Read NQAARIIT NE ROOG Mberaand 46 Bible Online

Mberaand 46 - NQAARIIT NE ROOG bible

Mberaand 46

¹Isra’el a xota a ƭat, ten fo ke ta jegna fop. A fadiida Beer-Seeba, soo a ɓoxot a Roog fee na faap um Isaak sadax.

²No yeng olaaga, Roog a laya fa Yakoob no ƭaaɗ ee: «Yakoob! Yakoob!» A doonaan ee: «Oow! Mexey!»

³Roog a layaan ee: «Mi refu Roog, Roog fee na faap of, ba o saɗar o ret Misira, yaam maaga um fi’itkang o refat xeet fa maak.

⁴Xam yoon fa wo Misira, too mi na nomtitiidkang maaga, too Yoseef fa xoox um o mat na ɗaapkaa a kid of.»

⁵Yakoob a inoora Beer-Seeba, xa ƥeem a ƥisin, ten fo xa ƥiy axe den fo rew we den, na sareet ake Firawon fee a lulit’uuna, ndax ta jiriiñoor a den na ñaaƈ ale ten.

⁶A ƥis’a itam xa siir axe den fo kalal ke da njegit’ina no saax laa Kanaan. Neene Yakoob fo ƥasil um fop a ndettu Misira.

⁷A yoona fo xa ƥiy xa koor fo xa tew axe ten, xa taan axe ten fop, goor fo rew.

⁸Keeke koy ndefu a kon ake na xa ƥiy axe Isra’el ngarna Misira, ndefna ndef Isra’el, xa ƥiy axe ten fo xa taan axe ten: Taaw fee Yakoob refu Ruben.

⁹Xa ƥiy axe Ruben ndefu: Henok, Palu, Hesron fa Karmi.

¹⁰Xa ƥiy axe Simewon ndefu: Yemu’el, Yamin, Ohad, Yakin, Soxar fa Sawul fee ta jeg’ina fo tew o Kaakanaan oxe.

¹¹Xa ƥiy axe Lewi ndefu: Geerson, Kehat fa Merari.

¹²Xa ƥiy axe Yudaa ndefu: Eer, Onan, Seelax, Peres fa Serax. Eer fa Onan koy ñakit’u no saax laa Kanaan. Xa ƥiy axe Peres ndefu: Hesron fa Xamul.

¹³Xa ƥiy axe Isakaar ndefu: Toola, Puuwa, Yob fa Simron.

¹⁴Xa ƥiy axe Sabulon ndefu: Sered, Elon fa Yaaleel.

¹⁵Weene ndefu xa ƥiy axe Leya a jegna fa Yakoob kam Padan-Araam, fogreerna fa Dinaa fee o cigeen den. Xa taan um fop oo fop, goor oo rew oo, a ndeeƭa wiin qarɓeen tadik fo wiin daduk.

¹⁶Xa ƥiy axe Gaad ndefu: Sifyon, Hagi, Suni, Esbon, Eri, Arodi fa Areli.

¹⁷Xa ƥiy axe Aseer ndefu: Yimna, Yiswa, Yiswi, Beriya fa Sera fee o cigeen den. Xa ƥiy axe Beriya ndefu: Heber fa Malki’el.

¹⁸Weene ndefu xa taan axe Yakoob fa Silpa fee Laban a coox’ina a Leya fee o ƥeem ta refik o ceefeer um. A ndeeƭa fop oo fop wiin xarɓaxay fo wiin ɓetuu fa leng.

¹⁹Xa ƥiy axe Rakel fee o tew Yakoob ndefu Yoseef fa Bensame.

²⁰Yoseef a rimta fa Asnat kam Misira a Manaase fa Efrayim. Asnat koy o ƥiy Potifera fee reeƭna o saasadax na teeru faa On a reeƭu.

²¹Xa ƥiy axe Bensame ndefu: Bela, Beker, Asbel, Gera, Naaman, Ehi, Roos, Mupiim, Hupiim fa Ardi.

²²Weene ndefu xa taan axe Rakel fa Yakoob. A ndeeƭa fop oo fop wiin xarɓaxay fo wiin nahuk.

²³O ƥiy onqe Dan refu Husiim.

²⁴Xa ƥiy axe Neftali ndefu: Yaseel, Guni, Yeceer fa Sileem.

²⁵Weene mat ndefu xa taan axe Yakoob fa Bilha fee Laban a coox’ina a Rakel fee o ƥeem ta refik o ceefeer um. A ndeeƭa fop oo fop wiin ɓetuu ɗik.

²⁶Wiin we yoon’ina fa Yakoob Misira too a mbaqaqoor’u no ten a ndeeƭa fop oo fop wiin qarɓeen ɓetuu fa leng fo wiin ɓetuu fa leng. Rew we na xa ƥiy axe Yakoob limit’aand.

²⁷Xa ƥiy xa ƭaq axe Yoseef ndimteena Misira a limtange, ƥasil ne Yakoob ngar’ina Misira fop oo fop a ndeeƭa wiin qarɓeen ɓetuu ƭik.

²⁸Yakoob a lula a Yudaa ta adookin maa Yoseef, ndax oxeene a xetik fo ten no jegel olaa Goseen.

²⁹Yoseef a humna a sareet ale ten, a waaƭooxanik a Goseen, a xetik fa Isra’el fee faap um. Yaa ta ga’uuna rek, a farakooxaan no cok, a lool miñu no cok ole faap um.

³⁰Isra’el a laya a Yoseef ee: «Ndiiki koy waagataam o xon na jam feek ga’aam mukit of too woxey maad o ñoowaa.»

³¹Yoseef a laya fog faap we ten fo ƥasil ne faap um ee: «Mexe retaa lay a Firawon fee yee fog faap we mi fo ƥasil ne faap es ndeeƭna no saax le Kanaan a ngariida me mi.

³²Xam layin itam ee wiin weene gaynaak a ndefu, waa na yaraa cegel. A ƥisiida a ked ake den fo xa siir axe den fo fop ke da njegna.

³³Yaa Firawon fee a xoykaa a nuun, a laamit a nuun ee: ‹Xar refu calel nuun?›

³⁴fat nu ndoonin ee: ‹In we dag of, gaynaak waa na yaraa cegel i ndefu no kaa xotitna no ndeƥandoong in boo fa ndiik, ne daan in a ndefit’uuna.› Neene, xan nu mbaag o ngen no jegel ole Goseen, yaam Miimisira we kaa sib gaynaak cegel we.»