Read NQAARIIT NE ROOG Mberaand 49 Bible Online

Mberaand 49 - NQAARIIT NE ROOG bible

Mberaand 49

¹Yakoob a xoya xa ƥeem, a lay a den ee: «Mbokatooryo, um lay a nuun ke na xewkaa na nuun taa paam.

²Xa ƥiy Yakoob, ndungyo nof nuun, kaam ee nan-gilooxyo a Isra’el fee faap nuun.

³Ruben wo fee taaw es, wo fee jeguuma ye um refaa na doole es, wo fee hupna xa teɓ of sañ-sañ,

⁴wo fee na jiqtooxaa nen foofi, refatiro oxe moƴna jeg o njiriiñ, yaam kaa o wondoox no njong faap of, xoolaƭarandin.

⁵Simewon fa Lewi koy mbaagu yoon, o ngir den kaa yedin.

⁶Fogkiim no ngir den, koo yaasam baa yiif es a fog no nqel den. Kam fuux den a mbara goor, a ƭeg xa tod axe no qoox ke yaam ta fel a den soom.

⁷Fuux den a salooxe, yaam kam fa saasu fo o say den. Xam picit a den kam Yakoob, pasar a den kam Isra’el.

⁸Wo Yudaa, fog faap of fop xan a simatong. Xan o ɓay of a dal no log no fañ of. Xa ƥiy axe faap of xan a ngung mbaambir of.

⁹Yudaa kaa ref o njogoy o njanglax, o ƥees, kaa o inoor no nqawlax, tuuƭ o ɓay of, soo wondoox nen njogoy: An na inkan?

¹⁰O samb o ɗoxir ole sambirkee fa Yudaa, too o anddiloor kelfa le goƭkee a caf um, boo yaa oxe jeguuna[84] a garkaa, oxe qeet ke fop a nanankaa.

¹¹No ndaxar biiñ ne a bugko humaa o faam um, mol ne ta humin na naaq ale moƴna neep teen. Ndoki ne ten na biiñ fee a dapitkan, sabadoor um ta daptin o ngoon onqe na xa biiñ axe.

¹²A kid ake ten kaa yaxig fa biiñ, a ñiiñ ake ten a ndanig fo fo sis.

¹³Sabulon xan a genaa na ƥeeraamb ale no maag ole. Xan a jegan a kaal ake ten waax na tambando fee ten too xan o fiisel um a suur boo Sidoŋ.

¹⁴Isakaar o mat ngoŋka tigi yoo, naa na wondooxaa ndeer a ƥit ake.

¹⁵A ga’a yee o mbiñ onqe ta wondooxna a faaxa, too saax le a fela. Kaa yoorin a kand um no suf ne, a ɓoxotoox no calel sertel.

¹⁶Dan, wo na hate’kaa xeet of nen a leng na carind ake Isra’el.

¹⁷Xan o ref fangool na qal, sax ndeer a ƭat, ŋataa xa tod axe no pis ke, soo o ŋaaŋaay pis oxe a ɗangtooxiid a lanq.

¹⁸O Yaal oxe, na wo geƈnooxum, ndax o mucil.

¹⁹Gaad o mat, xan a yaj a mbokatooranin, ndaa ten na fokatoorankaa a den, soo a daabaa a den.

²⁰Aseer koy, xan a jeg ñaamel pelu. Ten na bugko fi’aa ñaamel ke ngelna o maad.

²¹Neftali xan a ref mbat naa jegna a xoox um, ten na bugko rimaa xa ƥiy xa mosu.

²²Yoseef xan a ref dugatin neepu no ndaxar mayu xa tim naa refna paam a cur. A naaq ake ten xan a nqay boo a yooroox saŋe ne.

²³Xaaxaaƴ a qali we kaa paaƈan, a nqaƴan a kas ake, soo a ŋalan.

²⁴Kaa koy, a qali le ten oxey koŋ, xa ƥay xa cegu doole xe ten kaa mbaane, yaam ƈufig ne no Cegu katil oxe Yakoob, refna o Kaynaak oxe fo Ɓil le andoona yee teen Isra’el a diƈooxu.

²⁵Kaam ee, Roog fee na faap of xan a ƴufgiidong, o Cegu katil oxe xan a barke’ong. Yaasam ta fod took-ee-took a barke’tiidong a teƥ fo itam poofi ke na juwaam fee fo xa ƥiy xa mayu fo xa siir xa pagkatar.

²⁶Parke ke faap of a njola parke ke na xa coong axe yaaga fo ke moƴna o faax no ke a ñaang ake yaa maam a ɗiisaa a kid a mbatna. Yaasam parke keene a mbudoox took xoox le Yoseef, no jug ole no kelwaar oxe a ndeer fog faap um.

²⁷Bensame o mat, xan a ref a teeteem alaa na listaa. No nqes ne kaa waraa mbuufuɗag um, soo no kirand ne ta xaaj paax ke ta jaɓna.»

²⁸Weene ndefu a carind xarɓaxay fo a carind a ƭak ake mbokatoorna, a ndef xeet fee Isra’el, too keene refu ke faap den a layna a den ye ta barke’aa a den. A barke’a a den oxuu refna no xos barke um.

²⁹Cinj kaaga, a hebla a den ee: «Yaa um dabkaa daan es, fat nu ngaskaam maa no daan es no luf naa refna no qol olaa Efron o Heeheet oxe.

³⁰Ten refu ref luf naa no qol olaa refna Makpeela paam Mamre, no saax laa Kanaan, o qol olaaga Abraham a jikit’ina na Efron, o Heeheet oxe, ta refat o jeg um olaa ta fi’na poy.

³¹Maaga mat Abraham fa Saara fee o teem a ngase, Isaak fa Rebeka fee o teem a ngasel maaga, too maaga gasum a Leya.

³²O qol olaa fo luf naa refna taaga no Heeheet we a njikte.»

³³Ye Yakoob a ƴutna no maƭooxaa xa ƥeem, a wondooxatina no njong um, a fadnoox soo a dab daan um.