Read NQAARIIT NE ROOG 1 Maad we 9 Bible Online

1 Maad we 9 - NQAARIIT NE ROOG bible

1 Maad we 9

¹Ye o maad Salomo a ƴutna maq ne no Mbind ne no Yaal oxe fo ne no mbind no maad ne fo ke ta heboox’ina o max fop,

²o Yaal oxe a feeñooxaan jaf ɗikandeer, ne ta feeñoorit’uuna Gibe’on.

³O Yaal oxe a laya a Salomo yee: «Jaɓaam a qeƭ of fo a qeƭax ale xeɗooxaxamoona. Kesaam Mbind nene maxoona, too xan gon es a gen teen boo kili, a kid es fo xeeñ es a ndef teen boo faw.

⁴Wo o mat, boo damooxoona na mi ne faap of Dawid a damooxit’ina na mi fo xeeñ letu fo na ƭat, ndax o fi fop ke hebloonga, gay bargal es fo ke simtuuma,

⁵xam saƭkand maat of kam Isra’el boo kili, ne layit’anuuma a faap of Dawid ee: ‹Ñakkiro muk o leng na xa taan of oxaa rondandoonga took uum-maamaad le Isra’el.›

⁶Kaa koy, nu mbesangaam a cinj, nuun fo xa taan nuun, mbañ o ngay kebil es fo bargal es ke dalnanuuma a nuun, boo nu mbaɗookna roog lakas ke, ngungaa mbaambir den,

⁷yaaga nuun Ii-isra’el we, xam sutit a nuun no fiisel ole ci’uuma a nuun, Mbind ne kesanuuma gon es, um naagin buc. Neene, Isra’el xan a ref naxoor fo calat a ndeer qeet ke fop.

⁸Xan Mbind nene a refat juum kefatin, too fop we na ndeefkaa a paam um, xan a njaaxiɗ, a mbuuƴ, a laamtooxaa yee: ‹Xar taxu o Yaal oxe a fi kene saax lene fo Mbind nene?›

⁹Xan a ndoonel ee: ‹Ke taxuuna refu yee Ii-isra’el we kaa mbaas o Yaal oxe Roog den, sutitna daan den no saax laa Misira, soo a ndamoox no roog lakas, a ngungaa mbaambir den, a mbaɗooxaa a den. Ten taxu o Yaal oxe a ɓisiid took den taamaala feene fop.› »

¹⁰Salomo a fi’’a xa kiid qarɓeen ƭik no maq ne no pind ƭik ke ndefna Mbind ne no Yaal oxe fo mbind no maad ne.

¹¹Maaga, ne Hiiram fee o maad Tiir a coox’ina a Salomo a teex ndaxar seedar fo a teex filaawo fa wurus boo podne ta soxla’’ina fop, a cooxa a Hiiram teeru qarɓeen ƭik kam o jegel olaa Galile.

¹²Hiiram a inoortiida Tiir, ndax ta ɗeet teeru ke Salomo a ci’’uuna, ndaa teeru keene mbel’iran.

¹³A laya a Salomo yee: «O pog es, teeru keeke ci’axamoona, xar a ndefu?» Maaga, a ne’a a den saax le Kabuul[6], too gon leene a maadtu boo no ñaal ne xaye.

¹⁴Hiiram koy, ngap parig qarɓeen nahik wurus a lulit’u a Salomo.

¹⁵O maad Salomo koy, a jagand’a calel ke na serteel, ndax ta max Mbind ne no Yaal oxe fo mbind no maad ne ten fo uum lanq le na xoyeel Milo fo saŋe ne Yeerusaleem fo teeru ke ndefna Hasoor, Megido fa Geseer.

¹⁶Firawon fee o maad Misira kaa song’u a Geseer, a jaɓin, a doxin soo a war Kaakanaan we ngen’ina teen. A ci’a teeru feene o ƥeem o ndew, ye ta dolooxankaa a Salomo.

¹⁷Ten taxu Salomo a maxatin a Geseer, a maxatin itam a Bet-Horon fee a lanq,

¹⁸Baalat, Tamaar na koƥ-a-ƥor alaa no saax laa Yudaa,

¹⁹teeru ke ndeeƭna taga no maad fop, too Salomo a jeg’u a den, teeru ke na sareet-xire ke fo teeru ke no ŋaaŋaay pis we. A maxa itam fop ke ta bug’ina kam Yeerusaleem, kam Libaŋ fo kam saax le ta hame’’ina fop.

²⁰A maad’a o jegaa kam saax le Isra’el Aa-amori, Heeheet, Peeperisi, Hiihiwi fo Yeeyebus. Weene fop kaa ndeeƭu wiin waa ndefeerna Ii-isra’el.

²¹Xa taan den a maad’a o ñoowaa kam saax le, yaam Ii-isra’el we mbaag’ee o moocand a den. Weene o mat Salomo a fi’’u faɗ, a seraa a den calel, too faɗ a maadu o ndefaa boo no ñaal roog ne xaye.

²²Kaa koy, Salomo ser’ee o leng no Ii-isra’el we mbaƭ, yaam kaa ndeeƭu xiixire um, dag um, aa-adax um, cawdiin um, ƴuuƴufin a sareet-xire ke ten fo ŋaaŋaay pis um.

²³Aa-adax weene adooxan’ina calel ke Salomon a ndeeƭa teemeed ƥetik fo qarɓeen ƥetik, too den yetooxoogu jaajal we saq’ina calel keene.

²⁴O ƥiy o ndew onqe Firawon fee a jangoorta na ƥak ale Dawid, a xaad no mbind um ne Salomo a maxan’uuna. Maaga Salomo a maxtu uum lanq le na xoyeel Milo.

²⁵Salomo a ɓoxotooga o Yaal oxe sadax toxel fo sadax camsa’oor a caf a tadak o hiid oluu refna no sadaxand ole ta max’ina. A doxooga itam cuuraay took o sadaxand ole reeƭna mbaambir no Yaal oxe, a soƥ Mbind Roog ne a ƴut.

²⁶O maad Salomo a jalna a kaal, da ndef Esiyon-Gebeer paam Eylat, na ƥeeraamb ale na Kal ale no xeet le kam saax laa Edoom.

²⁷Hiiram a lula na kaal akeene maa no dag waa Salomo dag um waa ndeeƭna maamaag andu o maag tigi.

²⁸Den fop a ndeta no saax laa Ofiir[7], a nqottiid maaga ngap parig teemeed fo parig qarɓeen nahik fo parig tadik wurus, a ƥisaniidin o maad Salomo.