Read NQAARIIT NE ROOG 1 Maad we 19 Bible Online

1 Maad we 19 - NQAARIIT NE ROOG bible

1 Maad we 19

¹O maad Ahab a wetandooxa a Isebel fee o teem fop ke Eliya a fi’’ina fo ne ta warit’ina duleer we Baal fo laƥ.

²Isebel a lulta o layanel a Eliya yee: «Waxtu feeke o feet, a soƥangee um fi’ong ne fi’oona duleer weene, yaasam roog ke a ngalakaam!»

³Yaa Eliya a nanna kaaga, a inooxa a ƴuf, ndax ta mucil o ñis um. A fadiida Beer-Seeba no saax laa Yudaa, a xaƴ maaga surga fee ten.

⁴Cinj kaaga, a ñaaƴa ñaal muum kam a koƥ-a-ƥor ale, a ret a moof ɗuga mburndu. Fa nqon doŋ a xeɗoogatu, a layaa yee: «Ndiiki koy, o Yaal oxe, deyƭataam sik! Xuufi o ñoow es, yaam moƴiim daan es.»

⁵Cinj kaaga, a wondooxa, a ɗaan ɗuga mburndu ne. Malaaka no Yaal oxe a gara, a duqin soo a layin ee: «Inooxi ñaam.»

⁶Maaga, a ga’a paam xoox le ten o gaf took a ƥil a sumu fo o fal foofi. A cinj ye ta ñaamna, a yer, a wondooxatina.

⁷Malaaka fee no Yaal oxe a ɓaata o gar, a duqin, a layin ee: «Inooxi ñaam, yaam na ñaaƈ a koƭu refo.»

⁸Eliya a inooxa, a ñaam, a yer, too fa doole fee ta jegitna no ñaamel kaaga a ñaaƴa ñaal qarɓeen nahik fo xa yeng den soo a fadiid Horeb, o joong ole Roog.

⁹Ye Eliya a fadiidna Horeb, a roka no luf naa no ɓil laa soo a fe taaga. Maaga, o Yaal oxe a laamtaan ee: «Eliya, xar o fi’aa mene?»

¹⁰A doonaan ee: «O Yaal oxe, wo Roog fee Hupna fop, naa moofum kaam jaflax na wo. Kaa koy, Ii-isra’el we a mbaasa ngiɓoor of fa den, a njiƭit xa sadaxand axe wo soo a mbarit duleer we wo laƥ. Mi doŋ yoqatu, too kaa mbaaƭaa naa da mbartaxama sax.»

¹¹O Yaal oxe a layaan ee: «Sutooxi geenoox took o joong ole mbaambir es, too xam jooniid.» Ndak fo ndak, a und a maak a cegu doole a xeñiida, a qaacaa xa coong axe, a moxoñaa a ƥil ake, a adooxan o Yaal oxe, ndaa o Yaal oxe reeƭee kam a und alaa. A cinj a und ale, a jeg’a a yo’nax lanq, ndaa o Yaal oxe reeƭee kam a yo’nax lanq alaa.

¹²A cinj a yo’nax lanq ale, a jeg’a fiɗel, ndaa o Yaal oxe reeƭahinee kam fiɗel laa. A cinj keene fop, a jeg’a fangax yelefu laa ɓutna bo.

¹³Yaa Eliya a nanuuna rek, a ñofa muurit a tagid ale ten sabadoor um soo a sutooxiid, a geenoox no ndokand ne no luf ne. Maaga, a nana o ñuxur olaa layuuna yee: «Eliya, xar o fi’aa mene?»

¹⁴A doonaan ee: «O Yaal oxe, wo Roog fee Hupna fop, naa moofum kaam jaflax na wo. Kaa koy, Ii-isra’el we a mbaasa ngiɓoor of fa den, a njiƭit xa sadaxand axe wo soo a mbarit duleer we wo laƥ. Mi doŋ yoqatu, too kaa mbaaƭaa naa da mbartaxama sax.»

¹⁵O Yaal oxe layaan ee: «Reti nomtoox, jangatin a ƭat ale na koƥ-a-ƥor ale boo Damaas. O fadangaa maaga, fat o ɗuumanaam a Hasa’el, ta ref o maad Araam.

¹⁶Cinj kaaga, fat o ɗuum a Yehu fee o ƥiy Nimsi, ta ref o maad Isra’el, soo Eliise fee o ƥiy Safat genna Abel-Mehola, o ɗuumin, ta rondandong nen o tuleer.

¹⁷Oxe na daɗkaa laƥ ne Hasa’el, xan Yehu a warnoorin, too oxe na daɗkaa laƥ ne Yehu, xan Eliise a warnoorin.

¹⁸Kaa koy, xam xaƴ kam Isra’el wiin cuni ɓetuu ƭik, fop we ngooknooxeerna mbaambir Baal, too mosee o mboon nitaal um.»

¹⁹Eliya a inoora maaga a ret. A soƥa a Eliise fee o ƥiy Safat, ta xooxaa fo qoox ƭik, a yoon fo wiin xarɓaxay fo o kiin o leng waa oxuu refna a saqna qoox ƭik. Ye Eliya a joonaa a Eliise, a deɓa took um sabadoor ne ten.

²⁰Maaga, Eliise a xaƴa cegel kaa a ƴufiid a lay a Eliya yee: «Ci’aam um farakook a faap es fa ya es, cinj kaaga um reefanong.» Eliya a doonaan ee: «Reti too gar, yaam andaa ke fi’oonga.»

²¹Eliise a dalfooxa o nomtoox, a jang qoox ƭik, a sadaxit a den. A juɗta a tegeƴ ake den kadoor ke soo a cooxin wiin we ndeeƭna maaga, da ñaam. Cinj kaaga, a reefana a Eliya, a refat surga um.