

⁴⁸Yoseef a fokata ñoowir na xa kiid ɓetaa ƭaq axeene kam Misira. A fi’a ñoowir ke kam teeru ke. Na teeru fuu refna ta fi teen ñoowir ke na xa qol axe mbiduuna.

⁴⁹Yoseef a fokata bele boo bele yeree foofi. Ke ta fokat’ina kaa may’u boo waag’aand o lim yaam ta mayood.

⁵⁰Ye o hiid o feraand ole no biim le a garna koy, yaaga Yoseef a jeg’a xa ƥiy xa koor xa ƭaq fa Asnat fee o ƥiy o ndew Potifera refna o saasadax On.

⁵¹Yoseef a ne’a taaw fee ten Manaase[81] yaam ee Roog a weecnooraxam coono ke mi fop fo mbind faap es fop.

⁵²A ne’a o ƭikandeer oxe Efrayim[82] yaam ee Roog a mayƭandaxam kam saax le jegit’uuma naqad.

⁵³Xa kiid ɓetaa ƭaq xa naatu xe njeg’ina kam saax laa Misira a muukoox’a,

⁵⁴soo xa kiid ɓetaa ƭaq biim axe a ngar ne Yoseef a layit’uuna. Biim a jeg’a na saax ake fop, ndaa kam saax le Misira o mat ñoowir ñak’ee maaga.

⁵⁵Ye saax le Misira fop a nqeexeena boo a loolooxiid me Firawon fee, ndax da njeg ñaamel, oxeene a laya a den ee: «Ndetyo maa Yoseef, too fat nu mbi ke ta laykaa a nuun.»

⁵⁶Biim le a roka kam saax le fop. Yoseef a weta tap ke ten, soo a jikooxaa Miimisira we bele. Biim le kaa moƴ’u moƴ o ɗomaa kam saax le Misira.

⁵⁷Wiin we kaa inooroogu muu refna na saax ake, a njikiidaa bele me Yoseef, yaam biim le kaa ɗom’atu tigi na saax ake fop.