Read NQAARIIT NE ROOG 1 Maad we 15 Bible Online

1 Maad we 15 - NQAARIIT NE ROOG bible

1 Maad we 15

¹No hiid xarɓaxay fo hiid o ɓetuu dadkandeer ole no maat Yerobowam fee o ƥiy Nebat kam Isra’el, Abiya[11] reeƭatu o maad Yudaa.

²A maadooxa xa kiid xa tadaq kam Yeerusaleem. Ya um Maaka a ne’’e, a ref o ƥiy Abisalom.

³Abiya a fi’a pakaad leng kut ke faap um a fi’’ina yaaga. Fexee o Yaal oxe Roog um no xeeñ um fop, ne Dawid fee o taan um a fexit’ina o Yaal oxe no xeeñ um fop.

⁴Kaa koy, yaam Dawid o Yaal oxe Roog um a ci’aan o ƥiy onqaa rondanduuna, ndax ƥasil no maad ne ñufkee, fo itam, ndax Yeerusaleem a maadaa,

⁵yaam Dawid kaa fi’oogu ke jofna na kid no Yaal oxe too mosee o ɗap ke ta heblooguuna no ñoow o ñis um fop, bo ta yoqaa no kaa farna na Uriya, o Heeheet oxe.

⁶Xire fee sosoox’ina a ndeer Rehabewam fa Yerobowam a suur’a no ñoow Abiya fop.

⁷Ke yoqna na pi ake Abiya fop, kaa mbindel no «Safe le no caloori ke no maad we Yudaa». A jeg’a xire a ndeer Abiya fa Yerobowam.

⁸Abiya a daba daan um soo a gasel na ƥak ale Dawid. Aasa fee o ƥeem rondand’un.

⁹No hiid qarɓeen ƭikandeer ole no maat Yerobowam kam Isra’el, Aasa reeƭatu o maad Yudaa.

¹⁰Aasa a maadooxa xa kiid qarɓeen nahik fo o hiid o leng kam Yeerusaleem. Ya faap um Maaka a ne’’e, a ref o ƥiy Abisalom.

¹¹Aasa a fi’ooga ke jofna na kid no Yaal oxe, ne o taan um Dawid a fi’tooguuna.

¹²A suuda kam saax le goor we sooboox’ina no njaga ne ɗeetoogeena nen tedu fop soo a watin pangool ke daan um a sip’ina fop.

¹³A watna sax lingeer ne Maaka fee maam um, yaam oxeene kaa sipan’u a Asera mbangool. Aasa a yaqa mbangool neene soo a doxtin na yulanq alaa Kederon.

¹⁴Kaa koy, ke xeeñ um fop a refan’ina o Yaal oxe no ñoow o ñis um fop oo, tax’ee ta moocand a ñaang a sadaxand ake.

¹⁵A ɓisiida kam Mbind ne no Yaal oxe ke faap um a kes’ina fo ke ta kes’ina ten fa xoox um, refna xaaliis fa nqoolu fee, wurus fee fo tig oo tig pogreer.

¹⁶A jegooga xire a ndeer Aasa fa Baasa fee o maad Isra’el no ñoow den fop.

¹⁷Baasa fee o maad Isra’el a songiida saax le Yudaa, a ref no saƭkandaa teeru fee Rama, ndax wiin we Aasa fee o maad Yudaa sutooxkatee mbaat da ndokiid.

¹⁸O maad Aasa a janga xaaliis fee fa wurus fee yoq’ina na kamba le no Mbind ne no Yaal oxe fo na kamba le no mbind ne no maad oxe, a doonin na xa ƥay no dag we ten. Cinj kaaga, a lula a den maa Ben-Hadad fee o ƥiy Tabrimon too a ref o ndaan Hesyon, a ref o maad Araam too a gen Damaas, ndax ta layanel o ten ee:

¹⁹«Fat i tipir nqaariit, ne ta refit’ina a ndeer faap es fa faap of. Lultiidaaxoong xaaliis fa wurus. Reti tas nqaariit ne a ndeer of fa Baasa fee o maad Isra’el, ndax ta in wiin we ten no fiisel ole mi.»

²⁰Ben-Hadad a jaɓa fa lay faaga no maad Aasa. A dalfooxa o lul aa-adax we no xiixire we ten kam Isra’el, soo da songik teeru ke Isra’el. A njaɓa a Iyon, Dan, Abel-Bet-Maaka fo o fiisel ole Neftali fop boo no maag o maas olaa Genesaret.

²¹Ye Baasa a yegna kaaga, a xaƴa maq ne Rama ta fi’oogna soo a ret a moof Tirsa.

²²Maaga, o maad Aasa a xoyna wiin we Yudaa fop too xaƴee o leng, ndax da ƥistin a ƥil ake fo a teex ake Baasa a jiriiñooroogna no maq ne. O maad Aasa a jiriiñoora a den, ndax ta saƭkand a Geba fee Bensame fa Mispa.

²³Ke yoqna na pi ake Aasa fop, njambaar ne ten fo teeru ke ta saƭkandna, kaa mbindel no «Safe le no caloori ke no maad we Yudaa». Ye ta nogoyna, a caf ake mbaag’atee.

²⁴Aasa a daba daan um soo a gasel na ƥak ale Dawid fee o taan um. Yosafat fee o ƥeem rondand’un.

²⁵No hiid o ɗikandeer ole no maat Aasa kam Yudaa, Nadab fee o ƥiy Yerobowam a refata o maad Isra’el, soo a maadoox xa kiid xa ƭaq.

²⁶A fi’a kaa faaxeerna na kid no Yaal oxe, a reef o jaf faap um fee riñ’ina xeet fee no mbakaadaa. A fi’a pakaad leng kut ke faap um a fi’’ina.

²⁷Maaga, Baasa fee o ƥiy Ahiya fogna na carind ale Isakaar a hiɓana o maad oxe o ngir. A wara o maad Nadab, ye oxeene fo xiixire we Isra’el fop a ngarna, a mbid o kurul-keƥ teeru fee Gibeton, Fiifilista we a ngen’ina.

²⁸Baasa a waraan no hiid o dadkandeer ole no maat Aasa kam Yudaa, soo a jang maat naa.

²⁹Ndak fo ndak, ye ta jangna maat ne, a saŋka ƥasil ne Yerobowam fop too xaƴee o leng na xa taan um. A saŋka fop, too neene ke o Yaal oxe a lay’ina, a reefandin no tag um Ahiya fee Silo, a fadnooxa.

³⁰Keene fop koy o ngar fa bakaad fee Yerobowam a fi’’ina soo a fi’noorin Ii-isra’el we yoo. Kaa fuuxnoor’u o Yaal oxe Roog fee Isra’el.

³¹Ke yoqna na pi ake Nadab fop, kaa mbindel no «Safe le no caloori ke no maad we Isra’el».

³²A jegooga xire a ndeer Aasa fa Baasa fee o maad Isra’el no ñoow den fop.

³³No hiid o dadkandeer ole no maat ne Aasa fee o maad Yudaa, Baasa fee o ƥiy Ahiya a refata o maad Isra’el fop. A maadooxa kam Tirsa boo xa kiid qarɓeen ƭik fo xa kiid xa nahaq.

³⁴A fi’a kaa faaxeerna na kid no Yaal oxe, a reef o jaf Yerobowam fee riñ’ina xeet fee no mbakaadaa. A fi’a pakaad leng kut ke Yerobowam a fi’’ina.