Read NQAARIIT NE ROOG 1 Maad we 21 Bible Online

1 Maad we 21 - NQAARIIT NE ROOG bible

1 Maad we 21

¹Cinj kaaga, keeke refu ke xew’ina. Naboot fee gen’ina Yisre’el kaa jeg’u a ƭing taxar biiñ paam mbind no maad ne Ahab fee o maad Samari.

²Bes, Ahab a laya a Naboot ee: «Cooxaam a ƭing taxar biiñ ale wo, ndax um xooxan tuufe-duufe, yaam kaa rugin no mbind es. Xam sofin fo a lakas alaa moƴuuna mbaat um rabdong njigand um, yaa ta moƴanoonga.»

³Naboot a doona a Ahab ee: «Yaasam o Yaal oxe a guutatirandaam fo cooxit lam ne xottuuma no daan es!»

⁴Ahab a nomtooxa no mbind um, a naqadiloox soo a fuux boo a buɓaa yaam ne Naboot fee gen’ina Yisre’el a doon’uuna yee cooxkiran lam ne ta xotitna no daan um. A wondooxa no njong um, a geleeroox a faambir fo tabax ne soo a fañ a ñaam.

⁵Isebel fee o teem a soƥiidaan, a layin ee: «Xar taxu o naqadiloox boo bugiro ñaam tig?»

⁶O maad oxe a doonaan ee: «Kaam lay a Naboot fee genna Yisre’el ee: ‹Jikooxaam a ƭing taxar biiñ ale wo mbaat a moƴanangaang, o sofanaam o ten fo a lakas›, ndaa kaa doonaam ee: ‹Cooxkiroong a ƭing taxar biiñ ale mi!› »

⁷Maaga, Isebel fee o teem a layaan ee: «Ndax kaa refatee yee wo na maadooxaa kam Isra’el! Inooxi ñaam too felakinoox, mi o mat na cooxkang a ƭing taxar biiñ ale Naboot fee genna Yisre’el.»

⁸O tew oxe a binda xa leetar no gon no maad Ahab, a wegit a den o anddiloor ole no maad oxe soo a lulit a den maak waa fo kelfa kaa na teeru fee Naboot a gen’ina.

⁹Keeke refu ke ta bind’ina kam xa leetar axe: «Fat nu mbokat xeet fee ndax nu yegnit koor soo moofin a Naboot mbaambir den.

¹⁰Fat wiin ɗik jaree tus a moofnel mbaambir um, a njamban ee kaa saloox a Roog fo o maad oxe. Cinj kaaga, fat nu ƥisin tafil teeru fee, ndooman a kac boo yaa ta xonkaa.»

¹¹Maak we fo kelfa ke ngen’ina na teeru fee Naboot a gen’ina, a mbi’a ke Isebel a lulit’ina a den kam xa leetar axe.

¹²A yegnita koor, a moofin a Naboot mbaambir xeet faa.

¹³Wiin ɗik jaree tus we a ngara, a moof, a njasnoor fa Naboot soo a ndef no njamban mbaambir mbokatax ne fop ee: «Naboot kaa saloox a Roog fo o maad oxe!» Maaga, a tañ-tañnaan bo ta sutoox teeru faa, soo da ndooman a kac boo ta xon.

¹⁴Isebel a yegne yee: «Naboot a roome a kac boo a xon.»

¹⁵Ye Isebel a yegna yee Naboot a roome a kac boo a xon, a reta a lay a Ahab ee: «Inooxi, jang a ƭing taxar biiñ ale Naboot fee gen’ina Yisre’el a fañ’oonga o jikoox, yaam a xona.»

¹⁶Yaa Ahab a nanna kaaga, a dalfooxa o ret na ƭing taxar biiñ alaa Naboot, ndax ta jegooxatin.

¹⁷Maaga, o Yaal oxe a daawna a Eliya fee genna Tisbi fa lay um na xa ƭelem axene:

¹⁸«Inooxi ret maa Ahab fee o maad Isra’el genna kam Samari. Oxaay na ƭing taxar biiñ alaa Naboot, ndax ta jegooxin.

¹⁹Fat o layin ee: ‹O Yaal oxe kaa tee: Waraa o kiin soo gar jang o jeg um!› Fat o layahinin ee: ‹O Yaal oxe kaa tee: Me xa ƥox axe a njaxitna fo’oy le Naboot, maaga a njaxitkaa fo’oy of itam.› »

²⁰Ye Ahab a ga’na a Eliya, a layaan ee: «Ey! O pañ oxe mi, garahinaa de!» Eliya a doonaan ee: «Ii, garahinaam moos, yaam kaa o jikooxaa a xoox of, ndax o fi paaxeer na kid no Yaal oxe.

²¹Keeke refu ke o Yaal oxe a layna: ‹Xam ɓisiid ɗom took of, moocandong too xam xuuf o ñis no goor we no ƥasil of bo ta xet.

²²Xam fi ƥasil of ne fi’uuma ƥasil ne Yerobowam fee o ƥiy Nebat fo ne fi’uuma ƥasil ne Baasa fee o ƥiy Ahiya, yaam kaa o fuuxnooraam, soo riñ xeet fee Isra’el no mbakaadaa.›

²³O Yaal oxe a laya kaa farna na Isebel ee xan xa ƥox axe a ñaamtin paam saŋe ne Yisre’el.

²⁴O pog Ahab oxuu xonitna na teeru fee, xan xa ƥox axe a ñaamin, too oxe na xonitkaa teen na koƥ ale, xan a tud ake a ñaamin.»

²⁵Mosee o jeg oxaa jikooritna a xoox um nen a Ahab, ndax ta fi paaxeer na kid no Yaal oxe. Isebel fee o teem o mat riñ’un teen.

²⁶A fi’a cednooxu, a hiɓoor fo pangool ke, ne Aa-amori we a mbi’it’uuna, den we o Yaal oxe a rax’ina mbaambir Ii-isra’el we.

²⁷Ye Ahab a nanna fa lay fee Eliya, a dalfooxa o faar tikoorik um, a deroox o saaku soo a ref no koor. O saaku leene a wondoortoogu sax, too a ñaaƈ ale ten kaa niid’atu.

²⁸Maaga, o Yaal oxe a daawna a Eliya fee genna Tisbi fa lay um na xa ƭelem axene:

²⁹«Ɗeetangi ɗeet rek koy ne Ahab a neewandooxitna mbaambir es. Feek a neewandoorta neene, ɓisiidkatiim ɗom le no ñoow um, ndaa no ñoow no ƥeem um ɓisiidkatan.»