Read NQAARIIT NE ROOG 2 Sami’el 4 Bible Online

2 Sami’el 4 - NQAARIIT NE ROOG bible

2 Sami’el 4

¹Yaa Isbaal fee o ƥiy Sawul a yegna yee Abineer a xonta Hebron, o laaw um a reta, too Ii-isra’el we fop a ndiid’a lool.

²Isbaal koy a jeg’a goor ɗik waa adooxanoogna song ke, da ne’el Baana fa Rekab. Beebensame a ndeeƭu, a ndef xa ƥiy Rimon fee genna Beerot. Beerot koy kaa ɗeetel nen maa fogna no fiisel ole Bensame.

³Wiin we ngen’ina maaga kaa ƈuf’u, a njaɓnook Gitayim, too xa taan den a maada maaga boo no ñaal ne xaye.

⁴Yoonatan fee o ƥiy Sawul a jeg’a o ƥiy onqaa lafañ’ina. Xa kiid xa ƥetaq a jeg’u, ye o eeg ole Sawul fa Yoonatan a inoorna Yisre’el. Oxe yaalooguuna kaa jang’un, ndax ta ƴuf fo ten, ndaa kam ñofandax ne, o goor ole a ɓostooxa, a yen soo a lafañit maaga. O goor oleene Mefibaal[5] a ne’’e.

⁵Rekab fa Baana we xa ƥiy Rimon fee genna Beerot a ndeta maa Isbaal njoloor o mbuc, a soƥin ta yongat boo a ref no ƭaan.

⁶O tew oxe fod’ina na carind ale, a jilaa bele kaa nimoogu boo a ɗaanaa. Naaga Rekab fa Baana fee o maag um a naaga yelem,[6]

⁷a ndok kam mbind ne Isbaal a ɗaanoogna took njong um kam a ndok ale ta fe’aa. A ndibaan boo ta xon, soo a ƭeg xoox le, a ndet fo ten. A ndeefa na xa saawit axaa Yordaan, a ndef no ñaaƴaa kam o yeng ole fop.

⁸A ƥisa xoox le Isbaal maa no maad Dawid reeƭna Hebron, soo a layin ee: «Daali maad fee o yaal in, xoox le Isbaal fee o ƥiy Sawul fee o pañ of bug’oonga o war oxey. Xaye o Yaal oxe a rabdinooxanaang took Sawul fo xa taan um.»

⁹Kaa koy, Dawid a doona a Rekab fa Baana fee o maag um ndefna xa ƥiy Rimon fee Beerot ee: «Ne ta wooritna yee o Yaal oxe xe ñoowaa, ten fee sutaxama na naqad fuu refna,

¹⁰neene a woortu yee oxe eegiid’axama a Sawul, a foog ee o nan o felu a ɓisiidaxam, damnaanum soo warnoortin Siklag. Neene mat saɗgit’anum no nan o felu le ten.

¹¹Yaaga boog, nam warum o saɗgit saasaay kaa mbaritna o koor o cofu no mbind um, took-ee-took njong um? Ndiiki koy, xam laamit a nuun fo’oy um, moocand a nuun took lanq ke.»

¹²Ne Dawid a heblituuna, xiixire we ten a mbara a Rekab fa Baana, a ƭeg itam xa ƥay axe fo a caf ake den soo a lok a den paam Mbalka naa Hebron. Cinj kaaga, a ngaska xoox le Isbaal na mboy alaa Abineer refna Hebron.