Read NQAARIIT NE ROOG 2 Maad we 11 Bible Online

2 Maad we 11 - NQAARIIT NE ROOG bible

2 Maad we 11

¹Ye Ataliya fee ya no maad Ahasiya a yegna yee o ƥeem a xona, a inooxa, a saŋik ƥasil no maad ne kam Yudaa fop.

²Kaa koy, Yehoseeba fee o ƥiy o ndew onqe no maad Yehoram, too a ref itam o cigeen Ahasiya, a janga a Yowaas fee o ƥiy Ahasiya, a xottin na yelem a ndeer xa ƥiy axe no maad oxe mbaroogeena. A fokataan fo xe na numnan kam a ndok a pe’el ale. Neene, Yowaas war’aand, yaam kaa ɗasin’el boo Ataliya ga’iran.

³A ɗasne fa Yehoseeba kam Mbind ne no Yaal oxe boo xa kiid ɓetaa fo leng, yaam Ataliya maadooxoogu kam saax le.

⁴No hiid o ɓetuu ɗikandeer ole, Yehoyada fee o saasadax a lulta aa-adax no xiixire teemeed we no Kaakari we fo we no yeeyetax lakas we no maad oxe. A xoyniida a den da ngar me ten kam Mbind ne no Yaal oxe. A dalna fa den ngiɓoor, a daaɓooxnoor a den kam Mbind ne no Yaal oxe soo a lal a den o ƥiy onqe no maad oxe.

⁵Cinj kaaga, a hebla a den ee: «Keeke refu ke nu mbi’kaa: Fat we na mberaa na nuun calel na bes fee na ñootnax ale a nqaajoox a qaaj a tadak, a leng ale a yetooxaa mbind ne no maad oxe,

⁶a qaaj a ƭikandeer ale a yetook no don-maax olaa Suur, soo a qaaj a tadkandeer ale a yetook no don-maax ole refna a cinj yeeyetax we no maad oxe. A qaaj a tadak akeene na mbugko njaƥatiraa a yetax ale no ndokand ne no Mbind ne no Yaal oxe.

⁷Fat a qaaj a ƭak a lakas ake naangeerna o njalaa na bes fee na ñootnax ale a yetooxiid o maad oxe kam Mbind ne no Yaal oxe.

⁸Fat nu ndeer o maad oxe o saax oo saax, oxuu refna a pokoox ƥonax um, too o lakas oxuu bugna o xaañ a ndeer nuun, fat nu mbarin. Fat nu ndef fo o maad oxe muu ta dakaa.»

⁹Aa-adax no xiixire teemeed we a mbi’a fop ke Yehoyada fee o saasadax a hebil’ina a den. Oxuu refna na den a fokata a yaj um, we mbar’ina o yetoox na bes fee na ñootnax ale fo we mbar’eerna o yetoox na bes faaga fop, soo da ndet maa Yehoyada fee o saasadax oxe.

¹⁰O saasadax oxe a cooxa aa-adax no xiixire teemeed we a salma ke fo pegoor ke o maad Dawid a jeg’ina, too da ndeeƭu kam Mbind ne no Yaal oxe.

¹¹Oxuu refna no yeeyetax we no maad oxe kaa pokoox’u ƥonax um, da ngeenoox me xotitna no saax o ñamaak ole boo no saax o janoon ole no Mbind Roog ne paam o sadaxand ole fo paam Mbind Roog ne, ndax da ndeer o maad oxe.

¹²Maaga, Yehoyada a sutiida o ƥiy onqe no maad oxe, a rokanin o ndip no maad onqe, a cooxin yiƥadax ne no safe le no kebil ke. A dalne o maad, a ɗuumel soo da mboxaa, a mbalalooxaa yee: «Yaasam o maad oxe a ñoow!»

¹³Ye Ataliya a nanna coow le no yeeyetax we no maad oxe fo le na xeet fee, a naaga daket, a dab faan laa no Mbind ne no Yaal oxe, a ɗeetiid.

¹⁴A ƴooka o maad oxe ta geenoox took ndaalaand um, ne o mbaax onqe a simtituuna. Aa-adax we fo we saq’ina a luuƥ ake kaa ndeeƭu paam um, xeet fee no saax le Yudaa fop a ndef no ɗaay soo a luuƥ ake a njibaa. Maaga, Ataliya a dalfooxa o faar toki um, a falaloox ee: «Hiɓaneem o ngir oo, hiɓaneem o ngir!»

¹⁵Maaga, Yehoyada fee o saasadax oxe a hebla aa-adax no xiixire teemeed waa yee: «Ndeefneenoo ndeer xa qod axe, sutin, too oxuu ƴufgiiduuna, fat a wartel laƥ.» O saasadax oxe koy kaa lay’u yee baa ta wartel muk kam Mbind ne no Yaal oxe.

¹⁶A ndeƈ-ndeƈnaan boo no mbind ne no maad oxe, a ndeefnin no Ndokand ne no pis ke. Maaga mat a mbartun.

¹⁷Yehoyada a dalna ndeer o Yaal oxe fo o maad oxe fa xeet fee ngiɓoor naa saƭkinna a den no ndef xeet fee no Yaal oxe. A dalna itam ngiɓoor ndeer o maad oxe fa xeet fee.

¹⁸Xeet fee kam saax le fop a ndoka kam mbind a qeƭ ne Baal, a mbaytin, a nduguñ nem xa sadaxand axe fo nitaal ke ten, soo Matan fee o saasadax Baal, da mbartin mbaambir xa sadaxand axe. Yehoyada fee o saasadax no Yaal oxe o mat a fi’a yeeyetax kam Mbind ne no Yaal oxe,

¹⁹a fokat aa-adax no xiixire teemeed we fo Kaakari we fo yeeyetax lakas we no maad oxe fa xeet fee fop, a yoon fa den, da nqotit o maad oxe no Mbind ne no Yaal oxe, a ƥisin no mbind no maad ne, a ndeefnin no ndokand ne no yeeyetax we no maad oxe. Maaga, Yowaas a moofa no uum-maamaad le.

²⁰Xeet faa no saax laa fop a mbelakinooxooga, soo teeru faa a yeeɓooxat. Ataliya o mat, a warit’e laƥ kam mbind ne no maad oxe.