Read NQAARIIT NE ROOG Mberaand 44 Bible Online

Mberaand 44 - NQAARIIT NE ROOG bible

Mberaand 44

¹Yoseef a hebla a jawdiin fee no mbind um ee: «Soɗi xa saaku xe no wiin weene ñoowir boo podnaa da mbaagna o yip, soo o fi xaaliis fee no xuu refna no don ole no saaku um.

²Fat o ɓek itam a tokol ale mi refna xaaliis fa ƥor no don ole no saaku le no xe moƴna o ref o ndeɓ fa xaaliis fee ta jiktiidna bele.» Jawdiin fee a fi’a ke Yoseef a hebil’uuna.

³No feet nqes olaa yaa njeeƈ ne a wooñaa rek, goor waa a nqaƴe a ndet fo xa paam den.

⁴A sutooxa teeru faa, ndaa ngoƭ’afulee dara. Yoseef a laya jawdiin fee ten ee: «Ƴufi daab goor waa, lay a den ee: ‹Xar taxu a pi a paax nu ndabditan paaxeer?

⁵Mee ndax na tokol ale o yaal mbind es a yertaa too teen a ɗeetnoortaa! Nu mbi’a paaxeer ye nu mbesoorna neene.› »

⁶Jawdiin fee a daaba a den, soo a jangtoox a den a ƭelem akaaga.

⁷A ndoonaan ee: «Xar taxu o layaa a in keene? Ndax in we dag of i saɗa o mbi nandu neene?

⁸I nomtitiida no saax laa Kanaan xaaliis fee i soƥ’ina na xa ton axe na xa saaku xe in. Nam boog i saɗu o nguuɗit xaaliis mbaat wurus kam mbind no yaal of?

⁹Fat oxe o ga’itkan no faɗ we wo a warel, soo in fa qoox in sax i ndefik faɗ no yaal in!»

¹⁰Jawdiin fee a doona a den ee: «Fat a jegit ne nu laytuuna! Oxe um ga’itkan, xan a refik o paɗ es, soo nuun o mat nu nqool teen qac.»

¹¹Oxuu refna na den a ñofa o fudin o saaku um a lanq, soo a woktin.

¹²Jawdiin fee a joktooxa, a eetit no maak oxe, a gar no xe moƴna o ref o ndeɓ. A tokol ale a soƥe no saaku le Bensame.

¹³A mbaara toki den, oxuu refna a sufatin o faam um, da nomtooxiid na teeru fee.

¹⁴Yudaa fo fog faap we ten a nomtooxiida no mbind Yoseef. Yoseef koy, maaga a maad’u, too a ngunga a lanq mbaambir um.

¹⁵Yoseef a laamta a den ee: «Xar nu mbi’u? Ndax kaa nu and’ee yee o koor o nandu nen a mi a wara o waag ƭeet?»

¹⁶Yudaa a doonaan ee: «Xar um laykaa o yaal es? Nam um layitkaa? Nam i nqoolitkaa? Roog a ga’a tooñ no dag we wo, in wey koy ndefat faɗ no yaal in, in fo xe a tokol ale a ga’teena fop.»

¹⁷Maaga, Yoseef a laya yee: «Fesoorkiim neene! O koor oxe a tokol ale a ga’teena na refkaa o paɗ es. Nuun o mat, nqaadyo na jam maa faap nuun.»

¹⁸Maaga, Yudaa a matiidaan, a layin ee: «Ngela yirmaam o yaal es! Ci’aam rek mi fee o tag of um lay fa wo too baa fuux of a biltooxanaam yaam kaa o nand fa Firawon fee!

¹⁹O yaal es, kaa o laamit’u dag we wo yee: ‹Ndax faap nuun oxe maad o ñoowaa mbaat o pog nuun?›

²⁰I ndoonaang, wo fee o yaal in ee: ‹I njega a faap fa nogoyu fo o ndeɓ onqaa ta jegna no nogoy um. O maag no xaaga koy kaa xon, ta refat boog koƭong na ya um too faap um kaa fexin bo.›

²¹Wo fee o yaal in layaa a in ee: ‹Ƥisiidaamoo o ten boo um ga’oodin.›

²²I ndoonaang ee: ‹O goor olaa waagee o goƭ a faap um mbaat a goƭangaan rek xan o koor oxe a xon.›

²³Layaa dag of ee: ‹Boo o ndeɓ nuun onqe a yooniideerna fa nuun, nu nga’katee mukit es.›

²⁴Ye i nomtooxna maa faap in fee o tag of, i njangtooxaan a ƭelem ake no yaal in.

²⁵Faap in a lay’a yee: ‹Nomtooxyo njikanik a in kaa i ñoowitna.›

²⁶I ndoonaan ee: ‹I mbaagee o nomtoox kat. A soƥangaa koy ee xan o ndeɓ onqe in a yoon fa in, yaaga xan i ndet, yaam i mbaagkee o njasnoor fo koor oxaaga a refangee kaa o ndeɓ onqe in a yoon fa in.›

²⁷Faap in fee o tag of a laya a in ee: ‹Nu anda yee o tees xa ƥiy xa koor xa ƭaq a rimanaxam.

²⁸O leng oxe koy, a inoora no mbind es, too ga’na rek kaa listel, yaam boo xaye mosatinum o ga.

²⁹Nu njangahinangaa oxene, taamaala a dalin, a woora yee naqad um ɓiskaa jaaniif.›

³⁰Ndiiki koy, um nomtooxangaa maa faap es fee o tag of too o goor ole yoonee fa in fo ne faap in a fextuuna,

³¹xan a xon yaa ta ga’na yee o goor ole gatee. Yaaga, in we dag of xan i tax faap in fee o tag of a ɓis naqad tigi jaaniif.

³²Kaa jolna keene, mi fee o tag of, mi gadooxu o goor ole ye layuuma a faap es ee: Um nomtiidangirang o goor ole, mi na tooñkang boo a paam Roog.

³³Ndiiki koy, kaam xeɗang, fat mi fee o tag of um yoq na seek ale no goor ole, refik o paɗ of, soo o goor ole a yoon fo fog faap we ten, a xaad.

³⁴Andiim nam um nomtooritkaa maa faap es o goor ole a yoonangee fa mi? Ey! Yaasam ba um ga o njakad onqe na dalkaa a faap es yaaga!»