Read NQAARIIT NE ROOG 1 Maad we 18 Bible Online

1 Maad we 18 - NQAARIIT NE ROOG bible

1 Maad we 18

¹A cinj ñaal mayu, no hiid o dadkandeer ole no feñ ole, o Yaal oxe a daawna a Eliya fa lay um na xa ƭelem axene: «Reti ga’rik fo o maad Ahab, yaam xam hebliid a teƥ took lanq ke.»

²Maaga, Eliya a reta, a ga’rik fa Ahab. Biim le koy kaa ɗom’u lool kam Samari.

³Ahab a xoyna a Abjaas, o aa-adax oxe no mbind no maad ne ten. Abjaas koy, kaa saɗar’u o Yaal oxe lool.

⁴Ye Isebel fee o tew no maad oxe a waraa duleer we no Yaal oxe, Abjaas a mucil’a duleer teemeed no duleer waaga, a fi a den a qaaj a ƭak no wiin qarɓeen ƥetik, a ɗasin a den kam luf a ƥil, a cooxaa a den ñaamel fo foofi.

⁵Ahab a laya a Abjaas ee: «Reti wid saax le, ɗeet a oon ake fo xa quluɓ axe fop, xeƈa xan o ga daaƭ laa ñoowinna pis ke fo perkele ke. Neene, i soxla’kee mbaraa cegel ke.»

⁶A lasra saax le ndax da mbidin. Neene, Ahab a xota o saax o leng, soo Abjaas a xot o saax o lakas.

⁷Ye Abjaas a refna na ƭat, a xeta fa Eliya. A anddaan, a gooknoox, a gung na caf um soo a layin ee: «Ndax refee o yaal es Eliya?»

⁸Eliya a doonaan ee: «Ii, mi o mat oo! Reti o lay o yaal of Ahab ee: ‹Eliya oxey meen.› »

⁹Abjaas a laamtaan ee: «Pakaad kum fi’um boo o ɓoxotaa a surga of na xa ƥay Ahab, ndax ta waraam?

¹⁰Ne ta wooritna yee o Yaal oxe Roog of oxe ñoowaa, neene a woortu yee o maad oxe yaal es a lula wiin kam qeet ke fop fo kam maat ke fop, ndax ta waaƭong, too boo we na saax akeene a layna yee refiro maaga, a mbara o ƥaat teen a taaƥ ee nga’irang.

¹¹Ndiiki koy o heblaxam ndax um yegnik o yaal es ee woxey meen!

¹²Cinj yaa um retkaa xaƴong, xan Yiif le no Yaal oxe a gifong, a ɓisong maa andeeruuma. Um retkaa koy, yegnin a Ahab, too ga’kirang soo ta waraam. Yaag oo toox de, no kaa xotitna no ndeƥandoong es boo ndiik kaam saɗar o Yaal oxe.

¹³O yaal es, ndax wetandooxaandee ke fi’uuma, ye Isebel a saŋkaa duleer we no Yaal oxe? Ɗasin’aam duleer teemeed na den kam luf a ƥil, fi a den a qaaj a ƭak no wiin qarɓeen ƥetik, cooxaa a den ñaamel fo foofi.

¹⁴Ndiiki koy, o heblaxam ndax um yegnik o yaal es ee woxey meen. Yaaga xan a waraam de.»

¹⁵Kaa koy, Eliya a doonaan ee: «Ne ta wooritna yee o Yaal oxe Hupna fop oxe ñoowaa, ten fee refuuma o tag um, neene a woortu yee xaye fee xaye sax um geenoox mbaambir Ahab.»

¹⁶Maaga, Abjaas a soƥka a Ahab, a yegnin o ten. Ahab a dalfooxa o xetiid fa Eliya,

¹⁷too ndak fo ndak, ye ta ga’uuna, a layaan ee: «Wo refu oxene na gartaa taamaala took xeet fee Isra’el!»

¹⁸Eliya a doonaan ee: «Gartiim taamaala fa leng took xeet fee Isra’el, ndaa kañ wo fo mbind faap of o mat oo, yaam kaa nu mbañ o ngay kebil ke no Yaal oxe soo mbaɗooxaa a Baaliin nu mbi’na roog.

¹⁹Ndiiki koy, lulti fokatanel xeet fee Isra’el fop paam es no joong ole Karmel fo duleer teemeed nahik fo duleer qarɓeen ƥetik we Baal, den fo duleer teemeed nahik we Asera na ndeeraa fa Isebel o roon.»

²⁰Ahab a lula wiin me no Ii-isra’el we fop soo a fokat duleer we Baaliin no joong olaa Karmel.

²¹Maaga, Eliya a matiida xeet faa fop, a lay ee: «A mban nu mbaaskaa ceek-ceeknaa o mbiñ fo mbiñ? A soƥangaa yee o Yaal oxe refu Roog, mbaɗooxeenoo, ta soƥ koy ee Baal oo, mbaɗooxeenoo!» Kaa koy, o leng na xeet faa dooniran tig.

²²Eliya a ɓaata o lay xeet faa yee: «Mi doŋ yoqu o tuleer no Yaal oxe, ndaa duleer we Baal a mbada teemeed nahik fo qarɓeen ƥetik.

²³Fat i cooxel qoox ƭik, duleer we Baal a njil leng, a ƭegin teɓ-reɓ soo a ndoonin took xa cuuƭ axe, ndax da ƥoxotin nen sadax, ndaa ngeƥandkee teen fiɗel. Mi o mat, xam xendand lakas ne, doonin took xa cuuƭ, ndaa itam heƥandkinum.

²⁴Cinj kaaga, ƈufginooxyo a roog nuun, mi um ƴufginoox o Yaal oxe. Roog fee na jaaɓkaa boo a lultiid fiɗel na refkaa fa ndigil fee.» Xeet faa fop a ndoonaan ee: «I njaɓa.»

²⁵Maaga, Eliya a laya duleer we Baal ee: «Njilyo leng no qoox ke, nu eet o nqendand, yaam nuun moƴu o may, cinj kaaga, nu ƈufginoox a roog nuun, ndaa de ba nu ngeƥandin.»

²⁶A njanga nqoox ne da cooxeena, a nqendandin, cinj kaaga da ndef no ƈufginooxaa a Baal no kaa xotitna no nqes naa boo na waxtu njeeƈ ndeer xoox, a layaa yee: «Baal, jaaɓi a in!» Kaa koy, njeg’ee o jaaɓ o leng ke da mbecoogna me widna o sadaxand ole da max’ina fop oo.

²⁷Farna fa waxtu njeeƈ ndeer xoox, Eliya a xaadnooxa a den, a lay ee: «Mbalalooxyo a maak, feek roog a refu, xeƈa kaa xalaataa lakas mbaat ta fiiq mbaat ta ñaaƴik. A waaga o ref itam ee kaa ɗaanaa, too nu mbaraan o yok.»

²⁸A moƴa o mbalaloox, too ne o mbaax onqe den a simtituuna, a ñaasooxooga fo laƥ fo a salma boo cer ke den fop a yedaa.

²⁹Ye waxtu njeeƈ ndeer xoox a faafna, a ndefa no yenaa leer boo na waxtu kirandax fee sadax fee a wareena o ɓoxot, ndaa njeg’ee o jaaɓ o leng mbaat kaa xewna.

³⁰Maaga, Eliya a xoya xeet faa fop, da matiidin. Ye da matiiduuna, Eliya a refa no xendandaa o sadaxand ole no Yaal oxe yaq’eena.

³¹A janga a ƥil xarɓaxay fo a ƥil a ƭak, a reefandin no ne a carind ake na xa ƥiy axe Yakoob a mbodna. Yakoob feene o mat o Yaal oxe a lay’u yee: «Isra’el o ne’kateel.»

³²Fo a ƥil akaaga a maxana o Yaal oxe o sadaxand, a waq me widuuna a ƥaaxaand alaa waagna o yip ngap xa liitar qarɓeen ƥetik.

³³A xendanda xa cuuƭ axe, a ɗeg nqoox ne teɓ-reɓ soo a doonin took xa cuuƭ axe.

³⁴Cinj kaaga, a hebla waa ndeeƭna maaga yee: «Ƈeewyo qaw nahik foofi, ƥax a den took sadax fa ndoxel fee fo took xa cuuƭ axe.» A layahina a den ee: «Ƥaatyo jaf ɗikandeer», da ƥaat jaf ɗikandeer. A ɓaata o lay a den ee: «Ƥaatyo jaf dadkandeer», soo da ƥaat jaf dadkandeer.

³⁵Foofi le a yuurooga me widna o sadaxand ole boo a mayƭand a ƥaaxaand ale sax.

³⁶Yaa waxtu faa sadax fee a wareena o ɓoxot a fadna, Eliya a matiida o sadaxand ole, a lay ee: «O Yaal oxe, wo Roog fee Abraham fa Isaak fa Yakoob, feeñli xaye yee wo refu Roog kam Isra’el, um ref o tag of, too na pexey fa lay of um fi’taa kene fop.

³⁷Jaɓi a qeƭ es, o Yaal oxe, jaɓi a qeƭ es, ndax xeet fene fop a and ee wo refu Roog, soo a qeeñ den a nomtooxiid me wo nen yaaga.»

³⁸Maaga, o Yaal oxe a fudnitiida na asamaan fiɗel, ta dox sadax fee, xa cuuƭ axe, a ƥil ake boo no lanq ke ndeeƭna ɗuga fee soo a ŋeerin foofi le na ƥaaxaand ale.

³⁹Ye xeet fee fop a nga’na keene, a ngunga a lanq soo a layaa yee: «O Yaal oxe refu Roog! O Yaal oxe refu Roog!»

⁴⁰Eliya a laya a den ee: «Ndamyo duleer we Baal boo ba o leng na den a daɗ.» Maaga, a ndama a den, den fop, soo Eliya a ɓis a den na ƈufnand alaa Qiison, a xirisnoor a den maaga.

⁴¹Cinj kaaga, Eliya a laya a Ahab ee: «Reti o ñaam, yer, yaam foofi nanum ta suusaa.»

⁴²Ahab a reta a ñaam, a yer. Eliya o mat, a ŋaaya farna fo jul olaa no joong olaa Karmel, a gooknoox maaga, a gung ndeer kuɓay ke ten.

⁴³Cinj kaaga, a laya o fes ole surga um ee: «Ŋaayi took-ee-took, o ɗeet farna fo maag ole.» Oxeene a ŋaaya a ɗeet soo a nomtooxiid, a lay ee: «Ga’iim dara de!» Eliya a nomtaan boo a caf ɓetaa ƭaq akaa ta ɗeetkaa.

⁴⁴No jaf ɓetuu ɗikandeer le, surga fee a laya yee: «A jega o eel o ndeɓ onqaa na ŋaaytaa farna fo maag ole. Kaa koy, hupee o ɓay no kiin.» Maaga, Eliya a layaan ee: «Reti o lay a Ahab, ta humin pis ke ten, a xaad boo a teƥ ale a helko fo ɗegan.»

⁴⁵Asamaan fee kaa moƴ’u moƴ o ƴufaagaa yaam a eel ake nqeñ ne a ɓisiidoogna. A refa no deɓaa a teƥ a cegu doole, a soƥ o maad Ahab a ŋaay took a sareet um, a xaadaa Yisre’el.

⁴⁶O Yaal oxe a mayƭanda a Eliya fa doole, ta kufoox, a ref no ƴufaa mbaambir a sareet ale Ahab boo no ndokand naa Yisre’el.