Read NQAARIIT NE ROOG 1 Maad we 20 Bible Online

1 Maad we 20 - NQAARIIT NE ROOG bible

1 Maad we 20

¹Ben-Hadad fee o maad Araam a fokata xiixire we ten fop, too maad qarɓeen tadik fo maad ɗik a mbokatoor’u fo ten fo pis fo a sareet-xire. A ndeta, a mbid teeru fee Samari o kurul-keƥ, a songin.

²A lula wiin kam teeru faa maa Ahab fee o maad Isra’el,

³da layanin o ten ee: «Ben-Hadad kaa tee: ‹Xaaliis fee wo fa wurus fee wo, mi jegatun, rew we wo fo xa ƥiy axe wo moƴna o mos, mi jegatu a den itam!› »

⁴O maad oxe Isra’el a doona yee: «O yaal es, jaɓaam ke layoona. Ɓoxotooxaam na wo fo ke jeguuma fop.»

⁵We lul’eena a ngara jaf ɗikandeer, a layin ee: «Ben-Hadad kaa tee: ‹Kaam lultiid, ndax o cooxaam xaaliis fee wo fa wurus fee wo, rew we wo fo xa ƥiy xa koor axe wo.

⁶Andi yee o feet na waxtu feeke, xam luliid dag es me wo. Xan a njoktoox mbind of fo pind ke no dag we wo, a ndoon o ɓay no fop ke jegna o njiriiñ, a njangin.› »

⁷Maaga, o maad oxe Isra’el a xoya maak we no saax le fop, a lay a den ee: «Nuun fa qoox nuun nu mbaaga o nga a qool qac ee o koor oxene paaxeer a buganu a in. Ye ta lultiidna, ndax ta laacaam rew we mi fo xa ƥiy xa koor axe mi, xaaliis fee mi fa wurus fee mi, xañinum dara.»

⁸Maak waa fop fo xeet faa fop a layaan ee: «Ba o nan-gilooxin too ba o jaɓ.»

⁹Maaga, a doona waa Ben-Hadad a lul’ina yee: «Layanaamoo o maad oxe yaal es ee: ‹Xam fi fop ke eetaxamoona laamit, kaa koy ke layaxamoona no jaf leeke, waaginum o jaɓ.› » Waa lul’eena a ndeta, a njangtoox a Ben-Hadad o doonanqol ole ten.

¹⁰Maaga, oxeene a lulta jaf dadkandeer maa no maad Ahab ee: «Yaasam roog ke a ngalakaam, yaa ndaw ke Samari a nqeƈna na xa ƥay no yoon we mi fop.»

¹¹O maad oxe Isra’el a doona yee: «Fat nu mbetandanaam a Ben-Hadad ee: ‹Retaa fakooxaa, o gataa fakooxaa moƴun.› »

¹²Ye Ben-Hadad a daawna o doonanqol oleene, kaa soƥ’un ta yeraa fo maad lakas we kam ƭiif ke. A hebla dag we ten, da inooxan teeru faa, soo da ndalfoox o inooxanin.

¹³Kaa koy, o tuleer Roog a soƥiida a Ahab fee o maad Isra’el, a layin ee: «O Yaal oxe kaa tee: ‹Ga’aa ga faan maak le no xiixire wene, xaye fee xaye sax um ɓoxot a den na xa ƥay of, ndax o and ee mi refu o Yaal oxe.› »

¹⁴Ahab a laamtaan ee: «Na pexey an a ƥoxotitkeel na xa ƥay es?» O tuleer oxaa a doonaan ee: «Keeke o Yaal oxe a layu: ‹Na pexey xa pes axe we adooxanna xa cegel axe a njilkaa.› » Ahab a laamtaan ee: «An na adooxankaa a ñoq ale koy?» A doonaan ee: «Wo!»

¹⁵Ahab a lima we aa-adax we na xa cegel axe a njil’ina, soo da ndef teemeed ƭik fo qarɓeen tadik fo ɗik. Cinj kaaga, a lima xiixire we Isra’el fop, da ndef xiixire cuni ɓetuu ƭik.

¹⁶A songka farna fo waxtu njeeƈ ndeer xoox, a soƥ Ben-Hadad fo maad qarɓeen tadik fo maad ɗik lakas waa ndimle’iid’uuna a maad o mbayaa kam ƭiif ke.

¹⁷Xa pes axe njil’eena eet’u o song. Ben-Hadad a lulta, soo a yegniidel ee: «A jega goor waa sutoortiidna Samari.»

¹⁸A laya yee: «Njamsa’oor a ɓisiidangaa a den, fat nu ndam a den da ñoowaa, ta soƥ koy ee kaa da songiidaa, ndamyo a den da ñoowaa rek!»

¹⁹Xa pes axe njilit’eena na xa cegel axe fo xiixire we ndeef’ina took den a sutoora kam teeru fee.

²⁰Oxuu refna na den a xawa o pañ um. Aa-araam we a ƈufa, soo Ii-isra’el we a ndaab a den. Ben-Hadad oo a ŋaaya pis um, a ƴuf a daɗik, a yoon fo ŋaaŋaay pis.

²¹O maad oxe Isra’el a sutooxa, a jaɓ[12] pis ke fo a sareet-xire ke soo a xaw Aa-araam we a qaw a ƭomu.

²²Maaga, o tuleer oxe a soƥiida o maad oxe Isra’el, a layin ee: «Reti too saƭakinoox, xalaat a paax ke waroona o fi, yaam na waxtu fene mbaan xan o maad oxe Araam a songiidahinong.»

²³Dag we no maad oxe Araam a layaan ee: «Roog fee Isra’el Roog fee na xa coong axe a refu. Ten taxu Ii-isra’el we a nqaw’u a in, ndaa fat i ñoxorit fa den na xa saawit axe. A woora yee maaga in na nqawkaa a den.

²⁴Ndiiki koy keeke refu ke o fi’kaa: Watni maad lakas we mbokatooriidna fa wo, o sofit a den aa-adax no xiixire.

²⁵Wo koy, waaƭatini xiixire waa mayitna nen we ñakoona fo pis fo a sareet-xire kaa mayitna nen ake ñakoona. Cinj kaaga, xan i ñoxorit fa den na xa saawit axaa. A woora yee in na nqawkaa a den.» Maaga, Ben-Hadad a reefa xa as axe den.

²⁶Na mbaan faa, Ben-Hadad a ɗeetaqinatina Aa-araam we, soo da ndet Afeq, ndax da ñoxor fo Ii-isra’el we.

²⁷Ii-isra’el we itam a ƭeetaqinatine, a cooxel ñaamel soo a ndet, a nqetik fa den. Ii-isra’el we a ndala, a njasnoor fo Aa-araam we, a nandtaa fo nged fo ƭik pambe, Aa-araam we mat a may saax le fop.

²⁸O kiin Roog oxe a soƥiida o maad oxe Isra’el, a layin ee: «O Yaal oxe kaa tee: ‹Feek Aa-araam we kaa lay ee o Yaal oxe kaa ref Roog fee na xa coong axe, ndaa refee Roog fee na xa saawit axe, xam ɓoxot faan maak leene fop na xa ƥay of, too xan nu and ee mi refu o Yaal oxe.› »

²⁹A ndeeƭa na xa taland axe, a njasnoor boo ñaal ɓetuu ƭik. No ñaal ɓetuu ƭikandeer naa, a ndoka na ñoq ale, too no ñaal leng kut naaga Ii-isra’el we a mbara no Aa-araam we goor cuni teemeed no waa ñaaƴoogna.

³⁰We yoq’ina no Aa-araam we, a ƈufa na teeru faa Afeq, soo saŋe naa a yen took goor cuni qarɓeen ƭik fo goor cuni ɓetuu ƭik na den. Yaaga fop koy, Ben-Hadad kaa ƴuf’u, a jaɓnook na teeru faa, a rokaa na ndok fo a ndok.

³¹Dag we ten a layaan ee: «Nan-gilooxi, i anda yee maad we Isra’el maad mayu yirmande a ndefu, yaaga boog fat i nderoox xa saaku, ngumoox xa ƥaak na xa cok soo soƥik o maad oxe Isra’el. Xeƈa xan a wuusong.»

³²A nderooxa xa saaku, a ngumoox xa ƥaak na xa cok soo a soƥiid o maad oxe Isra’el, a layin ee: «O tag of Ben-Hadad kaa tee o wuusin.» Ahab a doona a den ee: «A maada ñoowaa? O pog es a refu!»

³³We Ben-Hadad a lul’ina a ndalfooxa o ngatandoox, a ñof o lay ee: «Ndik ee Ben-Hadad o pog of oo.» Ahab a laya a den ee: «Ndetyo nqotkin.» Ben-Hadad a sutooxiida me ta ɗas’ina, soo Ahab a ŋaaynin na sareet-xire no maad ale ten.

³⁴Ben-Hadad a laya a Ahab ee: «Xam ɓoxotong teeru ke faap es a jangit’ina na faap of. Waagaa itam o jula’aa kam Damaas, ne faap es a fi’tooguuna kam Samari.» Ahab a layaan ee: «A reftangaa neene, mi yoo xam hiɓoor fa wo soo sogkang o xaƴ o ret.» Cinj ye ta hiɓoorna fo ten, a xaƴaan ta ret.

³⁵No camaane kaaga, o Yaal oxe a hebla oxaa fog’ina no duleer we, ta lay o yoon um ee: «Xawaam!» Kaa koy, oxeene a faña.

³⁶Maaga, o eetaand oxe a layaan ee: «Feek nananiro ke o Yaal oxe a layna, yaa i saytoorkaa, xan o xet fo njogoy, soo ta warong.» Oxaaga a reta, a xet fo njogoy, soo ta warin.

³⁷O eetaand oxe a reta maa no lakas, a layin ee: «Xawaam!» Oxaaga a xawaan boo a gaañin.

³⁸Maaga, o tuleer oxaa a reta, a geenoox na ƭat alaa o maad Ahab a war’ina o reefiid, soo a yaambuuloox.

³⁹Ye o maad oxe a joonaa, o tuleer oxe a falalooxaan ee: «Daali maad de, kaam inoor na diix-diix fee na ñoq ale. Kaa jeg’u oxaa garna a doxnaam o paɗ-o-ƥaak soo a layaam ee: ‹Yetooxanaam o koor oxene! A daɗangaa koy, o ñis of oley no xoƥ nquƭ mbaat o rabdaam xa monjong cuni tadik xaaliis.›

⁴⁰E, ye um topatooxaa tig oo tig, o koor oxaa a naaga mes.» O maad oxaa a doonaan ee: «Ca! Wo kañ ɓuraa xoox of.»

⁴¹Ndak fo ndak, o tuleer oxaa a watna yaambuul ne sing’ina mukit um, soo o maad oxe a andat ee o leng no duleer we yoo.

⁴²Maaga, a laya o maad oxe yee: «Keeke o Yaal oxe a layu: ‹Feek kaa o xaƴ o koor oxe kesan’uuma fa nqon, ta ret, xan o ñis of a softel ole ten, ole na xeet of a softel ole na xeet um.› »

⁴³O maad oxe Isra’el a xaada Samari no mbind um, a naqadiloox soo a fuux boo a buɓaa.