Read NQAARIIT NE ROOG 2 Sami’el 23 Bible Online

2 Sami’el 23 - NQAARIIT NE ROOG bible

2 Sami’el 23

¹Keeke refu yegnit mbalakaand ne Dawid: Nan-gilooxyo fa lay es, mi Dawid fee o ƥiy Isay, mi o koor oxe yoɗeena took-ee-took, oxe Roog fee Yakoob a ɗuumna o maad, too xeet fee Isra’el a nqaananan fo o ɗaay.

²Yiif le no Yaal oxe na mi a laytaa, fa lay um oxey no ɗelem es.

³Roog fee Isra’el a laya, ɓil le Isra’el a layaxam ee: «Oxe kelfa’na wiin we fo o cofel soo a maadoortaa o saɗar a Roog

⁴kaa nand fo njeeƈ naa na wataa, a xool qac no nqes njegee eel leng. Meleƈ le ten na taxaa suuƴin a sutoor no lanq ke a cinj a teƥ ale.»

⁵Neene mbind es a nandu mbaambir Roog. A dalna fa mi ngiɓoor naa na refkaa boo faw, a saƭik too a woor. Ten na saxnaa a muc es fop fo o bug es fop.

⁶Kaa koy, soxodu we fop kaa ndef nen taxas kaa na ndeɓkeel. Pokitkaand muk xa ƥay xa ƥor,

⁷ndaa o lokir njelem mbaat a caangir soom a nduqteel soo a ndoxel fop ndak fo ndak.

⁸Keeke ndefu xir say we Dawid: A jeg’a a Isbaal[26] fee o Haahakmoni xe moƴ’ina o jambaar no cambaar tadik ke. O ten warit’u goor teemeed ɓetuu tadik a salma um na ñoq a leng.

⁹A cinj oxeene, a jeg’a a Eleyasaar fee o ƥiy Dodo, a ref itam o ndaan no koor o ne’’e Ahowa. A fog’a no cambaar tadik ke yoon’ina fa Dawid, ye ta paaƈna Fiifilista we mbokatoor’ina, ndax da ñoxor fo ten. Goor lakas we Isra’el kaa ƈuf’u,

¹⁰ndaa Eleyasaar o mat a saqa njambaar ndeyu sik, a ref no waraa Fiifilista we boo o ɓay ole ten a somat, a taƥat no laƥ ne ten. No ñaal naaga, o Yaal oxe a ci’a a Isra’el o ndam o maak, too yaa xiixire lakas waa a nomtooxiidna me Eleyasaar, o njang tikoorik ke na xa tal axe soom a yoqɗoor’e.

¹¹A cinj oxeene, a jeg’a a Sama fee o ƥiy Age, o Haaharari xe. Fiifilista we kaa mbokatoor’u Lehi maa o qol a ñaaw a reeƭna. Xiixire we Isra’el kaa ƈufit’u mbaambir no Fiifilista we,

¹²ndaa Sama o mat kaa naag’u jiŋ ndeer o qol olaa, a xoxtin soo a xaw Fiifilista we. Neene, o Yaal oxe a ci’a a Isra’el o ndam o maak.

¹³Na waxtu fee na saxad ale, goor daduk waa mbog’ina na yaj ale no xiixire qarɓeen tadik we a ngara, a soƥiid a Dawid no luf naa Adulaam, a soƥ faan no Fiifilista a ndal na yulanq alaa no Reerefa waa.

¹⁴Ye Dawid a refna kam saŋe naa, yaaga a qaaj a leng no xiixire we no Fiifilista we owaa ndala Betleheem.

¹⁵Dawid a diilooxa soo a lay ee: «Ey, um waag’ange o ci kaa yeruuma no foofi laa na ngas alaa refna no ndokand naa Betleheem rek!»

¹⁶Maaga, cambaar tadik kaa a nqota a ƭat, a nqaañ maa Fiifilista waa a ndal’ina, a ƈeew no foofi laa na ngas alaa refna no ndokand naa Betleheem, a ƥisiidin a Dawid. Kaa koy, oxeene bug’iran o yer, ndaa a ɓaxanaan o Yaal oxe a lanq,

¹⁷a lay ee: «O Yaal oxe, yaa boo muk um yer foofi lene! Ndax kaa nandee sax fo fo’oy le no goor wene njikooxna xa ñis den, ye da mbaaƭkan?» Naaga, a fañaan o yer. Keene cambaar tadik keene a mbi’u.

¹⁸Abisay fee o maag Yowab, too a ref itam o ƥiy no tew o ne’e Seruya, adooxan’u a yaj ale no xir say qarɓeen tadik we. Ten dib’u goor teemeed tadik a sakoor ale ten, a war a den. Naaga, gon um a joot’a nen ake no cambaar tadik ke.

¹⁹Ten moƴ’u o jeg gon a ndeer a yaj ale no xir say qarɓeen tadik we boo a adooxanat a den sax, ndaa koy tax’ee ta fodir fo daduk we.

²⁰Benaya fee o ƥiy Yehoyada fee gen’ina Qabse’el o qiixire maak oxaa fi’’ina caloori mayu a reeƭu. O ten o mat war’u a salma-koor a ƭak akaa ngen’ina Mowaab soo a rok kam a ngas, a warik maaga njogoy, a jopir a teƥ nees.

²¹O ten war’u itam o Miimisira poŋkil. O Miimisira xeene kaa saq’u a salma, soo ta xetik fo ten fo o loq, a jaɓit a salma le na xa ƥay um, a wartin o ten.

²²Keene ndefu caloori ke Benaya fee o ƥiy Yehoyada a fi’na, too gon um a joot’a nen cambaar tadik ke.

²³A fog’a no we moƴ’ina o njeg gon a ndeer xir say qarɓeen tadik we, ndaa koy tax’ee ta fodir fo daduk we. O maad Dawid a doxnaan ta adooxan we na yetooxan.

²⁴Na yaj ale no xiixire qarɓeen tadik we a jeg’a: Asa’el fee o ndeɓ Yowab, Elxanan fee o ƥiy Dodo gen’ina Betleheem,

²⁵Sama fa Elika we ngen’ina Harod,

²⁶Heles fee gen’ina Pelet, Ira fee o ƥiy Iqees fee gen’ina Tekowa,

²⁷Abiyeseer fee gen’ina Anatot, Mebunay fee gen’ina Husa,

²⁸Salmon fee gen’ina Ahowa, Mahray fee gen’ina Netofa,

²⁹Heleb fee o ƥiy Baana fee gen’ina Netofa, Itay fee o ƥiy Ribay fee gen’ina Gibe’a fee Bensame,

³⁰Benaya fee gen’ina Piraton, Hiday fee gen’ina na xur faa Gaas,

³¹Abiyalbon fee gen’ina Bet-Araba, Asmawet fee gen’ina Bahurim,

³²Elyahba fee gen’ina Saalbon, o leng na xa ƥiy axe Yaasen fee gen’ina Guni, Yoonatan

³³fee o ƥiy Sama fee gen’ina Harar, Ahiyam fee o ƥiy Sarar fee gen’ina Arar,

³⁴Elifelet fee o ƥiy Ahasbay fee gen’ina Maaka, Eliyam fee o ƥiy Ahitofel fee gen’ina Gilo,

³⁵Hesray fee gen’ina Karmel, Paaray fee gen’ina Arab,

³⁶Igal fee o ƥiy Natan fee gen’ina Cooba, Bani fee fog’ina na carind ale Gaad,

³⁷Selek o Aa-amon oxe, Nahray fee gen’ina Beerot reeƭna o saasaq oxe no ƥonax ke Yowab fee o ƥiy Seruya,

³⁸Ira fa Gareb we ngen’ina Yeter

³⁹fa Uriya, o Heeheet oxe. Fop oo fop a ndeeƭa qarɓeen tadik fo ɓetuu ƭik.