Read NQAARIIT NE ROOG 2 Sami’el 21 Bible Online

2 Sami’el 21 - NQAARIIT NE ROOG bible

2 Sami’el 21

¹Ye fo maat Dawid a jeg’a biim maak laa fi’’ina xa kiid xa tadaq xa tuqrandu. Dawid a ƴufginooxa o Yaal oxe, soo ta layin ee: «Keene kaa xew, yaam a bar ale Sawul fo ƥasil um a mbar’ina no Giigibe’on we.»

²O maad oxe a xoya Giigibe’on we, ndax ta lay fa den. Den koy, mbog’ee no Ii-isra’el we. Kaa ndeeƭu onqe yoq’ina no Aa-amori we, too Ii-isra’el we a ndaaɓoox’u yee moocandkee a den. Yaqanee koy, Sawul kaa bug’u o moocand a den yaam o mbeq onqe ten no Ii-isra’el we fo no wiin we Yudaa.

³Dawid a laamta a den ee: «Xar warum o fi’an a nuun? Nam waagum o xendandit paaxeer ke dalna a nuun, ndax nu mbarke’at xeet fee no Yaal oxe?»

⁴Giigibe’on we a ndoonaan ee: «Refee yee xaaliis mbaat wurus waagu o xendand a ndeer in fa Sawul fo ƥasil um, too i njegee sañ-sañ o mbar o kiin kam Isra’el.» Maaga, Dawid a laya a den ee: «Layaamoo ke nu mbugna, too xam ci’in a nuun.»

⁵Maaga, a laya o maad oxe yee: «O kiin oxaaga kaa bug’u o moocand a in, a heboox o xuuf xa ñis in no fiisel ole Isra’el fop.

⁶Fat i ƥoxotel boog goor ɓetuu ɗik na xa taan um, ndax i ndibnoor a den mbaambir no Yaal oxe maaga Gibe’a me Sawul fee o Yaal oxe a jil’ina a gen’ina.» O maad oxe a laya yee: «Xam ɓoxot a den a nuun.»

⁷Dawid a wuusa a Mefibaal fee o ƥiy Yoonatan, a ref itam o ndaan Sawul yaam nqaariit ne ta hiɓ’ina fa Yoonatan fee o ƥiy Sawul no gon no Yaal oxe.

⁸O maad oxe a xotnika a Armoni fa Mefibaal ndeeƭna xa ƥiy xa ƭaq axe Rispa fee o ƥiy Aya a rim’ina fa Sawul fo xa ƥiy xa ƥetaq axe Meerab[25] fee o ƥiy Sawul a rim’ina fa Adiri’el fee o ƥiy Barsilay fee gen’ina Mexola.

⁹A ɓoxota a den na xa ƥay axe no Giigibe’on we. Weene a ndiba a den took o joong mbaambir no Yaal oxe. Ɓetuu ɗik waa fop a saŋkooxandoora. A bar alaaga a jeg’a no ñaal peraand ke na saxad ale na lorso fee.

¹⁰Rispa fee o ƥiy Aya a janga o saaku, a ɗaapin took ɓil laa, a wondooxaa teen, a ref maaga no kaa xotitna na saxad a peraand alaa boo neen Roog a deɓu took den. A ñaalangaa, kaa fañtoogu tiiƭ ke da ndong took xa tal axe, soo a yengangaa, ta raxaa ƥaaɓaan ke, ndax nduqkee a den.

¹¹Ye Dawid a yegneena ke Rispa fee o ƥiy Aya, a ref ngeƈ-a-salma Sawul a fi’’ina,

¹²a reta, a xotik xa kiiƈ axaa Sawul fo axaa Yoonatan fee o ƥiy Sawul maa no wiin waa Yabes no saax laa Galaad, yaam ye Fiifilista we a mbaritna a Sawul Gilbowa, kaa lok’u o dal ole ten fo ole Yoonatan na baayo faa Bet-Se’aan, too wiin waa Yabes a ngar’u, a nguuɗit xa tal axaa maaga.

¹³Dawid a ɓistiida xa kiiƈ axe Sawul fo axe Yoonatan Yabes. Cinj kaaga, xa kiiƈ axe no we ndib’eena

¹⁴a mbokate fo xa kiiƈ axe Sawul fo axe Yoonatan soo da ngaskel na mboy alaa Kiis fee faap Sawul refna Ceela no fiisel olaa Bensame. A cinj ye da mbi’na fop ke o maad oxe a hebil’ina, Roog a yirma saax laa.

¹⁵Xire a ɓaata o jeg ndeer Fiifilista we fo Ii-isra’el we. Dawid fo xiixire we ten a ndeta, a ñoxorik fo Fiifilista we. Dawid a xij’ata lool.

¹⁶Yisbi-Benob fee o ndaan Rafa a diirooxa o war a Dawid. Laƥ nqas a saq’u, soo weel le na salma le ten a ref xanjar, o meɗel um a hup kilo tadik.

¹⁷Abisay fee o ƥiy no tew o ne’e Seruya a ƴufga o maad oxe, a war o Fiifilista xaa. Maaga, wiin we Dawid a ndaaɓooxnoora a Dawid, a lay ee: «Yoonkatiro fa in na xire muk, yaam ndik o xon, wo fee yaakaar Isra’el.»

¹⁸Cinj kaaga, a jegahina a ñoq a ndeer Fiifilista we fo Ii-isra’el we, maa na xoyeel Gob. No jaf laaga, Sibkay fee gen’ina Husa, a wara a Saf fee o ndaan Rafa itam.

¹⁹A ñoq a ɓaatahina o jeg fo Fiifilista we Gob, too Elxanan fee o ƥiy Yaare-Orgim fee gen’ina Betleheem a warta teen a Golyat, o Kaagaat oxe, o loq ole na sakoor ale ten nand’ina nen o roondoon no yaal a tiwand.

²⁰A ñoq a lakas a ɓaata o jegit Gaat. A jeg’a maaga o koor o cigdu xaa jeg’ina qol ɓetaa fo leng no ɓay oluu refna fo na caf aluu refna, fop oo fop a ref qol qarɓeen ƭik fo qol nahik. O koor oxaaga itam o ndaan Rafa a reeƭu.

²¹O koor oxaaga a wen’a Ii-isra’el we. Maaga, Yoonatan fee o ƥiy Simeya fee o maag Dawid a waraan.

²²Dawid fo xiixire we ten a mbar’a fo ndaan fo nahuk neene na Rafa fee gen’ina Gaat.