Read NQAARIIT NE ROOG 2 Sami’el 7 Bible Online

2 Sami’el 7 - NQAARIIT NE ROOG bible

2 Sami’el 7

¹Ye o maad Dawid a jangooxna no mbind no maad ne ten, too o Yaal oxe a ci’’un a ñootnax, yaam a mucil’un no fañ we ten fop mbid’uuna,

²a moofa boo bes ta lay a Natan fee o tuleer oxe yee: «Kaam gen no mbind naa jalteena a teex ndaxar seedar, soo arka ne Roog koy a laqel kam ƭiif. Xar xalaato no kaaga?»

³Natan a doonaan ee: «Andaam koy ee ñakiro teen a qalaat, fi’i rek ke refna no yiif of, yaam o Yaal oxe xey fa wo.»

⁴Kaa koy, no yeng olaaga sax o Yaal oxe a dawna a Natan xa ƭelem axeeke:

⁵«Reti layanaam a Dawid fee o tag es ee: ‹O Yaal oxe kaa tee: Ndax wo na maxankaxam Mbind ndax um gen teen?

⁶No kaa xotitna no ñaal naa sutuuma Ii-isra’el we Misira boo no ñaal ne xaye, mosiim o gen kam mbind. Kaam jangooxoogu o mbiñ fo mbiñ, soo ƭiif a ref Ngenand es.

⁷No me jangooxuuma fo Isra’el fop, mosiim o lay o leng na carind ake hebluuma da ngay a Isra’el fee xeet es ee: Xar taxu maxaniraamo Mbind a teex ndaxar seedar?›

⁸Ndiiki koy, fat o layanaam a Dawid fee o tag es ee: ‹O Yaal oxe Hupna fop kaa tee: Mi o mat xottong no ged laa no paal ke gayoogoona, ndax um fi’ong o ƭooɗox Isra’el fee xeet es.

⁹Muu retoogoona, kaam refoogu fa wo, saŋkaa fañ we wo fop mbaambir of, too xam fi gon of a siwit nen a kon ake no wiin maak we ndefna no lanq ke.

¹⁰Xam ci a Isra’el fee xeet es o mbiñ onqaa um dalinkan, ndax ta genaa maaga. Yo’inkataand, too fiifi paaxeer we toroxandkatiran ne da mbi’tooguuna yaaga,

¹¹no kaa xotitna no camaane kaa dalnanuuma a Isra’el fee xeet es haahate. Xam fi o ƴutoor fo fañ of we mbidoonga fop. Mexe yegnang ee: Mi o Yaal oxe, xam maxanong mbind[13].

¹²Hap of a fadangaa, boo o dab daan of, xam sutit na wo dugatin soo saƭkand maat um.

¹³Oxeene mat na maxankaxam Mbind, too xam saƭkand uum-maamaad um boo kili.

¹⁴Xam ref faap um, ta ref o ƥees. Boo ta fi’na paaxeer, xam yartin o samb ole no wiin we fo a pad a kiihiin.

¹⁵Kaa koy, watinkiim o mbeq es no ten ne watnitanuuma na Sawul fee inuuma mbaambir of.

¹⁶O kurcala of fo maat of xan a maadaa kili mbaambir es, soo uum-maamaad le wo a saƭkandel boo faw.› »

¹⁷Natan a laya a Dawid fop ke o Yaal oxe a lay’uuna kam mbeeñil naaga.

¹⁸Maaga, o maad Dawid a gara, a moof mbaambir no Yaal oxe, a xeɗin ee: «Wo o Yaal oxe na refkaa boo faw, mi fo ƥasil es, xar i ndefu boo o fadniid a in mene?

¹⁹Ndaa sax, wo o Yaal oxe na refkaa boo faw, keene deyirang boo o fi’an ƥasil es a tegit alaa na fadnooxkaa no camaane miñu ke na ngaraa, soo doon teen yegnaam o ten, mi fee o tag of refna o kiin soom.

²⁰Wo o Yaal oxe na refkaa boo faw, xar um doonkahinaa teen, yaam andaxamo, mi fee o tag of?

²¹Fi’aa boo yegnaam tig magnu keene, mi fee o tag of, ndax o fadin a tegit of fo o bug of.

²²O Yaal oxe Roog es, kaam ee wo magnu! Ke i nanoodna a lalta yee o leng nandee fa wo, too roog fa lakas jegee, a refangee wo.

²³Jegee took lanq ke xeet fa lakas faa nandna fa Isra’el fee xeet of. Ndax a jega xeet fa lakas faa watiidoona, fi’in xeet of, ndax gon of a joot? Fi’anaa a in a pi a maak a saɗarnooxu. Watantaa a xoox of xeet of no saax laa Misira soo rax a saax a can ake fo roog ke den mbaambir um.

²⁴Dalnaa a Isra’el fee xeet of, ndax ta ref xeet faa jegoodoona boo kili, soo wo o Yaal oxe o ref Roog um.

²⁵Ndiiki koy, o Yaal oxe Roog es, geeki boo kili a tegit ale yegnaxamoona, mi fee o tag of fo ƥasil es, o fadnin ne laytanoona. Yaasam ta jegit neene!

²⁶Yaaga xan gon of a simatel boo kili, ta layel ee: ‹O Yaal oxe Hupna fop refu Roog fee Isra’el!›, soo mbind es, mi Dawid fee o tag of, a maadaa kili mbaambir of.

²⁷O Yaal oxe Hupna fop, Roog fee Isra’el, wo fa xoox of o mat yegnaxam ee: ‹Xam maxanong mbind!› Ten taxu mi fee o tag of, um jeg njambaar naa diistoonga a qeƭ alene.

²⁸Ndiiki koy, wo o Yaal oxe na refkaa boo faw, wo refu Roog, fa lay of ndigil kak a refu, soo o regaam, mi fee o tag of, paax keene.

²⁹Yaaga boog, barke’i mbind es, ndax ta maadaa boo kili mbaambir of, yaam wo o Yaal oxe na refkaa boo faw, wo layun, too na pexey barke of xan mbind es, mi fee o tag of, a barke’el boo faw.»