Read NQAARIIT NE ROOG 2 Sami’el 9 Bible Online

2 Sami’el 9 - NQAARIIT NE ROOG bible

2 Sami’el 9

¹Na bes fa leng, Dawid a laamta yee: «Ndax yoqee o leng oxaa na ñoowaa no ƥasil ne Sawul, ndax um lalin o paaxel es yaam Yoonatan?»

²Ƥasil ne Sawul koy a njeg’a o tag oxaa ne’’eena Siba. A ɓisiide me no maad oxe. Dawid a laamtaan ee: «Wo refu Siba?» A doonaan ee: «Ii, daali maad.»

³O maad oxe a laamtaan ee: «Ndax yoqee o leng no ƥasil ne Sawul, ndax um waag o lalin o paaxel ole Roog?» Siba a doonaan ee: «A yoqa o ƥiy onqe Yoonatan de, ndaa kaa lafañ.»

⁴O maad oxe a laamtaan ee: «Mam a refu?» Siba a doonaan ee: «Oxaay no mbind Makiir fee o ƥiy Ami’el na saate faa Loo-Debar.»

⁵O maad Dawid a lulta o ƥiy onqe Yoonatan a xotkel no mbind Makiir fee o ƥiy Ami’el na saate faa Loo-Debar.

⁶Ye Mefibaal fee o ƥiy Yoonatan too a ref o ndaan Sawul a fadiidna me Dawid, a dalfooxa o gung a lanq. Dawid a xoyaan ee: «Mefibaal!» A doonaan ee: «Mexey, mi fee o tag of.»

⁷Dawid a layaan ee: «Ba o saɗar dara. A woora yee xam lalong o paaxel es yaam Yoonatan fee faap of. Xam daknong lanq ke maam-koor of Sawul a jeg’ina, too xan o fogataa fa mi o roon kili.»

⁸Mefibaal a gunga a lanq soo a lay ee: «Daali maad, xar refum boo o topatooxaam, mi fee refna o ɓox o xonu?»

⁹O maad Dawid a dalfooxa o xoy a Siba fee reeƭna o tag Sawul, a layin ee: «Cooxaam o ndaan no yaal of fop ke Sawul fo ƥasil um a njeg’ina.

¹⁰Fat o xooxanan xa qol um, wo fo xa ƥeef fo dag of, ndax mbind no yaal of a njegaa ñoowir. Yaqanee koy, Mefibaal fa xoox um fa mi a bugko fogaa o roon.» Siba a jeg’a xa ƥiy xa koor xarɓaxay fo xa ƥetaq fo dag qarɓeen ƭik.

¹¹Siba a laya o maad oxe yee: «Daali maad, xam fi fop ke heblaxamoona, mi fee o tag of.» No kaa xotitna maaga Mefibaal a ñaamoogata no roon ole Dawid nen xa ƥiy axe no maad oxe.

¹²Mefibaal a jeg’a o ƥiy o ngoor o ne’e Miika. O ndeɓandoong a maad’u o refaa. Ƥasil ne Siba fop dag Mefibaal a ndeeƭu.

¹³Mefibaal Yeerusaleem a gen’atu, ndax ta fogaa fo o maad oxe o roon. A caf ake ten fop koy kaa lafañ’u.