Read NQAARIIT NE ROOG Mberaand 47 Bible Online

Mberaand 47 - NQAARIIT NE ROOG bible

Mberaand 47

¹Yoseef a reta a yegin a Firawon fee yee: «Fog faap we mi fa faap es a inoora no saax le Kanaan a ngar me mi, a ƥislooxiid a ked ake fo xa siir axe den fo fop ke da njegna. Owaay no jegel olaa Goseen.»

²Ye ta retaa maa Firawon fee koy, Yoseef a yoon’a fo ɓetuk no fog faap we ten, too a lala a den a Firawon fee.

³Firawon fee a laamta fog faap we Yoseef ee: «Xar refu calel nuun?» A ndoonaan ee: «In we dag of, gaynaak a ked i ndefu nen daan in.»

⁴A layahina a Firawon fee yee: «Kaa i ngar nen xa kataakoon no saax le, yaam cegel ke no dag of njegatee sen maa da suufna, biim le kaa ɗom lool no saax laa Kanaan. Ngela ci’i dag of da ngenik no jegel olaa Goseen.»

⁵Firawon fee a laya a Yoseef ee: «Fog faap we wo fa faap of a ngara me wo kat,

⁶saax le Misira yoo xeene, dalni a faap of fo fog faap we wo no mbiñ onqe moƴna o faax no saax le. Fat a ngen boog no jegel olaa Goseen, too a soƥangaa yee a jega na den waa mbaagna o saq xa siir axe mi, dalni a den da saqin.»

⁷Yoseef a ɓisiida a Yakoob fee faap um ndax ta simnir fa Firawon fee. Yakoob a barke’a a Firawon fee.

⁸Firawon fee a laamta a Yakoob ee: «Xa kiid xa podnum jego?»

⁹Yakoob a doonaan ee: «Ñoowaam xa kiid teemeed fo xa kiid qarɓeen tadik no molaan. Xa kiid axe mi mayee dara too a mbeƭar, ndaawee ke daan es a ñoowna no molaan.»

¹⁰Yakoob a barke’ahina a Firawon fee, soo a asoor fo ten.

¹¹Yoseef a dalna a faap um fo fog faap we ten, a coox a den lanq kam saax le Misira no mbiñ onqe moƴ’ina o faax no saax le, no jegel olaa Ramses ne Firawon fee a heblit’uuna.

¹²Yoseef a cooxa a faap um fo fog faap we ten fo ƥasil den fop ñoowir, a reefandin no ne a qoox ake den a mbodna.

¹³Ñaamel leng njeg’atee kam saax le boo saax le a xet, yaam biim le kaa ɗom’atu. We no saax le Misira fo we no saax le Kanaan kaa saŋkooxoogatu yaam biim le.

¹⁴Yoseef a fokata qaaliis ke ndeeƭna kam saax le Misira fop fo kam saax le Kanaan fop, a softin bele fee da njikoogna. A ɓisa xaaliis fee no mbind Firawon fee.

¹⁵Yaa xaaliis fee no saax le Misira fo no saax le Kanaan a fagna fop, Miimisira we fop a soƥiida a Yoseef, a layin ee: «Cooxi a in ñaamel! Ndax kaa i nqonkaa na kid of yaam ne xaaliis a jegateerna?»

¹⁶Yoseef a doona a den ee: «Cooxaamoo xa siir axe nuun, um coox a nuun ñaamel, feek xaaliis jegatee.»

¹⁷A ƥisiidooga boog a Yoseef na xa siir axe den, ta cooxaa a den ñaamel kaa ta softaa cegel ke den, pis ke, a ked ake, xa siir axe fo xa paam axe, neene a cooxooga a den ñaamel o hiid olaaga fop, a softan cegel ke.

¹⁸Yaa o hiid olaaga a faafna, no hiid olaa took um a soƥiidahina a Yoseef, a layin ee: «O yaal in, a xoolaang ee xaaliis jegatee, xa siir axe in wo jegatu a den, too i yoqɗatee dara boog kaa i cooxoonga a refangee cer in fo lanq in.

¹⁹Ndax kaa i nqonkaa na kid of, soo lanq in njegankatee a in o njiriiñ? Jiki a in, in fo lanq in, coox a in ñaamel, i ndefik faɗ Firawon fee, in fo lanq in. Cooxi a in kaa i nduufna, ndax i nqonkee too lanq in mbeskee a pec.»

²⁰Yoseef a jikana a Firawon fee lanq ke Misira fop. Miimisira we a njikooxaan xa qol axe den, yaam biim le a ɗom’atu na den. Saax le a reeƭata o jeg Firawon fee.

²¹Yoseef a sekta xeet fee, da ndet no teeru ke, xotitna no cat leng boo no cat lakas no saax le.

²²Kaa koy, jik’ee lanq ke no saasadax we, yaam kaa jeg’u kebil inooru na Firawon fee, too ke Firawon fee a cooxoogna a den a ñoowtoogu. Ten taxu boo saasadax we njikoox’ee lanq den.

²³Yoseef a laya xeet faa yee: «Xaye, jikaam a nuun, nuun fo lanq nuun, boo Firawon fee jegatu a nuun. Ndiiki, ax ke wey, nu mbaaga o nduuf lanq ke.

²⁴Boo a saxad alaa a fadna na jam koy, fat nu coox a Firawon fee a seek a ƥetkandeer ale, soo njang a seek a nahak a lakas ake, ndax nu nduuf teen xa qol axe soo ñoowaa teen, nuun fo pind nuun fo xa ƥiy nuun.»

²⁵A ndoonaan ee: «Muclaa a in feek i ndaawa yirmande of, wo fee o yaal in, too i njaɓa o ndefik faɗ Firawon fee.»

²⁶Yoseef a dalna kaaga nen wargal faa na maadaa boo xaye no lanq ke Misira. A seek a ƥetkandeer aluu refna, Firawon fee na jegkan. Lanq ke no saasadax we soom Firawon fee a jeg’eeru.

²⁷Isra’el fo ƥasil um a ngen’a kam Misira no jegel olaa Goseen. A mbaaƭa maaga halal, a ndimatir boo a mayat lool.

²⁸Yakoob a ñoowa xa kiid xarɓaxay fo xa kiid ɓetaa ƭaq kam saax le Misira. A ñoowa fop oo fop xa kiid teemeed fo xa kiid qarɓeen nahik fo xa kiid ɓetaa ƭaq.

²⁹Ye ta andna yee ndiiki ta dab daan um, a xoya a Yoseef fee o ƥeem, a layin ee: «A soƥangaa yee daawaam yirmande of, dooni o ɓay of ɗuga a ñaal[83] es too o fesoor fa mi o paaxel tigi. Ke um xeɗang refu yee: Ba o gasaam kam Misira.

³⁰Yaa um dabkaa daan es, fat o sutit o dal ole mi Misira, gaskaam maa no daan es.» Yoseef a doonaan ee: «Xam fi’anong ke layoona.»

³¹Yakoob a layaan ee: «Daaɓooxeen!» Maaga, Yoseef a daaɓooxaan. Isra’el a gunga na caf njong um.