Read NQAARIIT NE ROOG 1 Maad we 10 Bible Online

1 Maad we 10 - NQAARIIT NE ROOG bible

1 Maad we 10

¹O maad o tew oxe Saba a nana o jeg gon ole Salomo no ndam onqe no Yaal oxe a layteel. Maaga a gara, a ɗeetloortiidin a nax-o-gut.

²A fadiida Yeerusaleem, a yoon fo a ƭat a maak fo keeleemb kaa sufna pelu tuñ fa wurus fa mayu fo a ƥil a cafeñu. A gara me Salomo, a laamtin fop ke ta fof’ina no xeeñ um.

³Salomo a tekta o tew oxe fop ke ta laamit’uuna, too jeg’ee dara kaa laqoox’ina a Salomo boo waagiran o tekit.

⁴O maad o tew oxe Saba a horooxa o and o maak ole Salomo, a ga mbind ne ta maxin’ina

⁵fo xa tox axe ndiƈiidoogeena, o genand ole no dag we ten, o far ole fo a tokax ake no we njalanooguuna fo we topatooxoogna a yer ale ten, a ga itam sadax toxel ke Salomo a ɓoxotoogna kam Mbind ne no Yaal oxe. A dama o don

⁶soo a lay o maad oxe yee: «Ke nantuuma no saax es kañ no kaa farna na fa lay of fo no and of, ndigil kak oo.

⁷Ye um helkaa fo gar, ga’an a xoox es, gim’iim ke layoogeema. Kaa koy, fop ndigil oo, too sax wetandoox’aandeem genwal fee. O and of fo halal of a ngupa fop ke nan’uuma ta layteel.

⁸Wiin of fo dag of a ƭaaya, den we ngenna fa wo kili, a nan-gilooxaa o and ole wo.

⁹O Yaal oxe Roog of a hela o simatel, ten fee feloona boo ta fi’ong o maad Isra’el. Ne o Yaal oxe a fexna a Isra’el boo faw, taxu ta dalnong o maad, ndax o lalit a ƭat fo o cofel.»

¹⁰Cinj kaaga, o maad o tew oxe Saba a ci’a o maad Salomo ngap parig qarɓeen nahik wurus fo pelu tuñ fo a ƥil a cafeñu mayu mayu. Qeeñe-xeeñe maytu naaga mos’ataand o ƥisiid kam saax le Isra’el.

¹¹A kaal ake no maad Hiiram ƥistiid’ina wurus no saax laa Ofiir, a ngarit’a itam a teex ndaxar santal fo a ƥil a cafeñu mayu mayu.

¹²O maad Salomo a fi’ta a teex ndaxar santal ake a pang ale no Mbind ne no Yaal oxe fo ale no mbind no maad ne. A sexan’ahina teen giigim we fo nqilimb fo a tiiti. A teex santal a maytu naaga mos’ataand o ƥisiid kam Isra’el too mos’ataand o nga boo no ñaal roog ne xaye.

¹³O maad Salomo a ci’a o maad o tew oxe Saba fop ke ta bug’ina too ta xeɗ’un o ten, fogreerna fo ci’it lakas ke ta coox’uuna, andoona yee o maad o nandu nen a Salomo soom waag’u o ci’it a den. Cinj kaaga, o maad o tew oxaa fo a ƭat um a nqaada no saax den.

¹⁴O meɗel ole na wurus fee Salomo a daawoogna o hiid oo hiid a reeƭa ngap parig teemeed ƭik fo parig qarɓeen ƭik,

¹⁵fogreerna fo ke hatoogna na bateer ake no jula maak we fo no jiijikax we fo no maad we Arabi fop fo no gofornoor ke no saax le.

¹⁶Salomo a jalna pegoor maak teemeed ƭik wurus fa nqawe, too nuu refna teen a fi’it’e ngap kilo ɓetuu fa leng fo liibar.

¹⁷A jalnahina pegoor teɓ teemeed tadik wurus fa nqawe, nuu refna teen a fi’tel ngap kilo fo liibar fa genwal liibar. A ɓeka a den no tabax ne na xoyeel Suungaan le Libaŋ.

¹⁸O maad oxe a jalna uum-maamaad maak laa mosandteena a ñiiñ fa ñiig soo a laarel wurus fa nqoolu.

¹⁹Uum-maamaad leene a jeg’a o toŋ-toŋ olaa jegna xa takand ɓetaa fo leng. A jeg’a no keƈnoor ke nitaal xoox o xeel, toonir xa ƥay a mbi’el no saax oluu refna, nitaal cogoy ƭik keenooxu a ndef na xa saax axe.

²⁰Nitaal cogoy xarɓaxay fo cogoy ƭik keenooxu a mbi’’e no toŋ-toŋ ole, ɓetaa fo leng na janoon, ɓetaa fo leng na ñamaak. Kaa nandna neen, mos’aand o fi’an maat leng.

²¹A tokol ake no maad Salomo fop wurus a ndeeƭu, xa ƥaxañ axe no tabax ne na xoyeel Suungaan le Libaŋ fop a ndef wurus fa nqoolu. Jeg’ee dara kaa fi’teena xaaliis, yaam na jamaane Salomo xaaliis fee kaa ɗeetoogel nen kaa mayeerna o njiriiñ.

²²O maad oxe a jeg’a no maag ole a kaal a maak a cula’ir akaa na ndetaa Tarsis, a yoon fo a kaal ake Hiiram. Jaf leng na xa kiid xa tadaq axuu ndefna, a kaal akeene a ngatoogu, a ƥisiid wurus, xaaliis, a ñiiñ fa ñiig, a koy fo a lamjaata.

²³O maad Salomo hup’u maad lakas we no lanq ke fop halal, a hup a den o and itam.

²⁴Wiin we a inoorooga muu refna, a ƭeetiidaa a Salomo, ndax da nan-giloox o and o maak ole Roog a ci’uuna.

²⁵O hiid oluu refna, wiin weene fop a ƥisiidooga a Salomo ci’it: kaa jalteena xaaliis, kaa jalteena wurus, ñirax, ƥonax, pelu tuñ, pis fo perkele.

²⁶Salomo a fokata a sareet-xire fo pis boo a jeg a sareet juni fo teemeed nahik fo ŋaaŋaay pis cuni xarɓaxay fo cuni ƭik. A geek’a leng-leng teen paam um kam Yeerusaleem, lakas ke mat, ta pasar a den no teeru yetooxand ke.

²⁷O maad oxe a tax’a boo xaaliis fee a mayit nen a ƥil ake kam Yeerusaleem, soo taxar seedar ke a mayit nen paƭat ke ndefna no jegel ole na yulanq ake.

²⁸Pis ke Salomo Misira[8] fa Silisi a inoor’u. Jula we no maad oxe njiktikoogu a den maaga fa xaaliis.

²⁹A sareet a leng alaa ɓistiideena Misira a jarooga xa monjong teemeed ɓetuu fa leng xaaliis fa nqoolu, soo pis leng a jaraa xa monjong teemeed fo xa monjong qarɓeen ƥetik. Jula weene koy, a ƥisaniidooga itam maad we no Heeheet we fo maad we Araam.