Read NQAARIIT NE ROOG 2 Sami’el 8 Bible Online

2 Sami’el 8 - NQAARIIT NE ROOG bible

2 Sami’el 8

¹Cinj kaaga, Dawid a xawa Fiifilista we, a fudin a den soo a jaɓit na den sañ-sañ den no jegel ole.

²A xawa itam Moomowaab we, a ser a den da ƭaasoox a lanq too a warnoora ɗik no daduk wuu ndefna soo a xaƴ o leng oxe ta ñoow. No kaa xotitna maaga, Moomowaab we a ƥoxotooxa na Dawid, a ndabdatan a bateer.

³Dawid a xawa a Hadadeseer fee maadooxoogna Cooba kam Araam too a ref o ƥiy Rehob, ye oxeene a bugna o jangatin o jegel ole no xuluɓ ole Ofrat.

⁴Dawid a janganaan ŋaaŋaay pis juni fo ŋaaŋaay pis teemeed ɓetuu ƭik, fo xiixire ñaañaaƴ cuni qarɓeen ƭik. A ɗega xa tod axe no pis ke fop, a cinj ye ta kesna teen teemeed.

⁵Aa-araam we Damaas a ƈufgiida a Hadadeseer fee o maad Cooba, soo Dawid a war na den goor cuni qarɓeen ƭik fo goor cuni ƭik.

⁶Cinj kaaga, Dawid a dalna xiixire kam Araam fee Damaas, soo Aa-araam we a ƥoxotoox na Dawid, a ndabdatan a bateer. Neene, muu Dawid a ret’ina, o Yaal oxe a ci’oogaan o ndam.

⁷Dawid a janga pegoor wurus ke xiixire we Hadadeseer a saq’ina, a ɓis a den Yeerusaleem.

⁸O maad Dawid a jangtahina xanjar fa mayu Betah fa Berotay mbogna no teeru ke Hadadeseer.

⁹To’u fee o maad Hamat a yega yee Dawid kaa xaw’u xiixire we Hadadeseer fop.

¹⁰A lula o ƥeem Yoraam maa no maad Dawid, ndax ta daawnin simin um soo a kañin, yaam ne ta songna a Hadadeseer, a xawin. Ke garitna keene koy refu yee To’u kaa fañroogu fa Hadadeseer. Yoraam a ɓislooxiida a Dawid kaa jalteena xaaliis fo kaa jalteena wurus fo kaa jalteena xanjar.

¹¹O maad Dawid a kesanaan o Yaal oxe ne ta fi’it’uuna na xaaliis fee fa wurus fee ta jaɓit’ina no qeet keeke ta xaw’ina fop:

¹²Aa-araam we, Moomowaab we, Aa-amon we, Fiifilista we fo Aa-amalek we. Neene a refit’u no kalal ke ta jaɓit’ina na Hadadeseer fee o ƥiy Rehob, o maad Cooba.

¹³Dawid a moƴ’a o jeg gon, ye ta waritna Ee-edoom[14] cuni xarɓaxay fo cuni ɓetuu tadik we na yulanq alaa no fo jem olaa, a soƥ ta xaw Aa-araam we, boo a gataa.

¹⁴Dawid a dalna xiixire kam Edoom fop, soo Ee-edoom we fop a ƥoxotoox no ten. Neene, muu Dawid a ret’ina, o Yaal oxe a ci’oogaan o ndam.

¹⁵Dawid a maadooxanooga a Isra’el fop. A ƭat fo o cofel rek a ɗoxtoogu xeet um.

¹⁶Yowab fee o ƥiy no tew o ne’e Seruya reeƭu farɓa fa maak fee ten, Yosafat fee o ƥiy Ahilud a ref o keegeek cosaan oxe,

¹⁷Saadok fee o ƥiy Ahituub fa Ahimelek fee o ƥiy Abiyataar a ndef saasadax we, Seraya a ref o piibind oxe,

¹⁸Benaya fee o ƥiy Yehoyada a adooxan Keekeret we fo Peepelet we yetooxoogna o maad oxe, soo xa ƥiy axe Dawid a kelfa[15] weene fop.