Read NQAARIIT NE ROOG 1 Maad we 12 Bible Online

1 Maad we 12 - NQAARIIT NE ROOG bible

1 Maad we 12

¹Rehabewam a reta Sikeem, yaam Ii-isra’el we fop kaa ngar’u maaga, ndax da ndodin o maad.

²Yerobowam fee o ƥiy Nebat a yegtaan Misira, maa ta ƴuf’ina, ndax ta daɗ o maad Salomo.

³A carind ake no ɓemb-roog o janoon a nqoynika a Yerobowam. Maaga, a yooniida fo Ii-isra’el we fop, a lay a Rehabewam ee:

⁴«Faap of kaa roxond’u a in a toq a meɗu. Ndiiki koy, yelefandani a in a toq aleene hatna na faap of, too ta meɗ dis, yaaga xan i ndagooxong.»

⁵Rehabewam a doona a den ee: «Ndeer mene fo ñaal tadik fat nu nomtooxiid.» Maaga, xeet faa a ndeta.

⁶O maad Rehabewam a laamta maak waa asoogna a faap um Salomo, ye ta ñoowaa. A laya a den ee: «Xar nu askaxam kaa doonuuma xeet fene?»

⁷Maak waa a layaan ee: «Me ta refna xaye, o jaɓangaa fi’oox o tag xeet fene, jalanin, doon a den o doonanqol o felu, yaaga xan a ndef dag of boo kili.»

⁸Kaa koy, o maad oxe a yapatila o as ole maak we a coox’uuna soo a laamtik xa pes xa kend um axe ndeeƭna fo ten too a yaroox fo ten.

⁹A laya a den ee: «Xeet fene kaa laamtaxam, ndax um yelefandan a den a toq ale faap es a roxond’ina a den. Xar nu nqalaatu yee kaaga i ndoonkaa a den?»

¹⁰Xa pes axe yaroox’ina fo ten a ndoonaan ee: «Layi keeke a xeet fee layoonga yee faap of kaa roxond’u a in a toq a meɗu, ndaa wo o mat, yelefandaneen a in: ‹O nqol o mbangdir onqe mi moƴu o magin ndet ne faap es.

¹¹Faap es a roxond’a a nuun a toq a meɗu, mi koy, xam roxond a nuun a toq alaa moƴna o meɗ. Faap es xa yar a yartoogu a nuun, mi koy, xa cap axaa ƭomitna nen ŋat a beex um yaritkaa a nuun.› »

¹²No ñaal ndadkandeer naa, Yerobowam fa xeet faa fop a ngara, a soƥiid o maad Rehabewam, ne ta layit’uuna a den.

¹³O maad oxe a doona xeet faa o doonanqol o ñexetu. A faña o reef o as ole maak we a coox’uuna,

¹⁴ndax a reef ke xa pes axe a as’uuna. A laya a den ee: «Faap es a roxond’a a nuun a toq a meɗu, mi koy, xam roxond a nuun a toq alaa moƴna o meɗ. Faap es xa yar a yartoogu a nuun, mi koy, xa cap axaa ƭomitna nen ŋat a beex um yaritkaa a nuun.»

¹⁵Neene, o maad oxe nan-giloox’ee xeet fee, yaam fop ke xew’ina no Yaal oxe a inoor’u, ndax ke ta lay’ina a reefandin na Ahiya fee genna Silo a fadnoox na Yerobowam fee o ƥiy Nebat.

¹⁶Ye Ii-isra’el we a nga’na yee o maad oxe nan-giloox’ee a den, a ndoonaan ee: «Xar i ndeeru fa Dawid? I mbogee dara fo o ƥiy onqe Isay. In Ii-isra’el we, fat i nomtoox no ƭiif in, wo o ndaan Dawid o mat, o topatook maat of.» Maaga, a ndalfooxa o nomtoox no ƭiif den.

¹⁷Ii-isra’el we ngen’ina no teeru ke Yudaa soom Rehabewam a maadooxanoogatu.

¹⁸Yaqanee koy, a hebla a Adoram fee yetooxoogna calel ke na serteel maa no Ii-isra’el[10] waa, ndaa weene a mbartaan a kac. Maaga, Rehabewam a dalfooxa o ŋaay na sareet-xire soo a ƴuf Yeerusaleem.

¹⁹Neene Ii-isra’el we a siiknoortu fo mbind Dawid boo no ñaal roog ne xaye.

²⁰Ye Ii-isra’el we fop a yegna yee Yerobowam a gata, a nqoynaan no mbokatax ne soo a ndodin o maad Isra’el fop. Neene, a carind ale Yudaa soom maad’u o damooxaa no mbind Dawid.

²¹Ndak fo ndak, ye Rehabewam a fadiidna Yeerusaleem, a fokata xir say cuni teemeed fo xir say cuni qarɓeen ɓetuu tadik waa mbogna na carind ale Yudaa fo na le Bensame, ndax da nqire’ik fa Isra’el boo a ser a den da ƥoxot maat ne a Rehabewam fee o ƥiy Salomo.

²²Kaa koy, Roog a laya a Semaya fee o kiin Roog ee:

²³«Layi a Rehabewam fee o ƥiy Salomo, too a ref o maad Yudaa, fo wiin we Yudaa fo we Bensame fop fo we yoqna na xeet fee yee:

²⁴O Yaal oxe kaa tee: ‹Ba nu ñoxorik fo Ii-isra’el we fog nuun! Fat oxuu refna na nuun a nomtoox no mbind um, yaam mi garu fo keene fop.› » A nanana fa lay fee no Yaal oxe soo a nomtoox, ne ta heblit’uuna a den.

²⁵Yerobowam a saƭkanda teeru fee Sikeem kam o jegel olaa na xa coong axaa Efrayim soo a gen maaga. Cinj kaaga, a inoora Sikeem soo a saƭkand teeru fee Penu’el.

²⁶Yerobowam a laya taa no yiif um ee: «A wootooxangee rek, xan maat ne a bug o nomtoox no mbind Dawid,

²⁷yaam o mat, xeet fene a narangaa o ndetaa Yeerusaleem, a ƥoxotik sadax no Mbind ne no Yaal oxe, xan a qeeñ den a nomtoox no yaal den Rehabewam fee o maad Yudaa. Neene, xan a mbaraam soo a ƥoxotoox no ten.»

²⁸A cinj ye o maad oxe a laamitna o as, a fi’na xa qeel wurus xa ƭaq soo a lay xeet faa yee: «Nu nqija no ndetaa Yeerusaleem! Nuun Ii-isra’el we, keeke ndefu roog ke nuun sutitna a nuun no saax laa Misira.»

²⁹Yerobowam a sipa leng no nitaal keene kam Betel, lakas ne ta doonin Dan.

³⁰Neene, a riña wiin we no mbakaadaa. Wiin mayu a yoona nitaal leng ne boo Dan.

³¹Yerobowam a maxna fo mbiñ fo tedu took a ñaang a sadaxand ake soo a dalin saasadax waa ta xotitna a ndeer xeet fee, too mbog’ee no Leelewi we.

³²Yerobowam a dalna ndoofeen naa na roofandeel no ñaal xarɓaxay fo ñaal ƥetkandeer ne no nqool o ɓetuu ndadkandeer onqe, ndoofeen naa nandna fo ne na jegaa kam Yudaa, soo ten fa xoox um, ta ɓoxot sadax ke took o sadaxand ole. Keeke refu ke ta fi’na Betel, ye ta ɓoxotna xa qeel axe ta fi’in’ina sadax soo a dalin saasadax kam Betel na ñaang a sadaxand ake ta fi’na.

³³No ñaal xarɓaxay fo ñaal ƥetkandeer ne no nqool o ɓetuu ndadkandeer onqe, Yerobowam a reta no sadaxand olaa ta fi’’ina Betel. Ten jilood’u bes feene, ndax ta fi’an teen Ii-isra’el we ndoofeen soo a ŋaay no sadaxand ole, ndax ta dox cuuraay fee.