Read NQAARIIT NE ROOG Mberaand 50 Bible Online

Mberaand 50 - NQAARIIT NE ROOG bible

Mberaand 50

¹Yoseef a ƴufana mukit fee faap um, a naag ciic a lool soo a foonin.

²Cinj kaaga, a hebla waawaadin we njalanooguuna yee: «Topatooxyo a faap es.» A ndalfooxa o ƭuum a Isra’el diwliin ndax yaqooxkee.

³A ƭuumooga o dal ole boo ñaal qarɓeen nahik. Miimisira we a ñaawooxaan boo ñaal qarɓeen ɓetuu ƭik.

⁴Ye ñaal ke no ñaawax ne a mbaafna, Yoseef a laya we no mbind Firawon fee yee: «A soƥangaa yee daawaam yirmande nuun, ngela njangtooxanaamoo a Firawon fee ke um laykaa:

⁵Faap es kaa daaɓooxnoor’aam ee: ‹Andaam ee ndiiki um xon! Fat o gaskaam na mboy ale jikuuma no saax le Kanaan.› Kaam bug o ret boog, gasik a faap es, cinj kaaga um nomtooxiid.»

⁶Firawon fee a doonaan ee: «Reti o gas a faap of, ne ta daaɓooxnoortoonga o ten.»

⁷Yoseef a reta ndax ta gasik a faap um. Dag we Firawon fee fop a yoon’a fo ten fo maak we no mbind um fop, maak we Misira fop,

⁸we no mbind Yoseef fop, fog faap we ten fo we no mbind faap um. O leng yoq’ee kam o jegel ole Goseen, a refangee xa caaƈ axe fo a ked ake fo xa siir axe.

⁹A sareet-xire fo ŋaaŋaay pis a yoon’a itam fa Yoseef, too a yaj ale den a magin’a lool.

¹⁰Ye da mbadiidna Goren-Ataad[85] refna kaltaa Yordaan, a nqaaraandaan maaga o xaaraand o maak, soo Yoseef a ñaawoox a faap um boo ñaal ɓetuu ƭik.

¹¹We ngenna no saax le Kanaan a nga’a o xaaraand olaaga reeƭna no cukand naa Ataad, soo a lay ee: «Kene koy refu o xaaraand o maak a ndeer no Miimisira we.» Ten taxu o mbiñ onqaaga refna kaltaa Yordaan a ne’el Abel-Misrayiim[86].

¹²Neene, xa ƥiy axe Yakoob a mbi’a ke faap den a hebil’ina a den.

¹³Xa ƥiy axe ten a ƥisaan no saax laa Kanaan, soo a ngasin no luf naa no ɓil laa kam o qol olaa refna Makpeela paam Mamre. Abraham jikit’u o qol olaaga na Efron, o Heeheet oxe, ta refat o jeg um olaa ta fi’na poy.

¹⁴A cinj ye Yoseef a gasna a faap um, a nomtooxa Misira, ten fo fog faap um fo fop we yooniid’ina fo ten ye ta gasiidaa a faap um.

¹⁵Ye fog faap we Yoseef a nga’na yee faap den a xona, a laya yee: «Xan Yoseef a fuuxan a in soo a doon a in paaxeer ke i mbi’uuna fop.»

¹⁶Maaga, a simta o layanel a Yoseef ee: «Faap of a heblit’a yaaga xonafulee yee:

¹⁷‹Fat nu lay a Yoseef ee: Ngela waasani fog faap we wo paaxeer ke fo tooñ ne da mbi’oonga, yaam a mbi’aang kaa faaxeerna.› Kaa rek, ngela waasanti tooñ ne no dag we na Roog fee na faap of!» Ye Yoseef a nanna kaaga, a naaga ciic a lool.

¹⁸Fog faap we Yoseef a ngarana a qoox den, a ngung na caf um, a layin ee: «Faɗ of i ndefu!»

¹⁹Yoseef a laya a den ee: «Ba nu saɗar dara! Kaam ref Roog?

²⁰Kaa nu yuuɓan’aam paaxeer, Roog a suptin paax, a fadin ke na xewaa ndiiki, soo a mucil o ñis no xeet fa maak.

²¹Yaaga koy, ba nu saɗar dara. Xam jofnoox no fop ke nu soxla’na, nuun fo xa ƥiy nuun.» A yaalta a den fa lay feene boo xa laaw den a ndalat.

²²Yoseef a genooga kam Misira, ten fo ƥasil um. A ñoowa xa kiid teemeed fo xa kiid xarɓaxay.

²³A ga’a xa taan axe Efrayim boo no suk ndadkandeer naa, too ten ɓop’u xa ƥiy axe Makiir fee o ƥiy Manaase ye da ndimeena.

²⁴Yoseef a laya fog faap we ten ee: «Andaam ee ndiiki um dab daan es. Kaa koy, a woora yee xan Roog a ƴufgiid a nuun, soo a sut a nuun no saax lene, a ɓis a nuun no saax le ta daaɓooxna yee xan a ci’in a Abraham fa Isaak fa Yakoob.»

²⁵Yoseef a daaɓooxnoora xa ƥiy axe Isra’el ee: «A woora kañ ee xan Roog a ƴufgiid a nuun, fat boog nu sut xa kiiƈ es maa goƭna saax lene.»

²⁶Yoseef a xona ye ta jegna xa kiid teemeed fo xa kiid xarɓaxay. O dal ole ten a ɗuume soo a ɓekel kam kees maxte a ƥil maaga Misira.