Read NQAARIIT NE ROOG 2 Sami’el 6 Bible Online

2 Sami’el 6 - NQAARIIT NE ROOG bible

2 Sami’el 6

¹Dawid a fokatahina xiixire we moƴna o saɗ kam Isra’el, soo da ndef goor cuni qarɓeen tadik.

²Dawid fo xiixire weene fop a inooxa, a ndet Baale fee Yudaa, ndax da ƥisiid arka ne no ngiɓoor ne Roog fee gon um a refna o Yaal oxe Hupna fop, too pindel yeeyetax ƭik a ndeegoox uum-maamaad le ten.

³A ndoona arka ne Roog took a sareet a qas, a nqottin no mbind naa Abinadab reeƭna took ñaang. Uusa fa Ahyo we xa ƥiy Abinadab a ƭoxa a sareet a qas aleene.

⁴A ƥistiidaan boog no mbind Abinadab naa reeƭna took ñaang. Ahyo a fod mbaambir.

⁵Dawid fo Ii-isra’el lakas we fop kaa mbakoogu, a mbecaa mbaambir no Yaal oxe, a ngimaa a yoonandtin xa qos pakir mayu[9]: A tiiti fo fo nqilimb fo a ñal fo a tog fo a qiin.

⁶Ye da mbadiidna no cukand naa Nakon[10], Uusa a letna o ɓay um, a dam arka ne Roog, yaam qoox ke kaa tolof’u.

⁷Maaga, fuux le no Yaal oxe a biltooxana a Uusa, soo ta xawin yaam tooñ[11] neene ta fi’na. Uusa a xona maaga paam arka ne Roog.

⁸Dawid a fuux’a lool no ke o Yaal oxe a duguñ’ina a Uusa. A ne’a o mbiñ onqaaga Peres-Uusa[12]. Gon leene a maadu o xoyeel boo xaye.

⁹No ñaal naaga, Dawid a saɗar’a o Yaal oxe lool, a lay ee: «Nam um waagkaa o saqit arka ne no ngiɓoor ne no Yaal oxe no mbind es?»

¹⁰Dawid bug’ee o ɓek arka ne no Yaal oxe no mbind um ne refna na Ƥak ale Dawid. A ɓisaan no mbind Obed-Edoom fee inoor’ina Gaat.

¹¹Arka ne no Yaal oxe a jeg’a a qool a tadak no mbind Obed-Edoom fee inoor’ina Gaat, soo o Yaal oxe a barke a Obed-Edoom fo ƥasil um fop.

¹²O maad Dawid a yegne yee o Yaal oxe a barke’’a a Obed-Edoom fo ke ta jegna fop yaam arka ne Roog reeƭna me ten. Maaga, Dawid a reta, a xotik arka ne Roog no mbind Obed-Edoom, ta ɓisel fo o mbelakinax na Ƥak ale Dawid.

¹³Yaa we saq’ina arka ne no Yaal oxe a mbi’na a taaraand ɓetaa fo leng, Dawid a sadaxta nqoox fo o xeel o giñu.

¹⁴Dawid kaa fi’oogu ke ta waagna no mbec mbaambir no Yaal oxe, a rokoox o jamb olaa fi’teena gaare.

¹⁵Dawid fo Ii-isra’el lakas we fop a ƥisiida arka ne no Yaal oxe Yeerusaleem, a yoonandtin xa soroxole fo a luuƥ.

¹⁶Ye arka ne no Yaal oxe a rokiidaa na Ƥak ale Dawid, Mikal fee o tew Dawid, a ref o ƥiy Sawul a wootnoorta no falangteer olaa. Maaga, a ga’a o maad Dawid a foolaa, a fecaa mbaambir no Yaal oxe, too a dalfooxaan o xeef no xeeñ um.

¹⁷A cinj ye arka ne no Yaal oxe a ɓisiideena boo a ɓekel na seek um kam ƭiif ne Dawid a sipan’uuna, Dawid a ɓoxota mbaambir no Yaal oxe sadax toxel fo sadax camsa’oor.

¹⁸Ye Dawid a ƴutna a ƥoxot ale no sadax ke, a barke’a xeet faa no gon no Yaal oxe Hupna fop.

¹⁹A lasa xeet faa fop, faan laa no Ii-isra’el waa, goor fo rew, oxuu refna o gaf fo o ɗeg a tegeƴ o juɗe fo o gaf olaa fi’teena xa tim biiñ. Cinj kaaga, xeet faa fop a nqaada, oxuu refna no mbind um.

²⁰Ye Dawid a gataa, ndax ta simin wiin mbind um, Mikal fee o ƥiy Sawul a xetooxiidaan, a layin ee: «Ndaw o niwel o maak xaye no maad oxe Isra’el, ye ta hultooxna na kid no jeefeer we no dag we ten nen o kiin o ciriiñee tus!»

²¹Dawid a doona a Mikal ee: «Ha’aa! Mbaambir no Yaal oxe fecum, ten oxe jilaxama, um moƴanin a faap of fo ƥasil um fop, a dodaam um ɗoxaa a Isra’el fee xeet um. Ii, mbaambir no Yaal oxeene mat fecum,

²²too jaɓaam sax o moƴ o xeefel keene, soo moƴ o neewandoox na kid of, ndaa andaam rek ee yaqankee jeefeer weene o ne’aa ne a niwaam.»

²³Mikal fee o ƥiy Sawul koy, jeg’ee o ƥiy boo neen a xonu.