Read NQAARIIT NE ROOG 2 Sami’el 3 Bible Online

2 Sami’el 3 - NQAARIIT NE ROOG bible

2 Sami’el 3

¹Xire fee a miñ’a lool ndeer wiin we Sawul fo we Dawid. Dawid kaa moƴ’u o jegaa doole rek, soo mbind Sawul a moƴ a moƴ o ñakaa doole.

²Dawid a jegta Hebron xa ƥiy xa koor. Taaw fee ten refu Amnon fee ta jeg’ina fa Ahinowam fee gen’ina Yisre’el,

³o ƥiy o ƭikandeer onqe a ref Kilaab[4], too ta jeg’un fa Abigayil fee ñaawooxoogna a Nabal fee gen’ina Karmel, o ndadkandeer onqe a ref Absalom fee ta jeg’ina fa Maaka fee o ƥiy Talmay fee o maad Gesuur,

⁴o nahkandeer onqe a ref Adoñaa fee ta jeg’ina fa Hagit, o ƥetkandeer onqe a ref Sefatiya fee ta jeg’ina fa Abitaal,

⁵o ɓetuu fa lengandeer onqe a ref Yitre’aam fee ta jeg’ina fa Egla fee o teem itam. Weene ndefu xa ƥiy axe Dawid ndimteena Hebron.

⁶Na xire fee ndeer wiin we Sawul fo we Dawid Abineer a saaƭoox’a na Sawul.

⁷Sawul koy a jeg’a ngeƈ-a-salma, too ta ne’el Rispa, a ref o ƥiy Aya. Bes, Isbaal a laya a Abineer no kaa farna no tew oxaaga yee: «Xar taxu o wondoox fo o tew faap es?»

⁸Yaa Abineer a nanna xa ƭelem axaaga, a dalfooxa o fuux boo a buɓaa, a lay ee: «Ndax kaam ref o ɓox no Yuuyudaa we? Yaaga boo fa ndiik kaam damoox no kurcala le faap of Sawul fo no maag um fo no qaariit um, too fi’aam fop, ndax yenkiro na xa ƥay axe Dawid, soo xaye o xasanaxam yaam o tew oxene!

⁹Yaasam Roog a halakaam, um fadnanangee a Dawid ke o Yaal oxe a reg’uuna,

¹⁰ye ta daaɓooxna yee: ‹Xam jaɓit maat ne no kurcala le Sawul soo cooxin a Dawid, ta maadooxaa kam Isra’el fo kam Yudaa ne da mbodeena fop, ke xottoonga Dan boo a damik Beer-Seeba.»

¹¹Isbaal waag’atee o doon a Abineer o ɗelem o leng sax, yaam a saɗar’un.

¹²Abineer a lula wiin da layanin a Dawid ee: «Ndi an jegu saax le? Dalni fa mi ngiɓoor, too xam dimle’ong boo Isra’el fop a mbar fa wo.»

¹³Dawid a doonaan ee: «A faaxa, jaɓaam o hiɓ fa wo ngiɓoor, ndaa kañ xam laamtong leng: A refangee kaa o ɓislooxiidaam a Mikal fee o ƥiy Sawul, ba o fadiid me mi.»

¹⁴Cinj kaaga, Dawid a lula wiin maa Isbaal fee o ƥiy Sawul, ndax ta layin ee: «Cooxaam a Mikal fee o tees labdituuma xa sool no goor Fiifilista teemeed.»

¹⁵Maaga, Isbaal a xotnika a Mikal no mbind no kor um Palti’el fee o ƥiy Layiis.

¹⁶O kor um a reefaan, a loolaa boo Bahurim. Maaga Abineer a laya o koor oxaa yee: «Naagi temel, nomtoox!» A dalfooxa o nomtoox.

¹⁷Abineer a dalfooxa o joktoor fo maak we Isra’el, a lay a den ee: «Nu miña o mbug Dawid a refan a nuun o maad.

¹⁸Ndiiki koy, mbadneenoo, yaam o Yaal oxe a laya kaa jofna no ten ee: ‹Na pexey Dawid fee o tag es um muclitkaa a Isra’el fee xeet es na xa ƥay no Fiifilista we fo no fañ we ten fop.› »

¹⁹Naaga Abineer a joktoora itam fo Beebensame we soo a ret Hebron, ndax ta yegnik a Dawid ke Beebensame we fo Ii-isra’el lakas we fop a njaɓ’ina.

²⁰Ye Abineer a fadiidna Hebron maa Dawid, a yoonit goor qarɓeen ƭik, Dawid a fi’ana a den mbumbaay.

²¹Abineer a laya a Dawid ee: «Kaam retaa neeke, ndax um fokatiid Ii-isra’el we fop me wo fee o maad es fo o yaal es. Xan a ndalin fa wo ngiɓoor, soo o maadoox took saax le fop ne bugit’anoona.» Maaga, Dawid a welta a Abineer, soo ta ret na jam.

²²Ɓaatnee dara, Yowab fo xiixire we Dawid a mbadiida. Kaa inoor’u no song naa, a ngatit kalal mayu. Abineer koy reeƭatee maa Dawid kam Hebron, yaam Dawid kaa xaƴ’un ta nomtoox na jam.

²³Ndak fo ndak, yaa Yowab fo xiixire we yoon’ina fo ten a ngatna, Yowab a laye yee: «Abineer fee o ƥiy Neer kaa gar’u a soƥiid o maad oxe, soo oxeene a xaƴin ta nomtoox na jam.»

²⁴Yowab a soƥiida o maad oxe, a layin ee: «Ndi wo o mat, xar fi’o? E, Abineer a waag o gar me wo, soo o xaƴin ta ret!

²⁵Yaag oo toox de, andaa a Abineer fee o ƥiy Neer a paax! Ndax ta naxong doŋ taxu ta gar mene, a and a ñaaƈnooƭ of fo fop ke o fi’aa.»

²⁶A cinj ye Yowab a inoorna maa Dawid, a lula wiin da ndaab a Abineer. A ndaawtaan no Mbalka naa Sira, a nomtiidin, too Dawid yegee teen dara.

²⁷Ye Abineer a nomtooxiidna Hebron, Yowab a xoyaan da sayoox no don-maax ole na teeru fee, a fi nen oxaa bugna o waxtaan fo ten na pet. Maaga Yowab a dibtu a Abineer no fud. A waraan, yaam ne ta war’ina a Asa’el fee o ndeɓ um.

²⁸Ye Dawid a yegna ke xew’ina, a laya yee: «O Yaal oxe a anda o mat ee mi fo maat es i ndefee dara no fo’oy le Abineer fee o ƥiy Neer.

²⁹Yaasam fo’oy le Abineer a yen took Yowab fo o kurcala um fop! Yaasam baa o kurcala le Yowab a ñakat waa mbaambir den a yuuraa mbaat yaal a tik-a-maak mbaat xa lafañ! Yaasam baa o kurcala um a ñakat waa mbarteena laƥ fo waa njegeerna ñaamel!»

³⁰Neene mat Yowab fo o maag um Abisay a mbartu a Abineer, yaam ne ta war’ina a Asa’el fee o ndeɓ den na ñoq alaa Gibe’on.

³¹Dawid a laya a Yowab fo we yoon’ina fo ten fop ee: «Mbaaryo toki nuun, nderoox xa saaku, ñaawoox a Abineer.» O maad Dawid fa xoox um a reefa jaat fee, a ñaaƴaa,

³²ye Abineer a gaskeel maaga Hebron. O maad oxe a dalfooxa o faɗoox na mboy alaa, soo xeet faa fop a lool itam.

³³Cinj kaaga, o maad oxe a ferana a Abineer a kim a mboy aleeke yee: «Ndax Abineer a war’a o xonit nen oxaa jegeerna yiif?

³⁴Xa ƥay axe wo ngiɓ’aand, a caf ake wo njeng’aand, ndaa yaqanee o xonit nen o koor oxaa saasaay a mbetna.» Waa ndeeƭna maaga fop a moƴa o lool.

³⁵Cinj kaaga, ye ta maadna o ñaalaa, a matiida a Dawid, ndax da cooxin xa nak, ndaa o maad oxe a daaɓooxa yee: «Yaasam Roog a halakaam, yaa ñaamuuma o nak mbaat kuu ta waagna waag o ref ndeer mene fo njeeƈ mudu!»

³⁶Xeet faa fop a yega kaaga, too a fel’a a den, nen fop ke o maad oxe a fi’oogna.

³⁷Neene, waa nqaaraandiid’ina fop fa Isra’el fop a and’a yee refee yee o maad oxe warnooru a Abineer fee o ƥiy Neer.

³⁸Dawid a laya wiin we ten ee: «Nu yega fo and ee o kelwaar a xona kam Isra’el xaye. O aa-adax o maak a reeƭu.

³⁹Mi, ke refuuma ref o maad fop oo, jegafuliim doole faa xoxtuuma coxod ne na xa ƥiy axe Seruya. Kaa rek, yaasam o Yaal oxe a rabid o soxodu xe coxod um!»