Read NQAARIIT NE ROOG 1 Maad we 14 Bible Online

1 Maad we 14 - NQAARIIT NE ROOG bible

1 Maad we 14

¹Na jamaane faaga, Abiya fee o ƥiy o ngoor Yerobowam a yena jir.

²Yerobowam a laya o teem ee: «Kaa o supitkaa a tokax, ndax o leng andidkee yee o tew Yerobowam refo soo ret Silo maa no tuleer Ahiya fee lay’axama yee xam maadooxan xeet feeke.

³Ɓislooxi puuru xarɓaxay, xa kaf fo o ndog suum, o ret no mbind um. Xan a layong ke na xewkaa no goor ole.»

⁴O tew oxe Yerobowam a fi’a naaga. A reta Silo no mbind Ahiya. Ahiya koy, kaa femek’el boo waag’atee a ka, yaam a nogoy lool.

⁵O Yaal oxe a laya a Ahiya yee: «O tew oxe Yerobowam oxey a garaa, ndax ta laamtong kaa farna no ƥeem o ngoor, yaam kaa jir. Kene fo kene o laykan. A fadiidangaa koy, xan a juumaarooxong, a fi’oox o lakas.»

⁶Ye Ahiya a nanna a caf ake no tew oxe rokiidoogna, a layaan ee: «O tew oxe Yerobowam, rokiidi. Xar taxu o juumaarooxaxam? Kaa o fi’ooxaa o kiin o lakas! Yaag oo toox de, luleem me wo o nan o feƭaru.

⁷Reti o lay a Yerobowam ee: O Yaal oxe Roog fee Isra’el kaa tee: ‹Mi yoɗtong a ndeer xeet fee, dalnong o ɗoxaa a Isra’el fee xeet es.

⁸Suqtitaam maat ne no mbind Dawid, cooxong o ten. Kaa koy, nandiro nen o tag es Dawid fee gayna kebil es soo a reefaam no xeeñ um fop, a fi’aa paax doŋ na kid es.

⁹No we adooxoonga fop, wo moƴu o faaxaƭar teen a pesoorooƭ. Kaa o ret fi’an a xoox of roog lakas fo nitaal celem cawe, ndax o fuuxnooraam. Kaa o naagaam fir deɓaam.

¹⁰Ten taxu, wo Yerobowam, xam ɓisiid ɗom no mbind of, too xam xuuf o ñis no goor we no ƥasil of bo ta xet. Xam leel we no mbind of, ne o leelir a leeltaa ndoƭ boo a keƭtoor sax yoqkee teen.

¹¹O pog of oxuu xonitna na teeru fee, xan xa ƥox axe a ñaamin, too oxe na xonitkaa teen na koƥ ale, xan a tud ake a ñaamin. Mi o Yaal oxe layun.›

¹²Wo o mat, inooxi xaad no mbind of. Boo o jaf of a dakaa na teeru faa rek, o goor olaa a xonaa.

¹³Xan Isra’el fop a ƭomatoox o goor ole soo a ngasin, yaam no ƥasil ne Yerobowam fop, ten soom na gaskeel teen. No ten doŋ o Yaal oxe Roog fee Isra’el a ga’u kaa feluuna no ƥasil ne Yerobowam fop.

¹⁴Xan o Yaal oxe a dalnan a xoox um took Isra’el o maad oxaa na moocandkaa ƥasil ne Yerobowam a koom. Ndax refee sax ke na xewaa ndiiki, too xar na doonooxkaa?

¹⁵Xan o Yaal oxe a xaw a Isra’el bo da sendtaa nen xeet laa foofi a yo’naa. Xan a sutit a den no lanq paax ke ta ci’’ina daan den soo a picit a den no saax o lakas ole no xuluɓ ole Ofrat, yaam kaa da mbuuxnoorit o Yaal oxe xa taaƴ xa lupe xe Asera, da mbi’anna a qoox den.

¹⁶Xan o Yaal oxe a deɓ xeet fee Isra’el, yaam ne Yerobowam a bakaadna soo a bakaadnoor a den.› »

¹⁷O tew oxe Yerobowam a inooxa, a ret. A fada Tirsa, too yaa ta dakaa o jaf um no mbind naa rek, o goor olaa a xonaa.

¹⁸A ngasaan, soo Isra’el fop a ƭomatooxin, ne o Yaal oxe a layit’uuna, a reefandin no tuleer Ahiya fee o tag um.

¹⁹Ke yoqna na pi ake Yerobowam, ne ta xire’itna fo ne ta maadooritna, kaa mbindel no «Safe le no caloori ke no maad we Isra’el».

²⁰Yerobowam a daba daan um, cinj ye ta maadooxna xa kiid qarɓeen ƭik fo xa kiid xa ƭaq, soo o ƥeem Nadab a rondandin.

²¹Rehabewam fee o ƥiy Salomo a maadooxa kam Yudaa. Xa kiid qarɓeen nahik fo o hiid o leng a jeg’u, ye ta sogna refaa o maad. A maadooxa xa kiid xarɓaxay fo xa kiid ɓetaa ƭaq kam Yeerusaleem refna teeru fee o Yaal oxe a jilna no fiisel ole na carind ake Isra’el fop, ndax gon um a ref teen. Ya Rehabewam Naama a ne’’e, a ref o Aa-amon.

²²Wiin we Yudaa a mbi’a kaa faaxeerna na kid no Yaal oxe. Neene, fo pakaad den a mbuuxnoorooga a Roog kupu ke daan den a mbi’’uuna.

²³Den itam a maxana a qoox den a ñaang a sadaxand fo a ƥil a sexe fo xa taaƴ xa lupe xe Asera took ñaang jiig luu refna fo yoora ndaxar saqtu nuu refna.

²⁴A jeg’a sax kam saax le goor waa soobooxna no njaga ne ɗeetoogeena nen tedu. Kaa laaloogu a pi a cednooxu ke no qeet ke o Yaal oxe a rax’ina mbaambir Ii-isra’el we.

²⁵No hiid o ɓetkandeer ole no maat Rehabewam, Siisak fee o maad Misira a gara, a song a Yeerusaleem.

²⁶A janga halal fee no Mbind ne no Yaal oxe fa halal fee no mbind no maad ne. A janga fop, a jang itam pegoor wurus ke Salomo a fi’in’ina fop.

²⁷Maaga, o maad Rehabewam a jalna pegoor xanjar, ndax ta fi a den me kaana a ndeeƭna. A doxna a den aa-adax we no xiixire we na yetooxaa ndokand ne no mbind no maad ne.

²⁸Mbanuu o maad oxe a retoogna no Mbind ne no Yaal oxe, yeeyetax we kaa saqoogu pegoor ke. Cinj kaaga, a nomtiidooga a den no yetoorand ole.

²⁹Ke yoqna na pi ake Rehabewam fop, kaa mbindel no «Safe le no caloori ke no maad we Yudaa».

³⁰Rehabewam fa Yerobowam kaa ngen’u no nqire’aa kili.

³¹Ye Rehabewam a dabna daan um, a gase na ƥak ale Dawid. Ya um Naama a ne’’e, a ref o Aa-amon. Abiya fee o ƥeem rondand’un.