Read NQAARIIT NE ROOG Mberaand 45 Bible Online

Mberaand 45 - NQAARIIT NE ROOG bible

Mberaand 45

¹Yoseef waag’atee o dam a xoox um mbaambir fop we ndeeƭna no mbind um. A falalooxa yee fat we ndefna no mbind um fop a sutoox tafil! O leng boog reeƭatee fa Yoseef ye ta feeñlaa fog faap we ten oxe ta refna.

²A dalfooxa o faɗoox boo Miimisira we a nanan, mbind no maad ne Firawon fee a yegin itam.

³Yoseef a laya fog faap we ten ee: «Mi yoo, mi Yoseef! Ndax faap es oxey maad o ñoowaa?» Kaa koy, fog faap we ten mbaag’iran o ndoon yaam a njaaxiɗ ne da njasnoor’ina fo ten.

⁴Yoseef a layahina fog faap we ten ee: «Ngela matiidaamoo!» Maaga, a matiidaan. A laya a den ee: «Mi yoo, mi Yoseef fee nu njikoox’ina, ndax um ɓisel Misira.

⁵Ndiiki koy, ba nu njaq too ba nu njeg naa ɗomna a nuun yaam ne nu njikooxaxama boo um ɓisiidel mene. Roog kaa ɓisiidaam mene ndax um mucil a nuun.

⁶Nga’angyo, xa kiid xa ƭaq axey axaa biim a refna no saax le, too a yoqahina xa kiid xa ƥetaq axaa andoona yee a qooq jegkee, ne’atiim a saxad.

⁷Roog kaa ɓisiidaam mene ndax um maadnoor a nuun kam saax le, mucil a nuun na pexey a bat a maak.

⁸Refee boog ee nuun ƥisiidaxam mene, ndaa Roog fa xoox um sax oo. A dalnaxam um refat ‹faap› Firawon fee, kelfa no mbind um fop fo gofornoor no saax le Misira fop.

⁹Ñofyo o nomtoox maa faap es nu layin ee: ‹Yoseef fee o ƥeef kaa tee: Roog a dalnaxam um refat gofornoor kam Misira. Ñofi gariid me mi.

¹⁰Xan o genik no jegel olaa Goseen ndax o mataam, wo fo xa ƥeef fo xa taan of, a ked ake fo xa siir axe fo fop ke jegoona.

¹¹Maaga, xam cooxong fop ke soxla’oona yaam a maada o yoqaa xa kiid xa ƥetaq biim. Neene, ñakkiro dara, wo fo ƥasil of fo fop ke jegoona.›

¹²Nu nga’ooda too Bensame fee o ndeɓ es a ga’ooda yee mi o mat na layaa fa nuun.

¹³Fat nu njangtoox a faap es o ndam onqe mi kam Misira fop fo ke nu nga’na, too fat nu ñof o ƥisiid a faap es meeke.»

¹⁴A farakooxa a Bensame, soo a lool. Bensame itam a farakooxaan, a lool.

¹⁵A foona fog faap we ten fop fo xa lool. Cinj kaaga, fog faap we ten a njega fo ten nga’ir.

¹⁶We no mbind no maad ne a yega yee fog faap we Yoseef a ngara Misira. Kaaga a fela a Firawon fee fo dag we ten.

¹⁷Firawon fee a laya a Yoseef ee: «Layi fog faap we wo da suf cegel ke den soo a nomtooxkaa no saax laa Kanaan.

¹⁸Nqotyo a faap nuun fo ƥasil nuun, soo nu ngar, mataam. Xam ci a nuun ke moƴna o faax no saax le Misira, too xan nu ñaam ke moƴna o faax no saax le.

¹⁹Fat o hebil a den keeke: Nqotityo Misira a sareet akaa nu ƥistiidna xa ƥiy axe nuun fo rew we nuun. Fat faap nuun a ŋaaynel teen, a gar.

²⁰Kuu nu nqaƴna maaga, ba nu ndicooxin, yaam ke moƴna o faax no saax le Misira, nuun na njegkan.»

²¹Xa ƥiy axe Isra’el a mbi’a naaga. Yoseef a cooxa a den a sareet ne Firawon fee a heblit’uuna. A cooxa a den itam kaa da yaxandooxanna a ƭat ale.

²²Den fop, a cooxa a den toki ñaaƴir, a coox a Bensame xa monjong teemeed tadik xaaliis fo toki ñaaƴir ƥetik.

²³Keeke a lulit’u a faap um: koŋka xarɓaxay kaa sufna no ke moƴna o faax kam Misira, xa paam xa tew xarɓaxay axaa sufna bele fo puuru fo ñoowir kaa ta jagandanna a faap um yaam a ƭat ale.

²⁴Cinj kaaga, a xaƴa fog faap we ten da ndet. A maƭooxa a den ee baa nqasir na ƭat ale.

²⁵Ye da inoorna Misira, a mbadiida Kanaan me Yakoob fee faap den.

²⁶A layaan ee: «Yoseef oxe maad o ñoowaa, too sax ten refu gofornoor no saax laa Misira fop.» Kaa koy, kaaga yo’in’ee a Yakoob, yaam gim’ee ke da layoogna.

²⁷A njangtooxaan fop ke Yoseef a lay’ina a den. Yakoob a ga’a a sareet ake Yoseef a hebliid’ina yaam a ñaaƈ ale. Maaga, yiif um a soga o nomtooxiid no ten, ndigil ne a feednooxin.

²⁸Yakoob a laya yee: «A faaxa! Yoseef fee o ƥees a maada o ñoowaa! Xam ret boo ga’ood kañ boo heluuma o xonaa!»