Read NQAARIIT NE ROOG 1 Maad we 5 Bible Online

1 Maad we 5 - NQAARIIT NE ROOG bible

1 Maad we 5

¹Salomo doon’u o ɓay no maat ke fop nqotitna no xuluɓ olaa Ofrat, a gar no saax le no Fiifilista we boo no ŋat olaa Misira. Maad we no maat keene fop a ƥisiidooga a Salomo ci’it, a ƥoxotoox no ten no ñoow o ñis um fop.

²Ñaal nuu refna, ngaak ne Salomo fo wiin um fop a reeƭa: parig qarɓeen ɓetuu nahik mbiɗel bele fo parig teemeed fo parig qarɓeen ɓetuu tadik mbiɗel lakas,

³qoox xarɓaxay kaa ngudeena, qoox qarɓeen ƭik kaa nqotteena na xa siir axaa fo cegel teemeed kaa ngatna na ked ake fogreerna fo caf ke, pat ke, caq ke fo a kanaara yable ke.

⁴Salomo hame’u saax le fop no ke xotitna no xuluɓ ole Ofrat, a jof Tifsa boo Gaasa. Maad we na saax akeene fop kaa ƥoxotoox’u no ten too a jeg’a jam me widuuna fop.

⁵Wiin we Yudaa fo we Isra’el fop, no ke xotitna Dan boo Beer-Seeba a ngenooga no woor, oxuu refna a xooxaa a ƭing taxar biiñ um fo tun um na jam no ñoow Salomo fop.

⁶Salomo a jeg’a kud kaa saqna pis cuni qarɓeen nahik kaa na ngumneel a sareet-xire, fo ŋaaŋaay pis cuni xarɓaxay fo cuni ƭik.

⁷Gofornoor ke a cooxooga o maad Salomo o ñoow fo fop we mbog’ina no ngaak um. Oxuu refna no gofornoor ke a cooxoogaan ñaamel boo o nqool o muum, too a fi’ooga fop boo dara dangandkee.

⁸A ƥisaniidooga itam pis kumnel a sareet-xire ke fo pis ŋaayel ke lorso fo fo gooñ no fo mbiñ ne da ndeeƭna, a ndeefandin no bargal ke da ndaawna.

⁹Roog a ci’a a Salomo o and fo o jeg-yiif tigi fo a qalaat a mosu kaa mbodna nen pep lanq na ƥeeraamb o maag.

¹⁰Yaal-o-and we no batand fo we Misira fop, Salomo hup’u a den o and.

¹¹Ten hup’u wiin we fop o and, bo na Eetan fee o Ee-esrahi xe fa Hemaan, Kalkol fa Darda we xa ƥiy Mahol. Gon um a joot’a a ndeer qeet ke mbidna maaga fop.

¹²A fi’’a xa peƭit cuni tadik, a fer a kim juni fo a kim a ƥetak.

¹³Salomo a layta kaa farna no taxar ke fop, a xotit no ndaxar seedar ne Libaŋ boo no isoop ne na saxaa no tabax ne. A laya itam took muumeen ke, tiiƭ ke, ƥood ke fo liƥ ke.

¹⁴Wiin we a inoortiidooga no qeet ke fop, ndax da nan-giloox o and o maak ole Salomo fo no gon no maad we no lanq ke fop nan’ina o and ole ten a layteel.

¹⁵Hiiram fee o maad Tiir xaariit Dawid a mosu mos o ref. Ye ta yegna yee Salomo a dode o maad, a rondand a faap um Dawid, a lula wiin ndax da simnanin o ten.

¹⁶Salomo itam a lulta o layanel a Hiiram ee:

¹⁷«Andaa yee Dawid fee faap es daaw’ee o max Mbind naa kesaneena o Yaal oxe Roog um, yaam fañ we ten kaa songtoogun o saax oo saax. Kaa koy, o Yaal oxe a ci’aan ta dak fañ we ten.

¹⁸Ndiiki koy, o Yaal oxe Roog es a ci’axam o yaadax o saax oo saax boo a tax jegatiim fañ, too o njakad ɓeedatiraam.

¹⁹Kaam heboox boog o maxan o Yaal oxe Roog es Mbind naa na kesankeel gon um, ne o Yaal oxe a layit’uuna a Dawid fee faap es ee: ‹O ƥeef onqe na rondandkang, a moof took uum-maamaad le wo na maxankaxam Mbind.›

²⁰Ndiiki koy, hebli um godanel no taxar seedar ke Libaŋ. Dag we mi xan a yoon fo we wo, too xam cooxong ndabid ne no dag of ne o layitkan deŋ, yaam andaa yee o leng na in andee ne ndaxar a godteel ne Siisidoŋ we a andtuuna.»

²¹Ye Hiiram a nanna a ƭelem akaaga na Salomo, a jeg’a o ɗaay o maak soo a lay ee: «O Yaal oxe a hela o simatel xaye, ten fee ci’na a Dawid o ƥiy o njegu o and boo a waag o ɗox xeet fa maytu neeke!»

²²Hiiram a lulta ndax ta doon a Salomo yee: «Nanaam ke lultiidaxamoona. Xam waaƭanong a teex ndaxar seedar ake fo a teex filaawo ke ne bugtanoona.

²³Dag we mi xan a ƥistiid a den Libaŋ boo no maag olaa, a ngum a den toq, ndax da ngumbnaa a den no maag ole boo me bugoona. Maaga, xan a mbokit a den, soo da ndefat na xa ƥay of. Wo o mat, xan o fi’anaam ke buguuma, ta ref o coox mbind es o ñoow.»

²⁴Maaga, Hiiram a cooxa a Salomo a teex ndaxar seedar fo a teex filaawo a podne ta bug’ina.

²⁵O hiid oluu refna, Salomo a cooxooga a Hiiram ngap parig cuni qarɓeen ɓetuu fa leng bele fo ngap xa liitar cuni ɓetuu tadik diwliin oliiw fa nole, ndax ta ñoowdandtin mbind um.

²⁶O Yaal oxe a ci’a a Salomo o and ne ta regit’uuna o ten. Salomo fa Hiiram a ñoowooga na jam, a ndoon teen a ngiɓoor.

²⁷O maad Salomo a jaganda calel sertel ke, too goor cuni qarɓeen tadik waa ta xotitna muu refna kam Isra’el a ndeeƭu teen.

²⁸O nqool onquu watna Salomo a ɓisooga na den wiin cuni xarɓaxay Libaŋ, soo Adoniram a yetooxaa a den. Kaa njaloogu boo o nqool, cinj kaaga da ngat, a moof a qool a ƭak no pind den.

²⁹Salomo a jeg’a itam rooroxondax cuni qarɓeen ɓetuu ƭik fo goor cuni qarɓeen ɓetuu tadik waa na ƭegaa a ƥil na xa coong axaa,

³⁰fogreerna fo yeeyetax cuni tadik fo yeeyetax teemeed tadik we ndefan’ina gofornoor ke Salomo, a laltaa sañ-sañ den took no we mbi’oogna calel keene.

³¹O maad oxe a heblita, ndax a ƥil a maak a mosu kaa na mbi’itkeel fer le no Mbind Roog ne a ƭegel.

³²Jaajal we Salomo fo we Hiiram fo Geegebal we a ƭega a den, a njagand a teex ake fo a ƥil ake mbarna o maxtel Mbind Roog ne.