Read NQAARIIT NE ROOG 1 Maad we 6 Bible Online

1 Maad we 6 - NQAARIIT NE ROOG bible

1 Maad we 6

¹O maad Salomo a fera calel ke no Mbind ne no Yaal oxe a cinj ye Ii-isra’el we a sutooxna Misira boo a njeg xa kiid teemeed nahik fo xa kiid qarɓeen ɓetuu tadik. Calel ke a mber’e no hiid o nahkandeer ole no maat Salomo, no nqool Siw refna ref o nqool o ƭikandeer onqe no hiid ole.

²Mbind ne Salomo a maxan’ina o Yaal oxe, o cigdel ole a fi’’a xa noonoong qarɓeen ɓetuu fa leng, o yaajel ole a fi xa noonoong qarɓeen ƭik, geel le a fi xa noonoong qarɓeen tadik.

³Mbaambir a ndok a maak ale no Mbind Roog ne a jeg’a o ndambalaan, too o yaajel um a fi’’a xa noonoong qarɓeen ƭik nen ole no Mbind Roog ne, o cigdel kam ole ten a fi xa noonoong xarɓaxay.

⁴Mbind ne a fi’an’e xa palangteer axaa njegna tagar.

⁵Fo ndok fo mbulanq naa mbi’na taax-took a max’e na xa lak axe no tabax ne na ndok a maak ale fo axe na ndok-kam ale.

⁶Tok ke lanq, o yaajel den a reeƭa xa noonoong xa ƥetaq, tok ke ndeer o yaajel den a ref xa noonoong ɓetaa fo leng, tok ke took o yaajel den a ref xa noonoong ɓetaa ƭaq. O tinqel ole no tabax ne no Mbind Roog ne fodir’ee tafil fee no geel le ten fop. Kaa moƴ’u o xoƈaa a reefandin ne tok ke a ndondrandooritna. Neene, a qanq ake ndokkee kam tabax ne no Mbind Roog ne.

⁷Ye Mbind ne a maxeel, a ƥil a sexe njiriiñoorooge, too fangax o leede mbaat a coos mbaat njelem lakas nuu ta waagna waag o ref, nanit’aand teen.

⁸Ndokand ne no tok a lanq ke, farna fo ɓemb-roog o ñamaak ole no Mbind Roog ne a far’u. A jeg’a o toŋ-toŋ olaa xotitna maaga, a ŋaay no tok ke a ndeer. A jeg’ahina no tok ke a ndeer o toŋ-toŋ olaa xotitna maaga, a ŋaay no tok ke mbalakna took.

⁹A cinj ye Salomo a muukna maq ne no Mbind ne, a bombit’e a qanq fo a patax ndaxar seedar.

¹⁰Taax-took ne maxeena, a wid Mbind Roog ne, taax nuu refna teen, geel um a fi’’a xa noonoong xa ƥetaq, soo a qanq taxar seedar ake a ndiƈoox took tabax ne no Mbind Roog ne.

¹¹O Yaal oxe a laya a Salomo yee:

¹²«Woxey xeene maxanaxam mbind nene. Boo gayoona bargal es, fi ke simtuuma, reef kebil es fop, yaaga xam fadin a tegit es no kaa farna na wo, ne laytanuuma a faap of Dawid.

¹³Xam gen a ndeer Ii-isra’el we too xaƴkiim a Isra’el fee xeet es muk.»

¹⁴Ye calel ke no maq ne no Mbind Roog ne a ƈutna, Salomo

¹⁵a muurna kam fee no tabax ne fo a patax ndaxar seedar, a xotit a lanq boo no bomb le, soo o dung ole, ta ɗaapin teen a patax filaawo.

¹⁶A ɗega kam ee kam mbind ne xa noonoong qarɓeen ƭik axaa ngeenniteena a patax ndaxar seedar, ta xotit a lanq boo no bomb le, ndax ta fi’in o Mbiñ onqe moƴna o ted.

¹⁷Ke yoq’ina mbaambrand ne, a fi’’a xa noonoong qarɓeen nahik.

¹⁸A patax ndaxar seedar ake mbodna kam fee no Mbiñ o tedu nqe kaa mosandit’el ceq naa saxitna nen seegel-ngoy fo piɗ um. Fop kaa muurit’el a patax ndaxar seedar boo ɓil leng feeñoogee.

¹⁹Salomo a jaganda a ndok-kam ale no Mbind Roog ne, ndax arka ne no ngiɓoor ne no Yaal oxe a diƈel maaga.

²⁰O cigdel ole na ndok-kam ale a reeƭa xa noonoong qarɓeen ƭik, o yaajel ole a ref xa noonoong qarɓeen ƭik, soo geel le a ref xa noonoong qarɓeen ƭik itam. A laar’e wurus fa nqoolu. A jeg’a mbaambrand a ndok aleene o sadaxand olaa fi’it’eena a teex ndaxar seedar, a laarel wurus.

²¹Salomo a laarin’a kam fee no Mbind ne fop wurus fa nqoolu, soo o mbiñ onqe moƴna o ted, laar’eena wurus, ta fegtin ceen wurus.

²²Neene, ne Mbind Roog ne a fodeena fop, a laar’e wurus, soo o sadaxand ole itam reeƭna mbaambir o Mbiñ onqe moƴna o ted, a laarel wurus boo ta xet.

²³A fi’na kam o Mbiñ onqe moƴna o ted pindel yeeyetax ƭik kaa mbi’teena ndaxar oliiw-a-koƥ, nuu refna geel um a fi xa noonoong xarɓaxay.

²⁴O cigdel ole na nafir a leng ale no mbindel leng a reeƭa xa noonoong xa ƥetaq. A nafir a lakas ale a fi’ahin xa noonoong xa ƥetaq. Neene, ke xotitna no cat ne na nafir a leng ale boo no cat lakas naa, o cigdel um a reeƭa xa noonoong xarɓaxay.

²⁵Mbindel ƭikandeer ne itam a fi’’a xa noonoong xarɓaxay. Pindel ƭik keene mbod’u, a nand.

²⁶Geel le no mbindel leng ne a reeƭa xa noonoong xarɓaxay nen le no lakas ne.

²⁷Salomo a doonna pindel yeeyetax ƭik ke a ndeer ee ndeer a ndok-kam ale. Pindel keene kaa letin’u a nafir den, boo a nafir a leng ale no mbindel leng ne a duqaa tabax ne na ndok ale, soo a nafir a leng ale no mbindel lakas ne a duqaa o saax o lakas ole no tabax ne. A nafir a ƭak a lakas ake no pindel keene kaa nduqroogu a ndeer a ndok ale.

²⁸Pindel yeeyetax ƭik ke fop kaa laar’el wurus.

²⁹Took tabax ke kam tok ƭik ke no mbind ne fop, pindel yeeyetax fo a naaq keec fo piɗ mosu a sex’e teen.

³⁰O dung ole no tok ƭik ke no mbind ne wurus a laar’e.

³¹O Mbiñ onqe moƴna o ted a fi’an’e o don-maax olaa jegna begax ƭik kaa mbi’teena a teex ndaxar oliiw. A kiig ale no begax ke kooñ ƥetik[3] a jeg’u.

³²No begax ƭik ke a sex’e pindel yeeyetax, a naaq keec fo piɗ mosu soo da laarel wurus. Wurus fee a laar’e no pindel ke fo na naaq keec ake.

³³Ndokand ne no Mbind Roog ne a fi’an’e o don-maax olaa a tayil ale fo a toodook ake mbi’teena a teex ndaxar oliiw-a-koƥ soo a jeg kooñ nahik

³⁴fo begax ƭik pi’te a teex filaawo, nuu refna a jeg begax lakas.

³⁵Pindel yeeyetax fo a naaq keec fo piɗ mosu a sex’e teen, soo a seek ake sexeena a laarel wurus.

³⁶Cinj kaaga, o maax ole a widin’e ɓit laa fi’teena a ƥil a sexe kaa mbi’na xa per xa tadaq xa cokrandooru fo o per o leng a qanq ndaxar seedar.

³⁷No hiid o nahkandeer ole no maat Salomo, no nqool Siw, fer le no Mbind ne no Yaal oxe a sip’e.

³⁸Calel ke no maq ne a ƈut’a no hiid xarɓaxay fo o hiid o lengandeer ole no maat Salomo, no nqool Bul, refna ref o nqool o ɓetuu ndadkandeer onqe. Fop a fi’it’e ne ta xalaatit’eena. Maq neene a fi’’a boog xa kiid ɓetaa ƭaq.