Read NQAARIIT NE ROOG 1 Maad we 13 Bible Online

1 Maad we 13 - NQAARIIT NE ROOG bible

1 Maad we 13

¹O kiin Roog oxaa o Yaal oxe a hebil’ina a inoora Yudaa, a gar Betel, a soƥ Yerobowam a ref no sadaxand ole, a doxaa cuuraay fee.

²A falalooxa o sadaxand ole, ne o Yaal oxe a simit’uuna o ten ee: «O sadaxand ole, o sadaxand ole, keeke o Yaal oxe a layu: ‹Xan o ƥiy o ngoor a rimel no mbind Dawid, too Yosiya a ne’keel. Xan a sadaxit took of saasadax we na ñaang a sadaxand ake na ndoxaa cuuraay took of, too xan xa kiiƈ no wiin sax a ndoxtel took of!› »

³No ñaal leng kut ne a cooxta o anddiloor ee: «Keeke refu o anddiloor ole na lalitkaa yee o Yaal oxe layun: Xan o sadaxand ole a ɓaƈtoox, ndaw ke ndefna took fee a ƥaxoox.»

⁴Ye Yerobowam a nanna fa lay fee o kiin Roog oxe a falaloox’ina o sadaxand ole Betel, a letnita o ɓay um took o sadaxand ole ta reeƭna, a lay ee: «Ndameenoo!» Maaga, o ɓay ole Yerobowam a letin’ina farna fo ten a dalfooxa o xar boo waagatiran o nomtiid.

⁵Na waxtu faaga sax sax o sadaxand olaa a ɓaƈtooxa, ndaw ke ndeeƭna took fee a ƥaxoox, ne o Yaal oxe a layit’uuna, a reefandin no kiin Roog oxe.

⁶Ndak fo ndak, o maad oxe a laya o kiin Roog oxe yee: «Ngela xeɗooxanaam o Yaal oxe Roog of, ndax um waag o nomit o ɓay es.» O kiin Roog oxe a xeɗooxa o Yaal oxe, soo o maad oxe a sog o waag o nomit o ɓay um bo ta dakoox ne ta reeƭna.

⁷O maad oxe a laya o kiin Roog oxaa yee: «Gari yoon fa mi no mbind naa, ndax o ñaam soo um fi’anong ɗang.»

⁸Kaa koy, o kiin Roog oxe a doona o maad oxe yee: «O coox’angaam genwal fee no mbind of sax oo, taxkoogee um yoon fa wo. Ñaamitkiim mbuuru too yeritkiim foofi no mbiñ onqene,

⁹yaam o Yaal oxe kaa heblaam ee: ‹Ba o ñaam dara too ba o yer dara, too sax boo o xaadaa fat o jang a ƭat a lakas alaa fogreerna fo ale o retitkaa.› »

¹⁰Maaga, a janga a ƭat a lakas alaa fogreerna fo ale ta garit’ina Betel.

¹¹A jeg’a koy o tuleer o nogoyu xaa gen’ina Betel. Xa ƥiy axe ten a ngara, a mbetandooxin fop ke o kiin Roog oxe inoor’ina Yudaa a fi’’ina kam Betel fo ke ta lay’ina o maad oxe a koom.

¹²Maaga, faap fee a laamta a den ee: «A ƭat alum a xotu, ye ta retaa?» Xa ƥiy axe a lalaan a ƭat ale o kiin Roog oxe inoor’ina Yudaa a xot’ina, ye ta retaa.

¹³Faap fee a laya a den ee: «Ngumnanaamoo o faam ole.» Xa ƥiy axe a ngumnanaan o faam ole, soo ta ŋaay teen.

¹⁴A xota a ƭat ale o kiin Roog oxe a xot’ina boo a soƥin ta moof no yook ndaxar maak. A laamtaan ee: «Ndax wo refu o kiin Roog oxe inoorna Yudaa?» A doonaan ee: «Ii, mi yoo de.»

¹⁵Maaga, a layaan ee: «Gari i ndet no mbind es, ndax o ñaam.»

¹⁶O kiin Roog oxe a doonaan ee: «Waagiim o nomtoox, yoon fa wo no mbind of. Ñaamitkiim mbuuru too yeritkiim foofi no mbiñ onqene fa wo,

¹⁷yaam o Yaal oxe kaa heblaam ee: ‹Ba o ñaam dara too ba o yer dara, too sax boo o xaadaa fat o jang a ƭat a lakas alaa fogreerna fo ale o retitkaa.› »

¹⁸O tuleer o nogoyu xe koy a xoxa, a layin ee: «Mi itam o tuleer refum nen a wo. Malaaka a daawnaxam fa lay feeke no Yaal oxe yee: ‹Ɓiseen no mbind of, ndax ta ñaam soo a yer.› » No keene fop koy, kaa ta maaɓoogun.

¹⁹Maaga, o kiin Roog oxaa a nomtooxa fo ten no mbind um, a ñaam soo a yer.

²⁰Ye da ndeerna o roon ole, a ñaamaa, o Yaal oxe a laya fo o tuleer oxe nomtiid’uuna.

²¹Oxeene a laya o kiin Roog oxe inoor’ina Yudaa yee: «O Yaal oxe kaa tee: ‹Feek kaa o nanaƭaran ke o Yaal oxe a layna, fañ o reef kebil ne o Yaal oxe Roog of a coox’oonga,

²²feek nomtooxiidaa, ñaam, yer no mbiñ onqene ta lay’oonga yee ba o ñaam too ba o yer meen tig, o dal of gaskaand me no daan of.› »

²³A cinj ye da ñaamna, a yer boo a ƈut, o tuleer o nogoyu xe a humnana o tuleer oxe ta nomtiid’ina o faam,

²⁴soo ta ret. Njogoy a xeta fo ten na ƭat ale soo a warin. O dal ole na ƭat ale a luuñoogu, o faam ole a fodin no saax o leng ole, njogoy ne a fod no saax o lakas.

²⁵Wiin waa njoon’ina, a nga’a o dal ole na ƭat ale, soo njogoy a ref paam um. Ye da mbadiidna na teeru fee o tuleer o nogoyu xe a gen’ina, a mbetandooxaan.

²⁶O tuleer oxe nomtitiid’uuna na ƭat ale a yegaan soo a lay ee: «O kiin Roog oxe nanaƭaranna ke o Yaal oxe a lay’uuna yoo. O Yaal oxe kaa ɓoxotin njogoy, ta listin, a warin, ne o Yaal oxe a layit’uuna o ten.»

²⁷A laya xa ƥeem ee: «Ngumnanaamoo o faam ole.» A ngumnanaan o ten.

²⁸A reta soo a ga o dal ole luuñoogna na ƭat ale, a ga itam o faam ole fo njogoy ne ndeeƭna paam o dal ole. Njogoy ne koy, ñaam’ee o dal ole too song’ee o faam ole.

²⁹Maaga, o tuleer o nogoyu xe a janga o dal ole no kiin Roog oxe, a doonin took o faam ole soo a ɓisin. A reta fo ten na teeru faa, ndax ta xaaraandin soo a gasin.

³⁰A ɓeka o dal ole na mboy alaa ta jagandan’ina a xoox um, soo da ƭomatooxan ee: «Ey, o pog es!»

³¹A cinj ye da ngasuuna, o tuleer o nogoyu xe a laya xa ƥeem ee: «Um xonangaa, fat nu ngasaam na mboy ale o kiin Roog oxe a gaseena. Fat nu ndoon o dal es paam ole ten,

³²yaam no ndigil, o Yaal oxe daawnun ke ta yegnitna took o sadaxand ole Betel fo took fo mbiñ fo tedu ne na ñaang a sadaxand ake ndefna kam teeru fee Samari. Ke ta yegnitna xan a fadnoox.»

³³Keene fop xew’ina tax’ee Yerobowam a waas a pesoorooƭ a paaxeer ake ten. A dalnahina saasadax na ñaang a sadaxand ake, a xotit a den muu refna na xeet fee. Fop we mbug’ina, a doda a den saasadax na ñaang a sadaxand ake.

³⁴A pesoorooƭ aleene kaa reeƭu no ƥasil ne Yerobowam o wooƥ o bakaadir, too keene sax taxu da saŋkel soo a moocandel no lanq ke.