Read NQAARIIT NE ROOG 1 Maad we 11 Bible Online

1 Maad we 11 - NQAARIIT NE ROOG bible

1 Maad we 11

¹O maad Salomo a bugir’a fo rew jan mayu, fogreerna fo o ƥiy o ndew onqe Firawon fee. Rew weene kaa ndeeƭu Moomowaab, Aa-amon, Ee-edoom, Siisidoŋ fo Heeheet,

²mbog’ina no qeet ke o Yaal oxe a ne’oogna, ye ta layna Ii-isra’el we yee: «Nu ndetkee maa den, too ngarkee me nuun, yaam ndik da ƭooqloox a nuun nu mbaɗook roog ke den.» Kaa koy, mbug a ɓeka a Salomo ta hiɓoor fa den.

³Neene, Salomo a jeg’a rew lingeer teemeed ɓetuu ƭik fo keƈ-a-salma teemeed tadik. Rew weene mat ƈax’un nof.

⁴Ye Salomo a nogoyna, rew weene a ƈaxaan nof, a ƥakandin no roog lakas ke, boo xeeñ le Salomo fop refan’atee o Yaal oxe Roog um, ne le Dawid fee faap um a refanit’ina o Yaal oxe.

⁵Salomo a faɗooka a Astarte fee refna roog fa ndew fee no Siisidoŋ we fa Milkom, roog fa sednooxu fee no Aa-amon we.

⁶Salomo a fi’a kaa faaxeerna na kid no Yaal oxe too reefee a ƭat um ne waritna, ta guutatir fo ne Dawid fee faap um a fi’it’uuna.

⁷Maaga, Salomo a maxa a ñaang a sadaxand took o joong olaa jasnoorna fa Yeerusaleem, a maxan a den a Kemos, roog fa sednooxu fee no Moomowaab we, fa Milkom, roog fa sednooxu fee no Aa-amon we.

⁸A fi’ana leng kut ke roog ke no rew jan we ten fop, ndax da ƥoxotaa a den cuuraay fo sadax.

⁹O Yaal oxe a dalfooxa o fuuxan a Salomo, yaam kaa fes’u a cinj fo xeeñ um fop o Yaal oxe Roog fee Isra’el feeñoox’uuna boo a caf a ƭak.

¹⁰A maƭoox’aan a qoolu yee baa hiɓoorik fo roog lakas, ndaa koy Salomo nanan’ee o Yaal oxe.

¹¹Maaga, o Yaal oxe a laya a Salomo yee: «Feek neene fi’tano, fañ o gay ngiɓoor es fo bargal es ke coox’oonga, xam suqtit maat ne na xa ƥay of, cooxin o tag of.

¹²Kaa koy, fi’kinum no ñoow of yaam Dawid fee faap of, ndaa no ɓay no ƥeef um suqtitkan.

¹³Refee koy ee maat ne fop um suqitkaa. Xam xaƴan o ƥeef a carind a leng yaam Dawid fee o tag es fo yaam Yeerusaleem fee jiluuma.»

¹⁴O Yaal oxe a sutana a Salomo o pañ. Oxeene Hadad a ne’’e, a ref o Ee-edoom, a fog no ƥasil no maad ne Edoom.

¹⁵No camaane ke Dawid a xawna Ee-edoom we, Yowab fee farɓa fa maak um a yoon’a fo a yaj, da ngasik xiixire Ii-isra’el we nqon’ina na ñoq alaa. Cinj kaaga, a wara goor we Edoom fop.

¹⁶Yowab fo xiixire we Isra’el fop a yoq’a Edoom a qool ɓetaa fo leng boo neen a mbaru goor we Edoom fop.

¹⁷Yaaga fop koy, Hadad fee maad’ina o refaa o fes o deɓ a ƴuf’a Misira, ten fo Ee-edoom leng-leng waa ndeeƭna dag faap um.

¹⁸A inoora Majan, a ndet Paaraan, a nqotit maaga goor leng-leng soo a ngar maa Firawon fee o maad Misira. Firawon fee a cooxa a Hadad mbind, a saq o ñoow um soo a ci’in lanq.

¹⁹Hadad a daawa yirmande fee Firawon boo ta ci’in o ndeɓ no teem ta dolooxankin, o ndeɓ o ndew no kelwaar o tew oxe ne’eena Tahpenes.

²⁰O ndeɓ o ndew onqeene na Tahpenes a rimana a Hadad o ƥiy o ngoor, soo ta ne’in Genubat. Tahpenes a ɓisa o njaaƈ onqe no mbind Firawon fee, ta yaroox maaga fo xa ƥiy axe Firawon fee.

²¹Ye Hadad fee maad’ina o refaa Misira a yegna yee Dawid a daba daan um, ten fa Yowab fee reeƭna farɓa fa maak fee ten, a laya a Firawon fee yee: «Xaƴaam um nomtoox no saax es.»

²²Firawon fee a laamtaan ee: «Ndi xar ñako a paam es? Xar taxu o waaƭaa maa nomtoortoona no saax of?» Hadad a doonaan ee: «Ñakiim dara, ndaa xaƴaam rek um ret.»

²³Roog a ɓaata o sutan a Salomo o pañ o lakas refna Reson fee o ƥiy Elyada ƴufit’ina no mbind no yaal um Hadadeseer fee o maad Cooba,

²⁴ye Dawid a duguñaa xiixire we Hadadeseer. Reson kaa fokat’u goor, a refat o aa-adax a yaj, da ndet Damaas, a ngen maaga boo ta maadooxataa Damaas.

²⁵No ñoow o ñis Salomo fop, Reson o pañ Isra’el a reeƭu, a fi’an paaxeer nen a Hadad, a siiknoor fa Isra’el no camaane ke ta maadooxanna a Araam fop.

²⁶Yerobowam o ƥiy Nebat a reeƭu, a ref o Ee-efrayim, a gen Sereda, ya um a ref o ñaaw o ne’e Seruwa.

²⁷O ten koy, o tag no maad Salomo a reeƭu soo a siiknoor fo ten. Keeke o mat tax’u ta siiknoor fo o maad oxe: No camaane ke Salomo a maxnaa uum lanq le na xoyeel Milo soo a suxaa o gom ole reeƭna no saŋe ne na ƥak ale Dawid fee faap um,

²⁸Yerobowam o fes o jegu doole too a jaflax a reeƭu. Ye Salomo a ga’na yee kaa fi’aa calel um ne waritna, a doxnaan a yetax ale no calel sertel ke na carind ale Yoseef[9].

²⁹Bes, Yerobowam a sutoora Yeerusaleem, a xet na ƭat ale fo tuleer Ahiya fee genna Silo, ta rokoox sabadoor nqas. Den ɗik soom ndeeƭu kam a koƥ ale.

³⁰Ahiya a janga sabadoor ne, a xuuyin a laƥ xarɓaxay fo a laƥ a ƭak.

³¹A laya a Yerobowam ee: «Jangi a seek xarɓaxay ake, yaam keeke o Yaal oxe Roog fee Isra’el a layu: ‹Ga’angi, xam suqtit maat ne na xa ƥay Salomo soo cooxong teen a carind xarɓaxay.

³²A carind a leng soom um xaƴankan yaam Dawid fee o tag es fo yaam Yeerusaleem fee refna teeru fee jiluuma ndeer a carind ake Isra’el fop.

³³Xam fi keene, yaam Ii-isra’el we kaa mbaasaam soo a ngungaa mbaambir Astarte, roog fa ndew fee no Siisidoŋ we fo mbaambir Kemos, roog fee Mowaab fo mbaambir Milkom, roog fee no Aa-amon we. Ñaaƴee na ƭat es, mbi’ee kaa faaxna na kid es too ngayee bargal es fo ke simtuuma, ta guutatir fo ne Dawid fee faap Salomo a fi’tuuna.

³⁴Suqitkafuliim maat ne fop na xa ƥay Salomo, ndaa xam xaƴin ta maadoox no ñoow o ñis um fop yaam Dawid fee o tag es jiluuma too ta gay kebil es fo bargal es.

³⁵Kaa koy, xam suqtit maat ne na xa ƥay no ƥeem soo cooxong teen a carind xarɓaxay.

³⁶Xam coox o ƥeem a carind a leng, ndax Dawid fee o tag es a jegaa kili o leng na xa taan um oxaa na maadooxaa mbaambir es kam Yeerusaleem refna teeru fee jiluuma, ndax gon es a ƴufginooreel teen.

³⁷Wo Yerobowam o mat, xam cooxong a carind xarɓaxay ake Isra’el, o maadooxan a den naa bugtoona.

³⁸O nan-gilooxangaa fop ke um hebilkang, ñaaƴ na ƭat es, fi’aa kaa jofna na kid es, doon teen gay bargal es fo kebil es, ne Dawid fee o tag es a fi’it’uuna, yaaga xam ref fa wo, fi’ong o maad Isra’el, ci’ong xa taan axaa na maadooxaa boo kili nen xa taan axe Dawid.

³⁹Neene, xam neewand xa taan Dawid, ndaa refkee boo kili.› »

⁴⁰Maaga, Salomo a waaƭa maa ta waritna a Yerobowam, ndaa oxeene a ƴufa Misira, a jaɓnook maa Siisak fee refna o maad oxe no saax laaga. A moofa Misira boo neen Salomo a xonu.

⁴¹Ke yoqna na pi ake Salomo, ke ta fi’na fop fo o and ole ten, kaa mbindel no «Safe le na pi ake Salomo».

⁴²Salomo a maadoox’a xa kiid qarɓeen nahik kam Yeerusaleem, too took Isra’el fop a maadooxoogu.

⁴³Cinj kaaga, Salomo a daba daan um, a gasel na teeru fee faap um Dawid, soo o ƥeem Rehabewam a rondandin.