Read NQAARIIT NE ROOG 1 Maad we 17 Bible Online

1 Maad we 17 - NQAARIIT NE ROOG bible

1 Maad we 17

¹Eliya fee gen’ina na saate faa Tisbi kam Galaad, a laya o maad Ahab ee: «Ne ta wooritna yee o Yaal oxe Roog fee Isra’el oxe ñoowaa, ten fee refuuma o tag um, neene a woortu yee na xa kiid axene na ngaraa jegkee a liim, a teƥ ne’aand, a refangee mi layun.»

²O Yaal oxe a daawna a Eliya fa lay um na xa ƭelem axene:

³«Inooxi mene, o ret farna fo batand soo ɗas paam o xuluɓ olaa Kerit jasnoorna fo o xuluɓ olaa Yordaan.

⁴Maaga, fat o yeraa no foofi le no xuluɓ ole, too heblaam a tooq ake da ƥisiidang ñaamel.»

⁵Maaga, Eliya a fi’a ke o Yaal oxe a lay’uuna, a ret a moof paam o xuluɓ olaa Kerit jasnoorna fa Yordaan.

⁶A tooq ake a ƥisiidoogaan xa kaf fo a tegeƴ nqes fo kirand, soo ta yeraa no foofi le no xuluɓ ole.

⁷No paktandoong naa, o xuluɓ olaa a ŋiisa, yaam jeg’ee a teƥ kam saax laa.

⁸Maaga, o Yaal oxe a daawnaan fa lay um na xa ƭelem axene:

⁹«Naagi daket, genik Sarepta fogna no jegel olaa Sidoŋ. Heblaam o ñaaw maaga, ndax ta ñoowdandang.»

¹⁰A dalfooxa o inoox ee col a ret Sarepta. Yaa ta naagaa suup o jaf um no ndokand naa na teeru faa, a xeta fo o ñaaw oxaa daxanoogna. A xoyaan, a layin ee: «Ngela reti waaƭankaam o ndik foofi no fal boo um yer.»

¹¹Ye ta waaƭkaa foofi le, a xoyahinaan, a layin ee: «Ngela ɓislooxiidaam o xapit o gaf.»

¹²O tew oxaa a doonaan ee: «Ne ta wooritna yee o Yaal oxe Roog of oxe ñoowaa, neene a woortu yee saqiim dara kaa ɓelna, a refangee o ɓay mbiɗel kam o njak fo o ndaag diwliin kam o fal. Ndiiki koy, kaam kaflooxaa fo njeɓ fo leng-leng boo ret jawankin o ƥees fa mi, i ñaamin, cinj kaaga i nqonik.»

¹³Maaga, Eliya a layaan ee: «Ba o saɗar dara, reti xaad, o fi ne layoona. Kaa rek, fat o eet o juɗanaam teen o ngaf, ɓisiidaam o ten, soo sogkaa fi’an a xoox of fo o ƥeef.

¹⁴Yaam keeke o Yaal oxe Roog fee Isra’el a layu: ‹O njak onqe wo ñakkatee mbiɗel, too o fal ole wo ñakkatee diwliin boo no ñaal naa o Yaal oxe a hebliidkaa a teƥ took lanq ke.› »

¹⁵O tew oxaa a reta, a fi ne Eliya a lay’uuna, too boo na jamaane fa miñu mos’atee o ñak ñaamel, ten fo ƥasil um fa Eliya itam.

¹⁶O njak onqe mos’atee o ñak mbiɗel, too o fal ole mos’atee o ñak diwliin, ne o Yaal oxe a layit’uuna, a reefandin na Eliya.

¹⁷Yaa kaaga a faafna, o ƥiy o ngoor onqe no tew oxe refna ref o yaal mbind ne, a yena jir ɗomu boo ñoot ne sax a ɗeg.

¹⁸O yaal mbind o tew oxaa a ñofa o laamit a Eliya yee: «Xar i ndeeru, wo o kiin Roog oxe? Kaa o xalatooxiidaam ndax o wetand a Roog tooñ es boo a tax o ƥees a xon neeke?»

¹⁹Maaga, Eliya a doonaan ee: «Cooxaam o ƥeef.» A xotaan me o tew oxe a ɓop’uuna, a ŋaay fo ten na ndok-took alaa ta genoogna soo a wondnin no njong um.

²⁰Cinj kaaga, a ƴufginooxa o Yaal oxe, a lay ee: «O Yaal oxe Roog es, xar taxu o fi’aa o ñaaw oxene dalnaxama ƭomu, war o ƥeem?»

²¹Eliya a ɗaasooxa took o goor ole boo a caf a tadak, a ƴufginoox o Yaal oxe, a lay ee: «O Yaal oxe Roog es, ngela fi’i boo ñoot ne no goor olene a nomtooxiid no ten.»

²²O Yaal oxe a jaɓa a qeƭ ale Eliya, too o goor ole a ñoowatina, a ref no haaƭaa.

²³Eliya a janga o goor ole, a fudoortiid fo ten na ndok-took alaa, a ɓoxotin a ya um too a lay ee: «Ga’i, o ƥeef oxe ñoowaa.»

²⁴O tew oxaa a laya a Eliya yee: «Ndiiki andataam kañ ee o kiin Roog refo, too a woora yee fa lay fee na hataa no don of fa lay no Yaal oxe yoo.»