Read NQAARIIT NE ROOG 2 Sami’el 24 Bible Online

2 Sami’el 24 - NQAARIIT NE ROOG bible

2 Sami’el 24

¹Bes, o Yaal oxe[27] a dakooxa o fuuxan Ii-isra’el we soo a riñ a Dawid ta fi kaa na maƭarkaa a den. A layaan ee: «Reti o lim wiin we Isra’el fa Yudaa.»

²O maad oxe a laya a Yowab fee o aa-adax oxe no xiixire we ndeeƭna fo ten ee: «Mbidyo o fiisel ole Isra’el fop, ke xottoonga Dan no ɓemb-roog o janoon boo a damik Beer-Seeba no ɓemb-roog o ñamaak too mbind xeet fee, ndax um and ne da mbodna.»

³Yowab a doona o maad oxe yee: «Daali maad, yaasam o Yaal oxe Roog of a mayƭand xeet fee boo a caf teemeed na kid of! Kaa koy, wo o maad oxe o yaal es, xar taxu o bug keene?»

⁴Kaa koy, o maad oxe supit’ee ke ta hebil’ina a Yowab fo aa-adax we no xiixire we, too weene a sutoora no mbind ne no maad oxe, a mbindik xeet fee Isra’el.

⁵A nqaaña o xuluɓ olaa Yordaan soo a ndal no ɓemb-roog o ñamaak olaa na teeru faa Aroweer refna ndeer ee ndeer a yulanq alaa. A nqaaña a carind ale Gaad a njagin Yaseer,

⁶a ndok no fiisel olaa Galaad, a ndet kam saax laa no Heeheet we fa Kades fa Dan soo a nquruloor maaga, a njagin Sidoŋ.

⁷A suura boo no saŋe naa Tiir fo no teeru ke no Hiihiwi we fop fo ke no Kaakanaan we, a mbaasooxan a Beer-Seeba farna fo ɓemb-roog o ñamaak no fiisel olaa Yudaa.

⁸Ye da mbidna saax laa fop, na qool ɓetaa nahak fo ñaal qarɓeen ƭik, a nomtooxiida Yeerusaleem.

⁹Yowab a yegna o maad oxe ke ta jeg’ina na lim ale: Kam Isra’el a jeg’a goor cuni teemeed ɓetuu tadik waa mbaagna o ndet na xire, soo kam Yudaa ta jeg goor cuni teemeed ƥetik.

¹⁰A cinj ye Dawid a limna xeet fee, o laaw um a dalfooxa o ref no fiiƭaa. A laya o Yaal oxe yee: «Fi’aam bakaad fa maak, ye fi’uuma keene! Ndiiki koy, o Yaal oxe, waasanaam tooñ[28] neene, mi fee o tag of, yaam kaam fesoor nen o ƭof.»

¹¹No feet nqes olaa, yaa Dawid a inooxna, a soƥ’a o Yaal oxe a lay o tuleer Gaad fee o ƭeet oxe Dawid xa ƭelem axene yee:

¹²«Reti o lay a Dawid ee: O Yaal oxe kaa tee o jil leng no tadik ke ta laykang, too xan a doonong o ten.»

¹³Gaad a reta maa Dawid, a layin kene: «Xar moƴanong, xa kiid xa tadaq[29] biim a njeg kam saax of ndi fañ of a ndaxang boo a qool a tadak, o ƴufaa a den ndi ta jeg piste kam saax of boo ñaal tadik? Ndiiki koy, xalaati a paax too o layaam ke um doonkaa oxe luliidaxama.»

¹⁴Dawid a doonaan ee: «Mi koy de jaaxɗaam lool, ndaa koy, o yen na xa ƥay no Yaal oxe moƴanaxam o yen no axe no wiin we, yaam o Yaal oxe a naaga o yirmaa.»

¹⁵O Yaal oxe a ɓisiida piste kam Isra’el, a xotit no nqes naaga boo na waxtu fee dalin’eena, too kam saax le fop, ke xotitna Dan boo Beer-Seeba wiin cuni qarɓeen ɓetuu ƭik a nqona na xeet fee.

¹⁶Ye malaaka fee a letinna o ɓay um took Yeerusaleem, ndax ta xawin, o Yaal oxe a ricooxa ɗom leene soo a lay a malaaka fee saŋkoogna xeet fee yee: «A deya! Ndiiki, fudni o ɓay of.» Kaaga oxaa soƥ’a malaaka fee no Yaal oxe paam cukand naa Arawna, o Yeeyebus oxe.

¹⁷Ye Dawid a ga’na malaaka fee saŋkoogna xeet fee, a laya o Yaal oxe yee: «Mi bakaadu, mi o mat tooñu! Wiin weeke mbi’ee dara kaa faaxaƭarna. Yaaga boog, mi fo ƥasil es mbare o nqaw.»

¹⁸No ñaal naaga, Gaad a gara maa Dawid, a layin ee: «Reti maxan o Yaal oxe o sadaxand no cukand naa Arawna o Yeeyebus oxe.»

¹⁹Dawid a reta maaga ne o Yaal oxe a heblit’uuna a reefandin na Gaad.

²⁰Arawna a foda took, a ƴook o maad oxe fo dag um a ngaraa farna fo ten. Maaga, Arawna a xetiida fa den soo a gung a lanq mbaambir o maad oxe.

²¹A laamtaan ee: «Daali maad o yaal es, xar taxu o garaa me mi, mi fee o tag of?» Dawid a doonaan ee: «Kaam bug o jik cukand ne wo, maxan meen o Yaal oxe o sadaxand, ndax taamaala fee a waag o waas xeet fee.»

²²Arawna a doona a Dawid ee: «Daali maad o yaal es, fat o jang cukand ne, ɓoxot itam kaa faaxna na kid of. Qoox ke mi a mbaage o ƥoxot nen sadax fa ndoxel, kaaƈir ke fo kadoor ke a ndefik xa cuuƭ axe.

²³Daali maad, ci’aaxoong keene fop.» Arawna a ɓaata o lay ee: «Yaasam o Yaal oxe Roog of a jaɓ sadax of!»

²⁴O maad oxe a laya a Arawna yee: «Ha’aa, ba o ci’aam dara. Kaam bug o jik keene, rabdong ke da njarna. Bugiim a bug o ɓoxot o Yaal oxe Roog es sadax faa ñakeeruuma dara!» Dawid a jikta cukand ne fo qoox ke xa monjong qarɓeen ƥetik xaaliis fa nqoolu.

²⁵A maxana maaga o Yaal oxe o sadaxand soo a ɓoxot sadax toxel fo sadax camsa’oor. Maaga, o Yaal oxe a yirma saax laa Isra’el, soo taamaala fee a finqoox.