Read NQAARIIT NE ROOG 1 Maad we 8 Bible Online

1 Maad we 8 - NQAARIIT NE ROOG bible

1 Maad we 8

¹Maaga, o maad Salomo a fokata paam um kam Yeerusaleem maak we Isra’el, yaal a carind ake fop fo yaal ƥasil ke no Ii-isra’el we, ndax da nqotit arka ne no ngiɓoor ne no Yaal oxe na ƥak ale Dawid na xoyeel a xoy Siyoŋ, a ƥisin no Mbind Roog naa.

²Goor we Isra’el fop a mbokatoora me no maad Salomo ndax da ndoofand xew fee no nqool Etanim refna ref o nqool ɓetuu ƭikandeer onqe.

³Ye maak we Isra’el fop a mbadiidna, saasadax we a meeɓa arka ne.

⁴Neene, saasadax we fo Leelewi we a ƥisa arka ne no ngiɓoor ne no Yaal oxe fo Ƭiif ne o Yaal oxe a xetteel fo tig oo tig tedu lakas ke ndeeƭna kam fee.

⁵O maad Salomo fo mbokatax ne Isra’el ndeeƭna fo ten fop mbaambir arka ne a sadaxta cegel katu na ked ake fo qoox mayu kaa mbaagaandeena o lim, ne’atiim o hapel.

⁶Cinj kaaga, saasadax we a ƥeka arka ne no ngiɓoor ne no Yaal oxe kam Mbind Roog ne no Mbiñ onqe moƴna o ted, ɗuga a nafir ake no pindel yeeyetax ke.

⁷Pindel yeeyetax ke kaa letin’u a nafir den, da yooroox me arka ne a refna. Kaa yookoogu arka ne fo a teex ake ta meeɓteel.

⁸A teex akeene kaa njigid’u boo o fodangaa na ndok a maak ale adooxan’ina o Mbiñ onqe moƴna o ted, o ga’aa a den, ndaa koy, waag’iro o fod tafil boo ga a den. Boo no ñaal ne xaye sax, arka ne a maada maaga.

⁹Jeg’ee lakas kam arka ne a refangee a alfa ƥil a ƭak ake Moyiis a ɓek’ina teen no joong olaa Horeb, ye o Yaal oxe a hiɓoorna fo Ii-isra’el we, a cinj ye ta sutna a den no saax laa Misira.

¹⁰Ye saasadax we a sutooxaa o Mbiñ o tedu nqe, eel a mayƭanda Mbind ne no Yaal oxe

¹¹boo saasadax we mbaag’atee o yoq maaga ndax da mbadin o far den, yaam eel le no ndam onqe no Yaal oxe kaa mayƭand’u Mbind ne no Yaal oxe.

¹²Maaga, Salomo a laya yee: «O Yaal oxe, wo layu yee no eel niɓu o genkaa.

¹³Mi koy, tabaxanaaxoong Mbind, o mbiñ onqaa o genkaa boo faw!»

¹⁴O maad Salomo a geleerooxa, a faambir fo mbokatax ne no Ii-isra’el we fop ngeenoox’ina soo a barke a den.

¹⁵Cinj kaaga, a laya yee: «O Yaal oxe Roog fee Isra’el a hela o simatel, yaam ten fadnitu katil um ke ta layoodna a faap es Dawid ee:

¹⁶‹No kaa xotitna no ñaal naa suttuuma a Isra’el fee xeet es no saax laa Misira, mosiim o jil teeru fa leng ndeer a carind ake Isra’el fop maa maxaneema Mbind naa gon es a ƴufginooreel, ndaa jil’aam a Dawid, ndax ta adooxan a Isra’el fee xeet es.›

¹⁷Faap es Dawid koy, a heña’’a o maxan o Yaal oxe Roog fee Isra’el Mbind.

¹⁸Kaa koy, o Yaal oxe a laya a faap es Dawid ee: ‹Fi’aa paax, yaam ne heña’oona o maxanaam Mbind.

¹⁹Kaa rek, refkee yee wo na maxankaxam Mbind, ndaa o ƥeef ŋaƈit a refkaa. Ten o mat na maxankaa gon es Mbind!› »

²⁰Salomo a ɓaata teen ee: «O Yaal oxe a fadna a tegit um. Rondandaam a faap es Dawid, moof no uum-maamaad le Isra’el, ne o Yaal oxe a layit’uuna, soo max Mbind naa kesaneena gon le no Yaal oxe Roog fee Isra’el.

²¹Kesaam teen a seek maa arka ne saqna a alfa ƥil ake no ngiɓoor ne no Yaal oxe a warna o ref, ngiɓoor ne ta dalin’ina fo daan in, ye ta sutitna a den no saax laa Misira.»

²²Cinj kaaga, Salomo a geenooxa mbaambir o sadaxand ole no Yaal oxe, a faambir fo mbokatax ne no Ii-isra’el we fop, a letin xa ƥay um took,

²³a xeɗ ee: «O Yaal oxe Roog fee Isra’el, jegee roog faa nandna fa wo, ta ref na asamaan mbaat took lanq ke. Kaa o gayaa ngiɓoor ne fo o paaxel of a ndeer of fo dag of we ndamooxna na wo na qeeñ den fop.

²⁴Fi’aa ke regoona a Dawid fee faap es refna o tag of, fadin a tegit of fo ten. Ke layoodanoona, fadnaano xaye.

²⁵Ndiiki koy, o Yaal oxe Roog fee Isra’el, fadnanahini a Dawid fee faap es refna o tag of ke reg’anoona yee: ‹Boo xa taan of a ndamooxna na mi ne fi’tanoona wo fa xoox of, ñakkiro muk mbaambir es o leng na den oxaa rondandoonga, a moof no uum-maamaad le Isra’el.›

²⁶Ten taxu, wo Roog fee Isra’el, ngela fat a ƭelem akeene lay’oona o tag of Dawid fee faap es a mbadnoox.

²⁷Kaa koy, ndax no ndigil xan Roog a gen took lanq ke? O xeƈangee na asamaan fee took-ee-took, nam o xeƈitkaa no Mbind neeke maxanoonga!

²⁸Yaqanee koy, o Yaal oxe Roog es, rungi nof of na qeƭ no tag of fo a ƈufginax um, ndax o nan-giloox a loolax fo a qeƭ no tag of xaye.

²⁹Ñaal fo yeng, ngela fat a kid of a ngaan no Mbind nene, no mbiñ onqe layoona yee xan gon of a gen teen. Nan-gilooxi boog a qeƭ no tag of oxe faambirna fo mbiñ onqene a xeɗaa.

³⁰Ngela fat o nan-gilooxaa a qeƭ no tag of fo ale Isra’el fee xeet of yaa da mbaambirna fo o mbiñ onqene a nqeɗaa. Nan-gilooxi a in! Kaam ee nan-giloorti a in na asamaan fee genoona too waasan a in!

³¹O kiin a jambange yee a tooña o kend um boo a serel o daaɓoox, a taaƥ ale a fi’tange kam Mbind nene mbaambir o sadaxand ole wo,

³²nan-giloorti na asamaan soo hate dag of, ndax o xaw oxe tooñna, rabdin a pi um, o cofu xe mat, o nomtin o cofel um.

³³Boo fañ we a nqawna a Isra’el fee xeet of, yaam da mbakaad na wo, a nomtooxiidangaa me wo, a simat gon of, a nqeɗong, a ƈufginooxong kam Mbind nene,

³⁴nan-giloorti a den na asamaan, waasan a Isra’el fee xeet of pakaad den soo nomtiid a den no fiisel ole ci’oona daan den.

³⁵Asamaan fee naagangaa kek, a fañat o deɓ, yaam ne xeet of a mbakaadna na wo, a mbaambrangaa no mbiñ onqene, a nqeɗ, a simat gon of soo a mbes pakaad den a cinj, yaam ne o neewandkaa a den,

³⁶nan-giloorti a den na asamaan, waasanit pakaad no dag of ndefna ndef Isra’el fee xeet of. Aqatini a den a ƭat a paax ale da mbarna o ndeef soo deɓiid no lanq ke ci’oona xeet of nen lam.

³⁷Biim a jegangaa kam saax le mbaat piste, a jegangaa xa ƥuus mbaat xa qomb, boo soƈ mbaat tooroog a ngarna, boo fañ we a mbidna xeet of o kurul-keƥ kam saax den, boo taamaala mbaat o njakad onquu ta waagna waag o ref a garna,

³⁸xeet of a ƈufginooxangaang, nan-gilooxi a den. A qeƭ fo a qeƭax aluu o kiin oxuu ta waagna waag o ref mbaat Isra’el fee xeet of fop a xeɗna, yaa oxuu refna a andkataa coono xeeñ um soo a letin xa ƥay um farna fo Mbind nene,

³⁹nan-giloorti a den na asamaan fee genoona, too waasan a den, ɓek teen o ɓay of, rabid oxuu refna a pi um, yaam wo doŋ andu xeeñ no kiin oo kiin.

⁴⁰Neene, xan da saɗarong no ñoow o ñis den fop kam o fiisel ole ci’oona daan in.

⁴¹Fesoori neene itam fo o gataakoon ole fogeerna na Isra’el fee xeet of, yaa ta inoorkaa no saax goƭu yaam gon of,

⁴²yaam o mat, xan a nan gon maak le wo fo o ɓay o jegu doole le wo fo a naax of ale letnooxna a layteel. A faambrangaa no Mbind nene a xeɗ,

⁴³nan-giloorteen na asamaan fee genoona soo ci o gataakoon oleene fop ke ta xeɗna. Neene, xan qeet ke no lanq ke fop a and oxe refoona, a saɗarong nen a Isra’el fee xeet of soo a and itam ee gon of na ƴufginooreel no Mbind nene maxuuma.

⁴⁴Yaa xeet of a nqire’ikkaa fo fañ den, a ndeef a ƭat ale hebloona a den, a mbiƈaqilooxangaa farna fa teeru fee jiloona fo Mbind ne maxanoonga, a nqeɗong, wo o Yaal oxe,

⁴⁵nan-giloorti a qeƭ den fo a ƈufginax den na asamaan, farit a den.

⁴⁶Xeet of a mbakaadangaa na wo, yaam jegee o kiin oxaa bakaadkeerna, boo o fuuxan a den soo ɓoxot a den fañ den, da ƥis a den gilaa saax took o hup doole, ta goƭ mbaat ta mat,

⁴⁷kam saax le da ƥiseena took o hup doole, a nomtiidangaa a yiif den, a saktooxiid me wo, a nqeɗooxong ee: ‹I mbakaada, tooñong soo mbi kaa faaxeerna›,

⁴⁸a nomtooxiidangaa me wo na qeeñ den fop fo na xa laaw den fop too a nqeɗtangaang kam saax le no fañ den we na ndamkaa a den mbaƭ, a mbaambir fo saax le ci’oona daan den fa teeru fee jiloona fo Mbind ne maxuuma no gon of,

⁴⁹nan-giloorti a qeƭ den fo a ƈufginax den na asamaan fee genoona, ɓoxot a den ɓur.

⁵⁰Waasani xeet of pakaad den na wo fo a poom ake da mbi’na fop, soo fi boo fañ we ndamna a den mbaƭ a njeg na den o liir.

⁵¹Yaam o mat, den ndefu xeet of fo lam of, den we suttoona Misira ndeer o saasnand njelem ole.

⁵²Fat a kid of a mbetoox na qeƭax no tag of fo na qeƭax Isra’el fee xeet of, ndax o nan-giloox a den a mbanuu da ƈufginooxang.

⁵³Wo o mat jektirandu a in fo qeet lakas ke no lanq ke fop, ndax o fi a in lam of, ne layit’anoona reefandin no tag of Moyiis, ye suttoona daan in Misira, wo o Yaal oxe na refkaa boo faw.»

⁵⁴Ye Salomo a ƴutna a qeƭ aleene fo a qeƭax aleene ta xeɗooxoogna o Yaal oxe, a inooxa mbaambir o sadaxand ole no Yaal oxe me ta gooknoox’ina, a letin xa ƥay um farna fa asamaan.

⁵⁵A geenooxa, a barke mbokatax ne no Ii-isra’el we fop, a lay a maak ee:

⁵⁶«O Yaal oxe a hela o simatel, ten fee ci’na a Isra’el fee xeet um a ñootnax, a reefandin ne ta layit’uuna. Fop ke ta regit’ina koy na pexey o tag um Moyiis, dara teen fe’ee a koƥ.

⁵⁷Yaasam boog o Yaal oxe Roog in a ref fa in, ne ta refit’ina fo daan in! Ngela ba o fod a in too ba o waas a in,

⁵⁸ndaa ɓakandi a qeeñ in na wo, ndax i ñaaƴaa na ƭat of fop, ndeef kebil of fo bargal of fo ke simtoona, too o coox’un daan in.

⁵⁹Yaasam fa lay fee um xeɗoortaa meeke a ref paam o Yaal oxe Roog in ñaal fo yeng, soo ta fi’anaa o tag um fa xeet fee Isra’el paax ñaal oo ñaal.

⁶⁰Neene, xan qeet ke na adna fee fop a and ee o Yaal oxe refu Roog, too fa lakas jegee.

⁶¹Yaaga boog, fat a qeeñ nuun fop a ndefan o Yaal oxe Roog in, ndax nu ñaaƴ no bargal um, ngay kebil ke ten, ne ta refitna xaye.»

⁶²O maad oxe fo Ii-isra’el we ndeeƭna fo ten fop a ƥoxota o Yaal oxe sadax.

⁶³Salomo a ɓoxota qoox cuni qarɓeen ƭik fo qoox cuni ƭik fo cegel teɓ cuni teemeed fo cuni qarɓeen ƭik, da ndef sadax fa njamsa’oor. Neene, o maad oxe fo Ii-isra’el we fop a mbarke’a Mbind ne no Yaal oxe.

⁶⁴No ñaal leng kut ne, o maad oxe a kesa a ndeer ale no maax ole refna mbaambir Mbind ne no Yaal oxe, yaam o sadaxand xanjar ole refna mbaambir no Yaal oxe kaa neew’u lool no sadax keene. Keene tax’u Salomo a jiriiñoor o maax ole, ndax ta ɓoxotit teen sadax toxel ke fo sadax tuufe-duufe ke fo neebam ke no sadax camsa’oor ke.

⁶⁵Naaga, Salomo a roofanda xew faaga, a yoon fo Ii-isra’el we fop. Mbokatax maak a inoortiid’a no saax le fop, ke xotitna no ndokand naa Hamat no ɓemb-roog o janoon boo na ƈufnand alaa Misira no ɓemb-roog o ñamaak. A ndoofanda xew faaga mbaambir no Yaal oxe boo ñaal ɓetuu ƭik, cinj kaaga ñaal ɓetuu ƭik lakas, ta ref ñaal xarɓaxay fo ñaal nahik.

⁶⁶No ñaal ɓetuu ndadkandeer naa, o maad oxe a nomta xeet faa da nqaad no ƭiif den. A salana o maad oxe soo a nqaad no ƭiif den, a mbelakinoox, a qeeñ den a may muut fo o ɗaay no paax ke o Yaal oxe a fi’an’ina o tag um Dawid fa Isra’el fee xeet um.