Read NQAARIIT NE ROOG 1 Maad we 16 Bible Online

1 Maad we 16 - NQAARIIT NE ROOG bible

1 Maad we 16

¹O Yaal oxe a laya a Yehu fee o ƥiy Hanani, ta layanin a Baasa yee:

²«Reeƭiro dara, um xotong, dalnong o ɗoxaa a Isra’el fee xeet es, ndaa kaa o reef o jaf Yerobowam, riñ a Isra’el fee xeet es no mbakaadaa, soo weene a mbuuxnoortaam pakaad den.

³Ten taxu xam moocandong fo ƥasil of fop. Xam fi a nuun nen ƥasil ne Yerobowam fee o ƥiy Nebat.

⁴O pog of oxuu xonitna na teeru fee, xan xa ƥox axe a ñaamin, too oxe na xonitkaa teen na koƥ ale, xan a tud ake a ñaamin.»

⁵Ke yoqna na pi ake Baasa fop fo njambaar ne ten kaa mbindel no «Safe le no caloori ke no maad we Isra’el».

⁶Baasa a daba daan um, a gasel Tirsa, soo o ƥeem Eela a rondandin.

⁷Ke o Yaal oxe a lay’ina a Baasa fo ƥasil um, a reefandin no tuleer Yehu fee o ƥiy Hanani, kaa reeƭu yaam ne ta fi’’ina kaa faaxeerna na kid no Yaal oxe, a fuuxnoortin a pi um nen a Yerobowam fo ƥasil um, fo yaam ne ta saŋik’ina xa taan axe Yerobowam fop.

⁸No hiid qarɓeen ƭik fo o hiid o ɓetuu fa lengandeer ole no maat Aasa kam Yudaa, Eela fee o ƥiy Baasa reeƭatu o maad Isra’el. A maadooxooga kam Tirsa boo xa kiid xa ƭaq.

⁹O tag um Simri fee adooxan’ina genwal fee na sareet-xire ke a hiɓanaan o ngir. Ye o maad oxe a refna Tirsa, a wayaa no mbind Arsa fee adooxan’ina mbind no maad ne,

¹⁰Simri a gara, a warin soo a jang maat naa. Kaaga a xewa no hiid qarɓeen ƭik fo hiid o ɓetuu ɗikandeer ole no maat Aasa kam Yudaa.

¹¹Ndak fo ndak, ye ta refatna o maad boo a moof no uum-maamaad le, a saŋka ƥasil ne Baasa fop too xaƴee o koor o leng ta ñoow no we mbogna fa Baasa mbaat we mbarit’uuna.

¹²Simri a saŋka ƥasil ne Baasa fop, too neene ke o Yaal oxe a lay’ina, a reefandin no tuleer Yehu, a fadnooxa.

¹³Keene fop a xewa, yaam ne Baasa fo o ƥeem Eela a mbakaad’ina soo a ndiñ xeet fee no mbakaadaa fo ne da mbuuxnoorit’ina o Yaal oxe Roog fee Isra’el pangool koɓong ke den.

¹⁴Ke yoqna na pi ake Eela fop, kaa mbindel no «Safe le no caloori ke no maad we Isra’el».

¹⁵No hiid qarɓeen ƭik fo hiid o ɓetuu ɗikandeer ole no maat Aasa kam Yudaa, Simri reeƭatu o maad Isra’el. A maadooxa kam Tirsa ñaal ɓetuu ƭik. Xiixire we Isra’el koy, kaa mbid’u o kurul-keƥ teeru fee Gibeton Fiifilista we a ngen’ina.

¹⁶Xiixire waa a yega yee Simri kaa hiɓan’u o maad oxe o ngir boo a warin. A koom Ii-isra’el we ndeeƭna no saŋe naa fop a ndoda a Omri fee adooxan’ina xiixire we o maad Isra’el.

¹⁷Maaga, Omri a inoorta Gibeton fo xiixire we ten fop, a ngar a mbid o kurul-keƥ teeru fee Tirsa.

¹⁸Ye Simri a ga’na yee teeru fee a jaɓe, a roka na ndok-kam ale no mbind no maad ne soo a heƥandin. Naaga, a xona no dox olaaga.

¹⁹Simri a xona, yaam ne ta bakaad’ina, a fi kaa faaxeerna na kid no Yaal oxe, a reef o jaf Yerobowam fee riñ’ina xeet fee Isra’el no mbakaadaa. A fi’a pakaad leng kut ke Yerobowam a fi’’ina.

²⁰Ke yoqna na pi ake Simri fo ne ta hiɓit’ina o ngir kaa mbindel no «Safe le no caloori ke no maad we Isra’el».

²¹Maaga, xeet fee Isra’el a mbi’a a qaaj a ƭak. A qaaj a leng ale na xeet fee kaa yoon’u fa Tibni fee o ƥiy Ginat, ndax da ndodin o maad, a lakas ale a yoon fa Omri.

²²A qaaj ale Omri koy, moƴ’u o jeg a lakas ale doole. Tibni a xona, soo Omri a maadoox.

²³No hiid qarɓeen tadik fo hiid o lengandeer ole no maat Aasa kam Yudaa, Omri reeƭatu o maad Isra’el. A maadooxa xa kiid xarɓaxay fo xa kiid xa ƭaq. A cinj ye ta maadooxna xa kiid ɓetaa fo leng kam Tirsa,

²⁴a jikta na Semer o joong olaa Samari no kilo qarɓeen ɓetuu fa leng fo kilo ɓetuu tadik xaaliis fa nqoolu. A maxa teeru took o joong olaaga soo a ne’in Samari, a reefandin na Semer fee jeg’uuna.

²⁵Omri a fi’a kaa faaxeerna na kid no Yaal oxe. A fi’a sax kaa moƴna o faaxaƭar ke maad we adooxuuna fop, a mbi’’ina.

²⁶A reefa deŋ o jaf Yerobowam fee o ƥiy Nebat fee riñ’ina xeet fee Isra’el no mbakaadaa, soo a mbuuxnoorit o Yaal oxe Roog fee Isra’el pangool koɓong ke den.

²⁷Ke yoqna na pi ake Omri fop fo njambaar ne ta lalitna kaa mbindel no «Safe le no caloori ke no maad we Isra’el».

²⁸Omri a daba daan um, a gasel Samari, soo o ƥeem Ahab a rondandin.

²⁹No hiid qarɓeen tadik fo hiid o ɓetuu dadkandeer ole no maat Aasa kam Yudaa, Ahab fee o ƥiy Omri reeƭatu o maad Isra’el. A maadooxa xa kiid qarɓeen ƭik fo xa kiid xa ƭaq kam Samari.

³⁰Ahab a fi’a kaa faaxeerna na kid no Yaal oxe. A fi’a sax kaa moƴna o faaxaƭar ke maad we adooxuuna fop a mbi’’ina.

³¹Ten koy, bakaad fee Yerobowam ta laalna deyiran boo ta gilig sax a Isebel fee o ƥiy Et-Baal fee o maad no Siisidoŋ we soo a doon teen a gungaa mbaambir Baal fee da mbi’’ina roog den, ndax ta faɗooxin.

³²A sipana a Baal o sadaxand no mbind ne ta maxanuuna kam Samari.

³³Ahab a lupa itam o daaƴ ole Asera. A fuuxnoorta o Yaal oxe Roog fee Isra’el a pi akeene fop kupu ke maad we Isra’el adooxuuna fop a mbi’’ina.

³⁴Na jamaane um, oxaa ne’eena Hiyel, a gen Betel, a maxatina teeru fee Yeriko. Kaa koy, ke Yosuwe fee o ƥiy Nun a lay’ina, ta inoor no Yaal oxe, a fadnooxa: Hiyel a ñaka a Abiram fee taaw um, ye ta gasaa fer le na teeru fee, a ñak itam a Segub fee mbat-fo-ɗeen um, ye ta wadaa begax ke.