Read NQAARIIT NE ROOG 1 Maad we 7 Bible Online

1 Maad we 7 - NQAARIIT NE ROOG bible

1 Maad we 7

¹Maq ne no mbind ne Salomo koy a fi’’a xa kiid xarɓaxay fo xa kiid xa tadaq, soo fop a sogkaa o ƴut.

²Salomo a maxna tabax naa na xoyeel Suungaan le Libaŋ, too o cigdel ole a reeƭu xa noonoong teemeed, o yaajel ole a ref xa noonoong qarɓeen ƥetik, geel le a ref xa noonoong qarɓeen tadik. A ne’aan gon leene, yaam ne ta jeg’ina xa per xa tadaq a toodook ndaxar seedar, too a qanq ndaxar seedar ake no bomb le a ndiƈoox’u took den.

³A bombte a patax ndaxar seedar, da ndoonoox took a qanq ake ngadandooxna. A toodook ake a mbi’a xa per xa tadaq axaa, oluu refna teen a jegna a toodook xarɓaxay fo a toodook a ƥetak.

⁴A jeg’a na xa saax xa ƭaq axe no tabax ne xa per xa tadaq xa palangteer axaa njasnoorna.

⁵Xa palangteer axeene fop fo xa lak axe den kaa mbodir’u o saax oo saax, a njasnoor, a mbi xa per xa tadaq.

⁶A maxna itam a ndok alaa fi’teena a toodook. O cigdel ole a reeƭa xa noonoong qarɓeen ƥetik, o yaajel ole a ref xa noonoong qarɓeen tadik. Tabax neene a jeg’a o ndambalaan onqaa fi’teena a toodook fo jibir no mbaambrand ne.

⁷A maxnahina a ndok ale no uum-maamaad le, na xoyeel itam o hate’and ole. Meene mat Salomo a hate’toogu. Ke xotitna a lanq boo took na ndok aleene a muurit’e a patax ndaxar seedar.

⁸Tabax ne Salomo a genkaa, no maax o lakas a reeƭu a cinj a ndok ale no uum-maamaad le, ndaa den mbog’u a maqooƭ. Cinj kaaga, Salomo a maxnana o ƥiy o ndew onqe Firawon fee ta geekoogna tabax naa nandna fo o ndambalaan onqe.

⁹Tabax keene fop, a xotit na per ake boo no bomb le fo maq ke tafil boo no saŋe naa no maax o maak ole a ƥil a maak a mosu kaa sexeena a mbi’it’e. Kaa liiƥ’el soo a sextel a si o saax oo saax.

¹⁰A per ake a mbi’it’e a ƥil a maak a mosu kaa akeeke a mbi’na xa noonoong xarɓaxay, akaana a mbi xa noonoong ɓetaa tadaq.

¹¹Took den a jeg’a a ƥil a liiƥe mosu kaa sexeena fo a teex ndaxar seedar.

¹²O maax o maak ole a ɓitit’e xa per xa tadaq a ƥil a sexe kaa cokrandoorna fo o per o leng a qanq ndaxar seedar, nen ɓit le widna o maax ole no Mbind ne no Yaal oxe fo o ndambalaan onqe ten.

¹³O maad Salomo a lulta Tiir, ndax ta xoyankel o koor o ne’e Huram[4].

¹⁴Huram feene koy kaa reeƭu o ƥiy no ñaaw oxaa fogna na carind ale Neftali. Faap um o Tiitiir a reeƭu, a ref o qaaxaw xanjar. Ten koy, kaa may’u fo o and fo o jeg-yiif, a ƴiƴ boo a waag o jal kuu refna fa xanjar. A jaaɓiida o maad Salomo soo a fi’anin calel ke ta sim’uuna fop.

¹⁵Huram a fi’a a toodook xanjar a ƭak. Geel le na luu refna a reeƭa xa noonoong xarɓaxay fo xa noonoong ɓetaa tadaq, soo wurmbal fee a fi xa noonoong xarɓaxay fo xa noonoong xa ƭaq.

¹⁶A jawana a qoox ake na toodook ake xanjar, soo luu refna, geel um a ref xa noonoong xa ƥetaq.

¹⁷A mosandta a qoox ake na toodook ake mbiic fo xa ƥaak xa tiwe xaa saxitna nen ceen. Xoox luu refna a jeg’a xa ƥaak ɓetaa ƭaq.

¹⁸A fi’a xa per xa ƭaq xa goronaad, da ngarit took o ƥaak oluu refna, ndax da muur xoox le na toodook aluu refna.

¹⁹Took xoox le na toodook aluu refna a jeg’a o ndip onqaa fi’’ina xa noonoong xa nahaq, a saxit nen buñit ñamb.

²⁰A qoox ake mbad’eena na toodook ake, luu refna na den a widin’e xa goronaad teemeed ƭik paam buñit le garitna mbiic ne took.

²¹A sipa a toodook ake mbaambir o ndambalaan onqe no Mbind Roog ne, a leng ale a fod na ñamaak, soo ta ne’in Yakin, tekitna ‹Roog kaa saƭkandaa›, a lakas ale a fod na janoon, ta ne’in Bowaas, tekitna ‹Na Roog doole fee a refu.›

²²O jul ole na toodook ake kaa saxit’u nen buñit ñamb. Neene, calel ke na toodook ake a muukte.

²³Huram a fi’a o waaŋaan xanjar o maak olaa fi’na wurmbal. Ke xotitna no cat boo no cat no waaŋaan oleene a reeƭa xa noonoong xarɓaxay, geel um a ref xa noonoong xa ƥetaq soo wurmbal fee a fi xa noonoong qarɓeen tadik.

²⁴Ɗuga a kiig ale no waaŋaan ole kaa mosandit’el kaa saxitna nen seegel-ngoy. No per oluu refna na xa per xa ƭaq axe mbidna o waaŋaan ole, o noonoong oo noonoong a jeg’a xa tim xarɓaxay. Mosandir keene kaa njawandoor’el fo o waaŋaan ole, a muum fo ten.

²⁵O waaŋaan ole kaa diƈoox’u took nitaal qoox xarɓaxay fo qoox ƭik kaa mbi’teena xanjar. Tadik no qoox keene kaa mbaambir’u no ɓemb-roog o janoon, tadik a mbaambir no mudand, tadik no ɓemb-roog o ñamaak, tadik no batand. Den fop koy, ɗuga o waaŋaan ole a mbes’u a cinj.

²⁶O tinqel ole a reeƭa o yaajel dang o ɓay, soo a kiig ale a fi’tel nen a kiig a tokol alaa saxitna nen buñit ñamb. O waaŋaan oleene a yipooga ngap xa liitar cuni qarɓeen ɓetuu ƭik fo xa liitar cuni ƭik.

²⁷Huram a fi’a tiƈir xanjar xarɓaxay. Oxuu refna na den, o cigdel um a reeƭa xa noonoong xa nahaq, o yaajel um a ref xa noonoong xa nahaq, soo geel um a ref xa noonoong xa tadaq.

²⁸Neeke o mat tiƈir ke a mbi’it’e: A jeg’a a kiiƈ ale damrandit’eena a liind.

²⁹Took a kiiƈ ale damrandit’eena a liind a jeg’a nitaal cogoy fo qoox fo pindel yeeyetax soo took a liind ake, no saax oo saax no cogoy ke fo qoox ke ta jeg pic kaa na saayooxaa.

³⁰Tiƈir nuu refna a jeg’a a saang a nahak xanjar akaa a koor xanjar a ndamna. No kooñ nahik ke a jeg’a saxaƈ njelem njawe, a ƭugoox o waaŋaan ole, a ngarit laqa mosandir ke.

³¹Took fee no tiƈir ke a jeg’a o gom olaa fi’na wurmbal, a yoɗoox took boo a fi ngap o noonoong, o yaajel um a fi o noonoong fa genwal. A jeg’a itam sexesexe no gom oleene. A kiiƈ ale koy fi’’ee wurmbal ndaa kooñ nahik podru a jeg’u.

³²A saang a nahak ake kaa ƭugoox’u a kiiƈ ale, a koor ake na saang ake a ndoofel na kiiƈ ale. A saang aluu refna, geel um a reeƭa o noonoong fa genwal.

³³A saang ake nen a saang a sareet a mbi’it’e. A koor ake, xa bool axe, xa celem axe na xa bool axe fo a moye ke, den fop xanjar fa njawe a ndeeƭu.

³⁴Saxaƈ nahik ke ndeeƭna no kooñ nahik ke no tiƈir nuu refna kaa muum’u fo tiƈir ke.

³⁵No jul ole no tiƈir nuu refna a jeg’a wurmbal faa geel um a fi’na genwal o noonoong. A jeg’a itam no jul ole xa tamir axaa muumna fo ten.

³⁶A sexahina pindel yeeyetax fo cogoy fo keec took xa saax xa ƭembetu xe no tamir ke fo axe na kiiƈ ale mosand’afulaandeena.

³⁷Tiƈir xarɓaxay ke fop mbog’u a calooƭ, xanjar fa njawe fa leng a ndeeƭu, a mbod soo a nand fop.

³⁸Huram a fi’a xa baaŋaan xanjar xarɓaxay, ndax da ndoonel took tiƈir xarɓaxay ke. O waaŋaan oluu refna, geel um a reeƭa xa noonoong xa nahaq soo a yipaa ngap xa liitar juni fo xa liitar teemeed nahik.

³⁹Tiƈir ƥetik a ndiƈe no saax o ñamaak ole no Mbind Roog ne, ƥetik lakas a ndiƈel no saax o janoon ole. O waaŋaan o maak ole kaa diƈ’el no saax o ñamaak ole no Mbind Roog ne paam kooñ ne ndeer o ɓemb-roog o ñamaak fo batand.

⁴⁰Huram[5] a fi’a xa ƥaxañ xa yipir ndaw axe, xa lang xanjar axe fo xa toon xa biisir axe. Neene, a fadna fop ke o maad Salomo a sim’uuna no Mbind ne no Yaal oxe:

⁴¹a toodook a ƭak fo a qoox a ƭak akaa na mbadkeel no cat ke na toodook ake, piic ƭik ke na muuritkeel a qoox ake na toodook ake,

⁴²xa goronaad teemeed nahik axe mbi’’ina xa per xa ƭaq no piic ƭik ke muur’ina a qoox ake,

⁴³tiƈir xarɓaxay ke fo xa baaŋaan xarɓaxay axe ndooneena took den,

⁴⁴o waaŋaan o maak ole fo qoox xarɓaxay fo qoox ƭik ke mbaxooxuuna,

⁴⁵xa ƥaxañ xa yipir ndaw axe, xa lang axe fo xa toon xa biisir axe. Xa ƥaxañ axeene fop Huram a jalan’ina Mbind ne no Yaal oxe, ne Salomo a heblit’uuna o ten, xanjar fa ƥodaxne a ndeeƭu.

⁴⁶No njanaaw o maad oxe a jawnit’u a den na xa saawit axaa Yordaan ndeer Sukot fa Sartan.

⁴⁷Cinj kaaga, Salomo a hebla da ƥisel kam Mbind ne no Yaal oxe, ndaa ne da may’ina, a tax’a boo mbaaƭ’ee o and ne o meɗel ole na xanjar fee jiriiñooreena a fodna.

⁴⁸Salomo a jalnahina tig oo tig lakas ke ngelna no Mbind ne no Yaal oxe fop: O sadaxand wurus ole, a taabul wurus ale na xa kaf puuru xe ƥoxoteena a Roog,

⁴⁹a pagal wurus fa nqoolu ke na xa lampa xe ndiƈ’eena mbaambir o Mbiñ onqe moƴna o ted, a ƥetak na ñamaak, a ƥetak na janoon fo piɗ den, xa lampa den fo xa caƥir den ndeeƭna wurus,

⁵⁰xa toon axe, capil ke, a tokol a biisir ake, a tokol a lakas ake fo fo njaq ne ndeeƭna wurus fa nqoolu, sarñel ke no begax kam ke no Mbind ne, no ndokand ne no Mbiñ onqe moƴna o ted fo ke no begax ke no ndokand ne no Mbiñ o tedu nqe ndeeƭna wurus.

⁵¹Ye Salomo a ƴutna calel ke no maq ne no Mbind ne no Yaal oxe, a simta ndax ke faap um Dawid a kesan’ina o Yaal oxe a ɓisiidel: Xaaliis fa nqoolu fee, wurus fee fo tig oo tig lakas ke soo a ɓek a den na kamba le no Mbind ne no Yaal oxe.