Read NQAARIIT NE ROOG Mberaand 43 Bible Online

Mberaand 43 - NQAARIIT NE ROOG bible

Mberaand 43

¹Biim le kaa moƴ’u moƴ o ɗomaa no saax le.

²Yaa da paangna bele fee da ƥistiid’ina Misira, Yakoob a laya xa ƥeem ee: «Nomtooxyo ƥaat o njikik kaa i ñoowitna.»

³Yudaa a layaan ee: «O koor oxaaga a maƭoox’a a in a paax ee: I nga’kee mukit um a refangee kaa o ndeɓ onqe in a yoon fa in.

⁴A soƥangaa koy ee jaɓaano o xaƴ ta yoon fa in, xan i ndet njikaniidong ñoowir.

⁵O jaɓangiran o xaƴ koy, i ndetkee, yaam o koor oxaa kañ a laya a in ee: ‹Nu nga’kee mukit es a refangee kaa o ndeɓ onqe nuun a yooniid fa nuun.› »

⁶Maaga, Isra’el a laya yee: «Nuun kañ nu tooñaxam, yaam andiim ke taxna nu lay o koor oxaaga yee nu njegahina o ndeɓ?»

⁷A ndoonaan ee: «O koor oxaaga kaa laamit a in kaa farna na in fo no ƥasil in ee: ‹Ndax faap nuun oxey a ñoowaa boo ndiik? Ndax nu njega o ndeɓ?› Maaga, i njaaɓa laamit keene. Ndax i mbaag’a o and ee xan a lay a in ee fat i ƥisiid o ndeɓ in?»

⁸Yudaa a laya a Isra’el fee faap um ee: «Xaƴi o goor ole ta yoon fa mi. Xan i inoox ndet, neene i nqonkee, wo fo xa ƥiy in fa in fa qoox in.

⁹Mi fa xoox es na gadooxkan, too um nomtiidangirang o ten fat o seraam o ten.

¹⁰Kaa jolna keene, boo i ñaal’aandeena neeke soƥkooga i njeg a caf a ƭak Misira boo ngat.»

¹¹Isra’el fee faap den a laya a den ee: «Feek neene yoo de, neeke nu mbi’kaa: Ƥisanyo o koor oxaaga ɗang no tikoorik ke nuun, ƥisloox teen no paax ke no saax le, teex ƭuumooxel, suum, qeeñe-xeeñe, miir, xa pistaas fo xa tim amaand.

¹²Ƥisyo xaaliis faa hupna fee nu ƥis’ina, too ba nu mbeec o ƥisloox xaaliis fee nomtiideena na xa saaku xe nuun. A waaga o ref ee o njuumte a reeƭu.

¹³Nqotyo o ndeɓ onqe nuun, nu inoox ndet maa no koor oxaaga.

¹⁴Yaasam Roog o Cegu katil oxe a fi boo o koor oxeene a jeg o liir na nuun, soo a xaƴ o pog faap oxe nuun fa Bensame da nomtooxiid fa nuun! Mi o mat, a soƥangaa yee kaam war o xaajel fo xa ƥees, fat um xaajel fa den.»

¹⁵A nqota ci’it ke, a nqot xaaliis faa hupna fee da ƥis’ina, soo Bensame a yoon fa den. A inooxa, a ndet Misira, a taar maa Yoseef.

¹⁶Ye Yoseef a ga’na a Bensame a yooniid fa den, a dalfooxa o lay a jawdiin fee ten ee: «Ɓisi wiin weeke no mbind es. Fat o war njegel, jawin, yaam wiin wene fa mi a mbogkaa o roon xaye.»

¹⁷O koor oxaa a fi’a ke Yoseef a lay’uuna, a ɓis goor waa no mbind Yoseef.

¹⁸Ye da ƥiseel no mbind Yoseef, diid a dama a den, da layaa yee: «Xaaliis fee nomit’eena na xa saaku xe in no jaf eetaand le taxu i ƥiseel. Kaa mbug o ndal took in, a njaɓ xa paam axe, soo a mbi a in faɗ.»

¹⁹A matiida a jawdiin fee no mbind Yoseef, a laytin na carind ale no mbind ne yee:

²⁰«Yaal mbind, waasani a in ngela! Andaa yee i ngar’a jaf eetaand njikiid kaa i ñoowitna.

²¹Cinj kaaga, ye i mbadiidna no mbiñ onqe i mbe’na, i mbokta xa saaku xe in, soo oxuu refna a soƥ xaaliis um no don ole no saaku le, ta ref a ref podne xaaliis fee in a reeƭna. I ƥislooxiidaan koy.

²²I ƥisiida itam xaaliis fa lakas, faa i njikitna ñoowir. I andee koy oxe nomit’ina xaaliis fee in na xa saaku xe.»

²³Jawdiin fee a doona a den ee: «Baa keene a jaaxɗand a nuun too ba nu saɗar! Roog fee nuun, refna ref Roog fee faap nuun ci’u a nuun xaaliis na xa saaku xe nuun. Xaaliis nuun kañ, daawaanum.» Cinj kaaga, a sutaniida a den a Simewon.

²⁴O koor oxaaga i ɓisa a den no mbind Yoseef, a xafan a den foofi da ƥog a caf den, soo ta yipan xa paam axe den fo gooñ.

²⁵A njaganda ci’it den, a cungaa Yoseef a fudooxiid waxtu a put, yaam a nan’ayo yee maaga a mbutoorkaa.

²⁶Yaa Yoseef a gatna no mbind naa rek, a ƥoxotaan ci’it ke da saq’ina, soo a ngung a lanq mbaambir um.

²⁷Yoseef a laamta a den o wod-fo-ɓaal den, a lay a den ee: «Faap nuun fa nogoyu fee nu ne’oogaxama o mat, mbaa jam soom a jegu? Mbaa oxey a maadaa?»

²⁸A ndoonaan ee: «Faap in fee o tag of jam soom a jegu kañ. Oxaay jon maa ta refna.» A ngooknooxahina, a ngung a lanq.

²⁹Yoseef a yoɗa a kid um, too ye ta ga’na a Bensame fee ta fogitna a yaay, a laya yee: «Ndax oxene refu o ndeɓ nuun onqe nu ne’oogaxama?» A ɓaata teen ee: «O ƥees, yaasam Roog a lalong o paaxel!»

³⁰Cer um a naaga dayum yaam o ndeɓ um, xa lool a ndamin. A ñofa o rokik na ndok, soo a ref na xa lool.

³¹A cinj ye ta muktooxna, a saƭakinooxa, a sutooxiid, soo a lay ee: «Ndiƈiidyo a put ale!»

³²A roxane ten fa xoox um, fog faap um a ndoxanel, soo Miimisira we ñaamtoogna no mbind um itam a ndoxanel. Miimisira we mbaag’ee o ñaam fo Hebre we yaam keene kaa reeƭu na den nqoolaƭar.

³³Fog faap we Yoseef a moofne a reefandel no ne da maagatiritna, a xotit no maak oxe boo no xe moƴna ref o ndeɓ, soo da mbadir a kid yaam a njaaxiɗ.

³⁴Yoseef a diƈana a den no ke ta naqan’eena, Bensame o mat a diƈanaan kaa fodna nen a las ake no lakas we boo a caf a ƥetak. Den fop a yera biiñ boo a naang nep.