Read NQAARIIT NE ROOG 1 Maad we 22 Bible Online

1 Maad we 22 - NQAARIIT NE ROOG bible

1 Maad we 22

¹Araam fa Isra’el a ndefa xa kiid xa tadaq axaa xire a jegeerna a ndeer den.

²No hiid o dadkandeer ole, Yosafat fee o maad Yudaa a ɗeetiida o maad oxe Isra’el.

³O maad oxe Isra’el kaa lay’u dag we ten ee: «Nu anda a paax ee teeru fee Ramot kam Galaad in njegun. Xar taxu boog i njegaa a yiif-a-ƭak no njangatinkin na xa ƥay no maad oxe Araam?»

⁴A laamta o maad Yosafat ee: «Ndax xan o yoon fa mi na xire faa, ndax um jangatin a Ramot kam Galaad?» Yosafat a doonaan ee: «Mi fa wo leng kut i ndefu, xeet es a ref xeet of, pis es a ndef pis of.»

⁵Kaa koy, Yosafat a laya o maad oxe Isra’el ee: «Eeti laamit o Yaal oxe kañ.»

⁶O maad oxe Isra’el a dalfooxa o fokat duleer we ndeeƭna ngap teemeed nahik, soo a laamit a den ee: «Ndax waraam o xire’ik, ndax um jangatin a Ramot kam Galaad, ndi kaam warin o xaƴ rek?» Duleer waa a ndoonaan ee: «Reti, too xan o Yaal oxe a ɓoxotin na xa ƥay of.»

⁷Kaa koy, Yosafat a laamtaan ee: «Ndax jegatee meeke o tuleer o lakas no Yaal oxe, oxaa i mbaagna o laamit?»

⁸O maad oxe Isra’el a doonaan ee: «Aha kañ, a jega o lakas de! Kaa koy, kaam sibin, yaam paaxeer rek a yegnaxam, mosiraam o yegin paax muk. Ten refu Mikaya fee o ƥiy Yimla.» Yosafat a layaan ee: «Ba o lay keene!»

⁹Maaga, o maad oxe Isra’el a xoya o leng no cawdiin ke ten soo a layin ee: «Yaangi xoyaniidaam a Mikaya fee o ƥiy Yimla.»

¹⁰O maad oxe Isra’el fa Yosafat fee o maad Yudaa kaa moof’u oxuu refna no uum-maamaad um, a ndokoox tikoorik no maad. Kaa ndeeƭu no mbelaac onqe refna no ndokand ne no don-maax ole na teeru fee Samari, soo duleer we fop a njasnoor fa den a yenaa leer.

¹¹Sedekiya fee o ƥiy Kenaana kaa jalin’u xa can xa celem soo a layaa yee: «O Yaal oxe kaa tee: ‹Kene o xawitkaa Aa-araam we boo yaa da moocna.› »

¹²Duleer lakas we fop leng kut ke a yegnitoogu, a layaa yee: «Daali maad, waagaa songik a Ramot kam Galaad! Xan o jeg ne bugoona, too xan o Yaal oxe a ɓoxotin na xa ƥay of.»

¹³Oxe lul’eena a xoyik a Mikaya a layaan ee: «Duleer we fop kaa mbog ɗelem leng kut, a layanaa o maad oxe paax. Fat fa lay of a yoon fa fee den, o layanin paax.»

¹⁴Mikaya a doonaan ee: «Ne ta wooritna yee o Yaal oxe xe ñoowaa, neene a woortu yee ke o Yaal oxe a layaxama doŋ um yeginkan.»

¹⁵A gara paam o maad oxe, soo oxeene a laamtin ee: «Mikaya, ndax i mbara o nqire’ik, ndax i njangatin a Ramot kam Galaad, ndi kaa i mbarin o nqaƴ rek?» Mikaya a doonaan ee: «Reti, xan o jeg ne bugoona, too xan o Yaal oxe a ɓoxotin na xa ƥay no maad oxe.»

¹⁶Kaa koy, o maad oxe a layaan ee: «A caf a podnum um simkang o daaɓoox ee boo o layaa no gon no Yaal oxe, ndigil doŋ a waru ref?»

¹⁷Maaga, Mikaya a laya yee: «Kaam ga xeet fee Isra’el fop a pasaroox took xa coong axe nen ged laa jegeerna o kaynaak. O Yaal oxe a laya yee: ‹Njegatee o aa-adax, fat oxuu refna a xaad no mbind um na jam.› »

¹⁸O maad oxe Isra’el a laya a Yosafat ee: «Lay’aaxoong o ten, mosiraam o yegin paax muk, paaxeer doŋ a yegnaxam.»

¹⁹Mikaya a layaan ee: «Nan-gilooxi kañ ke o Yaal oxe a layna! Kaam ga o Yaal oxe ta moof no uum-maamaad le ten, malaaka ke ten fop a ngeenoox na ñamaak um fo na janoon um.

²⁰O Yaal oxe a laya yee: ‹An na retkaa, a nax a Ahab, ndax ta songik a Ramot kam Galaad boo a wartel maaga?› Leng we a laya kene, lakas we a lay kaana.

²¹Maaga, Yiif le a gara mbaambir no Yaal oxe soo a lay ee: ‹Mi, xam ret naxin!› O Yaal oxe a laamtaan ee: ‹Nam o fi’itkan?›

²²A doonaan ee: ‹Xam ret, laynoor duleer we ten fop xa maaƥ.› O Yaal oxe a layaan ee: ‹Kaaga pexey mbaax oo ndax o naxin. Reti o fi naaga!› »

²³Mikaya a ɓaata teen ee: «Ndiiki koy, keene a fi’e. O Yaal oxe a laynoora duleer we wo fop xa maaƥ, yaam no ndigil kaa heboox o ɓisiid naqad took of.»

²⁴Ndak fo ndak, Sedekiya fee o ƥiy Kenaana a matiida a Mikaya, a faɗin soo a layin ee: «Nam Yiif le no Yaal oxe a sutoortu na mi soo a gar a lay fa wo?»

²⁵Mikaya a doonaan ee: «Xan o andin no ñaal naa o bugko ɗasaa ndeer a ndok fo a ndok.»

²⁶Maaga, o maad oxe Isra’el a hebla o tag um ee: «Dami a Mikaya, o doxnin a Amon, refna gofornoor fee na teeru fee, fa Yowaas fee o ƥiy no maad oxe.

²⁷Fat o layanaam a den, da ƥek o mbindeef onqene kaso, too baa cooxeel ñaamel mbaat foofi fo deyu boo yaa um gatkaa na jam.»

²⁸Mikaya a doonaan ee: «O gatangaa fa jam de, o and ee o Yaal oxe layee fa mi.» A layahina yee: «Nuun qeet ke fop, nan-gilooxyo!»

²⁹O maad oxe Isra’el fa Yosafat fee o maad Yudaa a songka a Ramot kam Galaad.

³⁰O maad oxe Isra’el a laya a Yosafat ee: «Cungi um supit a tokax, ndax andidkaandeem soo ret na ñoq alaa. Wo o mat, rokooxi toki no maad ke wo.» Naaga, o maad oxe Isra’el a supta a tokax, ndax andidkaand, soo a ret na ñoq alaa.

³¹O maad oxe Araam kaa hebil’u aa-adax qarɓeen tadik fo aa-adax ɗik we na sareet-xire ke ten ee: «Ba nu song xiixire we mbaat aa-adax we den, o maad oxe Isra’el doŋ bugum nu song.»

³²Ye aa-adax we na sareet-xire ke a ƈookna a Yosafat a laya yee: «Ga’na ten refu o maad oxe Isra’el.» A nqota farna fo ten, ndax da songin, ndaa Yosafat a ƴufginooxa.

³³Maaga, aa-adax we na sareet-xire ke a nga’a yee reeƭee o maad oxe Isra’el soo da nqaƴin, a mbañatin o ndaab.

³⁴O qiixire no Aa-araam we a xaƴta a kas maa o leng a andeerna, soo ta room o maad oxe Isra’el a ndeer tal ke no ndoki njelem ne ten. O maad oxe a laya o ƈuuƴufin oxe na sareet-xire le ten ee: «Puli i nomtoox! Sutaam a mbeel xire le, yaam kaam gaañoox.»

³⁵A ñoq ale a ɗom’a lool no ñaal naaga boo a tax o maad oxe a geenoox na sareet-xire le ten, a jasnoor fo Aa-araam we, soo no yaar olaa ta xon. Fo’oy le yuurtoogna no ngaañax ne ten, kam a sareet-xire le a ɓaxooxoogu.

³⁶Ye njeeƈ ne a mudkaa, o wuuq oleeke a nannooxa kam saŋe naa yee: «Fat oxuu refna a xaad no saax um fo na teeru um!»

³⁷Naaga, o maad oxe a xona. O dal ole ten a ɓise kam Samari soo a gasel maaga.

³⁸Ye a sareet-xire le a ɓogeel na mbeel ale Samari a caga ke a ƥogooxoogna, xa ƥox axe a ngara, a njaxaa fo’oy le Ahab, ne o Yaal oxe a yegnitit’uuna.

³⁹Ke yoqna na pi ake Ahab fop fo ne ta maxanitna a xoox um mbind ne mosandit’eena a ñiiñ fa ñiig fo teeru ke ta maxinna fop, kaa mbindel no «Safe le no caloori ke no maad we Isra’el».

⁴⁰Ahab a daba daan um, soo Ahasiya fee o ƥeem a rondandin.

⁴¹Yosafat fee o ƥiy Aasa reeƭatu o maad Yudaa no hiid o nahkandeer ole no maat Ahab fee o maad Isra’el.

⁴²Ye Yosafat a sogna o refaa o maad, a soƥ’a ta jeg xa kiid qarɓeen tadik fo xa kiid xa ƥetaq. A maadooxa xa kiid qarɓeen ƭik fo xa kiid xa ƥetaq kam Yeerusaleem. Ya um Asuba a ne’’e, a ref o ƥiy Silhi.

⁴³A reefooga o jaf faap um Aasa, a fañ o waas, a fi’aa kaa jofna na kid no Yaal oxe.

⁴⁴Kaa koy, a ñaang a sadaxand ake moocand’aand, too xeet fee a maad’a o ƥoxottaa teen sadax fo cuuraay.

⁴⁵Yosafat a jamsa’oor’a fo o maad oxe Isra’el.

⁴⁶Ke yoqna na pi ake Yosafat fop fo njambaar ne ta lalitna fo a ñoq ake ten kaa mbindel no «Safe le no caloori ke no maad we Yudaa».

⁴⁷A suuda kam saax le ke yoqna no goor we sooboox’ina no njaga ne ɗeetoogeena nen tedu maadoogna na jamaane faap um Aasa.

⁴⁸Na jamaane faaga, o maad jeg’ee no saax laa Edoom, ndaa gofornoor soom reeƭu maaga.

⁴⁹Yosafat a jalna a kaal a maak a cula’ir akaa na ndetaa Tarsis, ndax ta waaƭik wurus no saax laa Ofiir, ndaa mbad’ee, yaam a kaal ake kaa ngefit’u Esiyon-Gebeer.

⁵⁰Maaga, Ahasiya fee o ƥiy Ahab a laamta a Yosafat, ndax dag we ten a yoon fo we Yosafat na kaal ake, ndaa oxeene jaɓ’ee.

⁵¹Yosafat a daba daan um soo a gasel na ƥak ale Dawid fee o taan um. O ƥeem Yehoram rondand’un.

⁵²Ahasiya fee o ƥiy Ahab reeƭatu o maad Isra’el kam Samari no hiid xarɓaxay fo hiid o ɓetuu ɗikandeer ole no maat Yosafat fee o maad Yudaa. A maadooxana a Isra’el xa kiid xa ƭaq.

⁵³A fi’a kaa faaxeerna na kid no Yaal oxe, a reef o jaf faap um fa ya um fa Yerobowam fee o ƥiy Nebat, riñ’ina xeet fee Isra’el no mbakaadaa.

⁵⁴Kaa faɗooxoogu a Baal, a gungaa mbaambir um. Neene, a fuuxnoora o Yaal oxe Roog fee Isra’el, ne faap um a fi’it’uuna.